50 ދުވަސް ވީއިރުވެސް ފުވައްމުލަކުން ގެއްލުނު ޝަފީއު ނުފެނުނު!
ޝަފީއު ގެއްލުނީ ފުވައްމުލަކުން މިދިއަ ޖުލައި މަހު 14 ވަނަ ދުވަހު
ފުވައްމުލަކުން ގެއްލުނު ޝާފިއު: ގެއްލިގެން ހޯދާތާ 50 ދުވަސް ވީއިރު އަދިވެސް ނުފެނޭ --
މި އަހަރުގެ ޖުލައި މަހުގެ 14 ވަނަ ދުވަހުން ފެށިގެން ގެއްލިގެން ހޯދަމުންދާ ފުވައްމުލަކު އޮޅުތެރޭގެ އުމުރުން 43 އަހަރުގެ މުހައްމަދު ޝަފީއު އަދިވެސް ނުފެންނަ ކަމަށް ފުލުހުން ބުނެފި އެވެ.
ފުލުހުންގެ މީޑިއާއިން ބުނީ ޝަފީއު ހޯދުމުގެ މަސައްކަތް ހުއްޓާނުލައި މިހާރުވެސް ކުރަމުންދާ ކަމަށެވެ.
"ރާއްޖެއެމްވީ"އަށް މައުލޫމާތު ދިން ފުވައްމުލަކު މީހަކު ބުނީ ޝަފީއު ހޯދުމުގެ މަސައްކަތް އެރަށު ރައްޔިތުންނާއި ފުލުހުން ކުރިއަށް ގެންދިޔަ ނަމަވެސް މިއަދާ ހަމައަށް އޭނާ ފެނިފައިނުވާ ކަމަށެވެ. އަދި ރަށު ތެރޭގައި އޭނާ އުޅޭކަމަށް މިހާރު ގަބޫލު ނުކުރެވޭ ކަމަށްވެސް އޭނާ ބުންޏެވެ. މީގެ އިތުރުން އޭނާ ބުނީ ބޮޑަށް ބެލެވެނީ މޫދަށް އެރިއުޅުމުގެ ތެރޭގައި ހިނގި ހާދިސާއަކުން ގެއްލުނީ ކަމަށެވެ.
ނަމަވެސް ކަމާބެހޭ އިދާރާތަކުން ޝަފީއު ގެއްލިފައިވާކަން ފިޔަވާ އިތުރު ކަމެއް ހާމަކޮށްފައެއް ނުވެއެވެ.
ޝަފީއުގެ އާއިލާގެ މީހަކު ބުނީ ޝަފީއު އަކީ ސިކުނޑީގެ އުނިކަމެއް ހުރި މީހެއް ކަމަށް ބައެއް މީޑިއާތަކުގައި ހަބަރު ފަތުރާތީ އެކަމާ ހިތާމަ ކުރާ ކަމަށާއި އޭނާ އަކީ ސިކުނޑީގެ އެއްވެސް މައްސަލައެއް އުޅޭ މީހެއް ނޫން ކަމަށެވެ. އެހެން ނަމަވެސް ގެއްލުނު ދުވަސްކޮޅު ބަނޑުގަޔާއި ބޮލުގައި ރިއްސާތީ އުޅުނު ކަމަށްވެސް އޭނާ ބުންޏެވެ. ޝަފީއު ގެއްލުމުގެ ކުރިން އޭނާ ވަޒީފާ އަދާކުރަމުން ދިޔައީ އަންގާގާ ރިސޯޓުގައި ރޫމް އެޓެންޑެންޓެއްގެ ވަޒީފާއެވެ.
ޝަފީއު ގެއްލިގެން އޭނާގެ އާއިލާއިން ހޯދަން ފެށީ ޖުލައި މަހުގެ 14 ވަނަ ދުވަހުގެ ރޭ 11:30 އިން ފެށިގެންނެވެ. އޭނާގެ އަންބަކާއި ދަރިއަކު ދުނިޔޭގައި އެބަހުއްޓެވެ.
