އެމްޑީޕީގެ ލީޑަރޝިޕް އަދި ފޮރިން ރިލޭޝަންސް ކޮމިޓީގެ ވަފުދުން ރައީސް ޑރ. މުހައްމަދު މުޢިއްޒުގެ ވެރިކަމުގައި ގޯސްވަމުންދާ ސިޔާސީ ހާލަތާ ގުޅޭ ގޮތުން ޔޫރަޕިއަން ޔޫނިއަންގެ ޑިޕްލޮމެޓުންނާ މަޝްވަރާކުރައްވައިފި އެވެ.

އެމްޑީޕީގެ ޗެއަރޕާސަން ފައްޔާޟް އިސްމާޢީލް، ޕާޓީގެ ރައީސް އަބްދުﷲ ޝާހިދު، ރައްޔިތުންގެ މަޖިލީހުގެ މެމްބަރު މީކާއީލު ނަސީމް އަދި ފޮރިން ރިލޭޝަންސް ކޮމިޓީގެ މެންބަރު ޙުސައިން ޝަހީމް ހިމެނޭ ވަފުދެއް ބުރާސްފަތި ދުވަހު، ކޮލޮމްބޯގައި ޔޫރަޕިއަން ޔޫނިއަންގެ އެމްބެސެޑަރުންނާއި ރާއްޖެއަށް ކަނޑައަޅާފައިވާ ރެޕްރެޒެންޓެޓިވުންނާ ވަނީ ބައްދަލުކޮށްފަ އެވެ.

މި ބައްދަލުވުމުގައި ރައީސް މުޢިއްޒުގެ ވެރިކަމުގައި ރާއްޖޭގެ ސިޔާސީ އަދި ވެރިކަން ހިންގުމުގެ ހާލަތު ދަށަށް ދާކަމުގެ ކަންބޮޑުވުން ވަނީ ފާޅުކުރައްވާފަ އެވެ. މިގޮތުން މިނިވަން މުއައްސަސާތަކަށް ސަރުކާރުން ނުފޫޒު ފޯރުވަމުންދާކަމާއި، ކޮރަޕްޝަނާއި ވެރިކަން ނަހަމަ ގޮތުގައި ބޭނުން ކުރަމުންދާކަމުގެ ސީރިއަސް ތުހުމަތުތަކާއި، މީޑިއާ ކޮންޓްރޯލް ބިލް މެދުވެރިކޮށް ނޫސްވެރިކަމުގެ މިނިވަންކަމަށް އަރައިގަތުމާއި، ޚާރިޖީ އަދި އެތެރޭގެ ސިޔާސަތުތަކަށް ގެންނަމުންދާ ކުއްލި ބަދަލުތަކާ ބެހޭގޮތުން މަޝްވަރާކުރެވުނެވެ.

އެމްޑީޕީން ޔޫރަޕިއަން ޔޫނިއަންގެ ބޭފުޅުންނާއި ވަނީ، ރާއްޖޭގައި ޑިމޮކްރަސީ ޤާއިމްކުރުމަށް ކުރެވުނު ދިގު މަސައްކަތާއި، މިނިވަން މުއައްސަސާތަކާއި ނޫސްވެރިކަމުގެ މިނިވަންކަން ޤާނޫނީ ގޮތުން ކަށަވަރުކުރުމަށް ކުރެވުނު މަސައްކަތްތައް ހިއްސާކޮށްފަ އެވެ. އެމްޑީޕީގެ ޗެއަރޕާސަން ފައްޔާޟް އިސްމާޢީލް އަދި ޕާޓީގެ ރައީސް އަބްދުﷲ ޝާހިދު ފާހަގަކުރެއްވި ގޮތުގައި މި ޑިމޮކްރެޓިކް އުސޫލުތައް މިހާރު ވަނީ އެތައް އަހަރުތަކެއް ފަހަތަށް ޖެހިފައި ކަމަށެވެ.

ކޮންމެ އަހަރަކު ރާއްޖެއަށް ޔޫރަޕިއަން ޔޫނިއަންގެ ޤައުމުތަކުން އަންނަ 500،000 އަށްވުރެ ގިނަ ފަތުރުވެރިންނާއި، ރާއްޖެއާއި ޔޫރަޕިއަން ޔޫނިއަނާ ދެމެދު އޮތް ވަރުގަދަ އިޤްތިޞާދީ އަދި ޘަޤާފީ ގުޅުމަށް ރިޢާޔަތްކޮށް، ރާއްޖެ އަނެއްކާވެސް އަނިޔާވެރި ވެރިކަމަކަށް ބަދަލުވިޔަ ނުދިނުމަކީ ހުރިހާ ފަރާތްތަކެއްގެ މަސްލަހަތު އޮތް ކަމެއްކަން ވަނީ ފާހަގަކޮށްފަ އެވެ. އެމްޑީޕީން ވަނީ ރާއްޖޭގައި ޑިމޮކްރެޓިކް އަގުތައް ދެމެހެއްޓުމަށް ޔޫރަޕިއަން ޔޫނިއަންގެ ފަރާތުން ލިބެމުންދާ އެއްބާރުލުމަށް ޝުކުރު އަދާކޮށްފައެވެ.