އެމެރިކާގެ ރައީސް ކަމުގައި ހުންނެވި ޑޮނަލްޑް ޓްރަމްޕް، 2028 ވަނަ އަހަރުގެ ރިޔާސީ އިންތިޚާބު ނުބާއްވަފާނެ ކަމުގެ ބިރު އޮތް ކަމަށް، ކެލިފޯނިއާގެ ގަވަރުނަރު ގެވިން ނިއުސަން ވިދާޅުވެއްޖެ އެވެ.

އިދިކޮޅު ޑިމޮކްރަޓިކް ޕާޓީ އަށް ނިސްބަތްވާ ނިއުސަމް މިހެން ވިދާޅުވެފައި ވަނީ "ދަ ލޭޓް ޝޯ ވިތު ސްޓީފަން ކޯލްބަޓް" އަށް ދެއްވި އިންޓަވިޔުގަ އެވެ. އޭނާ ވިދާޅުވީ އަންނަ އަހަރުގެ މެދު ތެރޭގައި އޮންނަ މިޑް ޓާމް އިންތިޚާބު އަދި، އޭގެ ފަހުން 2028 ވަނަ އަހަރު އޮންނަ ރިޔާސީ އިންތިޚާބު ވެސް އޮޅުވާލުމަށް ޓްރަމްޕް މަސައްކަތް ކުރައްވާނެ ކަމަށެވެ.

އޭނާ ވިދާޅުވީ މިހާރު އެމެރިކާގައި ހިނގަމުން އަންނަ ކަންތައްތަކާ މެދު، އެ ޤައުމުގެ ރައްޔިތުން ވަރަށް ފުންކޮށް ވިސްނަން ޖެހޭ ކަމަށެވެ. އަދި އެކަންކަމާ މެދު ރައްޔިތުން އިތުރަށް ހޭލުންތެރިވާން ޖެހޭ ކަމުގައި ވެސް އޭނާ ވިދާޅުވި އެވެ. އެގޮތުން މިހާރު އޮތް ނުރައްކާތެރިކަމާ މެދު ވިސްނައިގެން ނުތިބެއްޖެ ނަމަ، 2028 ވަނަ އަހަރުގެ ރިޔާސީ އިންތިޚާބު ނޯންނާނެ ކަމުގެ ބިރު އޮތް ކަމުގައި ނިއުސަމް ވަނީ ވިދާޅުވެފަ އެވެ.

އެ އިންޓަވިޔުގައި ނިއުސަމް ވިދާޅުވެފައި ވަނީ، އެންމެ ފަހުން 2024 ވަނަ އަހަރު އޮތް ރިޔާސީ އިންތިޚާބުގައި ޑިމޮކްރަޓިކް ޕާޓީ އަށް ވަރަށް ބޮޑު ނާކާމިޔާބެއް ލިބިފައިވާ ކަމަށާއި، ނަމަވެސް އެކަމުން އަރައި ގަތުމުގެ ވަގުތު އަދި ފުރުސަތު އެ ޕާޓީ އަށް އޮތް ކަމަށެވެ. އޭނާ ވިދާޅުވީ މިވަގުތު ޑިމޮކްރަޓިކް ޕާޓީ އޮތީ ހައުސް އޮފް ރެޕްރެޒެންޓެޓިވްސްގެ މެޖޯރިޓީ އަނބުރާ ހޯދުމުގައި ވެސް ގޮންޖެހުން ތަކެއްގެ ތެރޭގައި ކަމަށެވެ.

އިތުރަށް އޭނާ ވިދާޅުވެފައި ވަނީ ޓްރަމްޕްގެ ވެރިކަމާ މެދު މިހާރު ގިނަ ބަޔަކު ތިބީ ވަރަށް ބޮޑަށް މާޔޫސްވެފައި ކަމަށެވެ. އަދި ގިނަ ބައެއްގެ ކަންބޮޑުވުންތައް ވެސް އޮތް ކަމަށާއި، އެމެރިކާ އަލުން އަނބުރާ ހޯދޭނެ ކަމުގެ ޝައްކުގައި ތިބި މީހުން ވެސް ވަރަށް ގިނަ ވެއްޖެ ކަމަށް ނިއުސަމް ވަނީ ވިދާޅުވެފަ އެވެ.

ޓްރަމްޕްގެ ޚުދުމުހުތާރު ވެރިކަން ސިފަ ކުރައްވަމުން ނިއުސަމް ވިދާޅުވެފައި ވަނީ، ހުރިހާ ދިމާލެއްގައި ވެސް ފެންނަން އޮތީ ޓްރަމްޕްގެ އަނިޔާވެރިކަމާއި، އޭނާގެ އުސޫލެއް ނެތް ސިޔާސަތުތައް ކަމަށެވެ. ޚާއްސަކޮށް ޓްރަމްޕްއާ ދެކޮޅަށް ވާހަކަ ދެއްކުމަށް ވެސް އެމެރިކާގައި ދަތިވެފައިވާ ކަމަށާއި، ހަގީގަތަކީ މުހިންމު އެއްޗަކަށް ނުވެ އޮތް ކަމުގައި އޭނާ ވިދާޅުވި އެވެ.

ނިއުސަމް އަކީ އެމެރިކާގެ ރައީށް ޓްރަމްޕް އާއި އޭނާގެ ސިޔާސަތު ތަކަށް ވަރަށް ބޮޑަށް ފާޑު ވިދާޅުވަމުން އަންނަ ފަރާތެކެވެ. ސިޔާސީ މަޝްރަހު ދިރާސާ ކުރާ ފަރާތްތަކުން ބުނެފައިވާ ގޮތުގައި، 2028 ވަނަ އަހަރު އޮންނަ ރިޔާސީ އިންތިޚާބުގައި ޑިމޮކްރަޓިކް ޕާޓީގެ ރިޔާސީ ޓިކެޓު ހޯދުމުގެ ޝައުޤުވެރިކަން ނިއުސަމްގެ އޮވެ އެވެ.