އިމިގްރޭޝަނުން އަންގާރަ ދުވަހުގެ ހަވީރު މާލޭގައި ކުރިއަށް ގެންދިޔަ ބޮޑު ރެއިޑެއްގައި 81 ބިދޭސީއަކު އެތަނުގެ ބެލުމުގެ ދަށަށް ގެންގޮސްފި އެވެ.

ގަވާއިދާ ހިލާފަށް ވިޔަފާރިކޮށް، ސައްހަ ވިސާއެއް ނެތި އުޅޭ ބިދޭސީންނަށް އަމާޒުކޮށް އަންގާރަ ދުވަހު ހަވީރު ހިންގި ދެ ގަޑިއިރުގެ އޮޕަރޭޝަނާ ބެހޭގޮތުން އިމިގްރޭޝަނުން ބުނި ގޮތުގައި މާލޭގެ 25 ސަރަހައްދެއްގައި ރެއިޑް ކުރިއަށް ގެންދިޔަ އެވެ. އެ ރެއިޑް ގައި ޖުމުލަ 463 ތަނެއް ބަލައިފާސްކޮށް، 932 ބިދޭސީން ޗެކްކޮށްފައިވާ ކަމަށް އިމިގްރޭޝަނުން ބުނެފައި ވެއެވެ.

މީގެ އިތުރުން ގަވާއިދާ ހިލާފަށް ބިދޭސީން ވިޔަފާރިކުރާ 10 ތަނެއްގެ މައުލޫމާތު ކަމާ ގުޅުން ހުރި އިދާރާތަކާ ވަނީ ހިއްސާކޮށްފައިވާ ކަމަށް ވެސް އިމިގްރޭޝަނު ބުނެ އެވެ. އަދި މި ރެއިޑް އޮޕްރޭޝަނުގައި 160 އިމިގްރޭޝަން އޮފިސަރުންނާއި 66 ފުލުހުން ބައިވެރިވެފައިވާކަމަށް ވެސް އިމިގްރޭޝަނުން ވަނީ ބުނެފަ އެވެ.

އިމިގްރޭޝަނުން މި ރެއިޑް ކުރިއަށް ގެންގޮސްފައި މި ވަނީ، ނުގަވައިދުން އުޅޭ ބިދޭސީންނާ ދެކޮޅަށް ބޮޑު އޮޕަރޭޝަނެއް ފަށާނެ ކަމަށް ރައީސް މުހައްމަދު މުއިއްޒު މިދިޔަ އާދީއްތަ ދުވަހުގެ ރޭ ވިދާޅުވެފައިވަނިކޮށެވެ.

ރައީސް ވިދާޅުވިގޮތުގައި މި ސަރުކާރުން ކުރި މަސައްކަތުން، ނުގަވައުދުން އުޅެމުން ދިޔަ 8،600 ބިދޭސީން މިހާތަނަށް ވަނީ ޑީޕޯޓުކޮށްފައެވެ. އަދި ކުރިއަށް އޮތް ތަނުގައި އިތުރު މައުލޫމާތު ހޯދައިގެން ގިނަ އަދަދެއްގެ މީހުން ޑީޕޯޓު ކުރާނެ ކަމަށް ވެސް ރައީސް ވިދާޅުވި އެވެ.

އިމިގްރޭޝަނުން ހޯމަ ދުވަހު ވެސް ރެއިޑެއް ކުރިއަށް ގެންގޮސް 24 ބިދޭސީއަކު އެތަނުގެ ބެލުމުގެ ދަށަށް ގެންގޮސްފައިވެ އެވެ.