ދުވާލަކު ހަތް ފްލައިޓް ޖައްސާ ކޫއްޑޫ އެއާޕޯޓުގައި ހުންނަ ކެފޭ ބަންދު ކޮށްފައި ހުންނަތާ މަހެއް
ކޫއްޑޫ އެއާޕޯޓުގައި ކެފޭ ހިންގަމުން އައީ ޓެކް ކޮންޓެލިއަން ހޯލްޑިންސް އިން
ކޫއްޑޫ އެއާޕޯޓުގައި ހިންގާ ކެފޭ ބަންދު ކޮށްފައި
ދުވާލެއްގެ މައްޗަށް ހަތް ފްލައިޓު ޖައްސާ، ގއ.ކޫއްޑޫ އެއާޕޯޓުގައި ހިންގަމުން އައި ކެފޭ ބަންދު ކޮށްފައި ހުންނަތާ މަސް ދުވަސް ވެއްޖެ އެވެ.
ކޫއްޑޫ އެއާޕޯޓުގައި ހިންގަމުން އައި ކެފޭ ބަންދު ކޮށްފައި ވަނީ، ހުސްވި އޯގަސްޓު މަހުން ފެށިގެންނެވެ. އޭގެ ފަހުން އެ ކެފޭ ހުސްކޮށްފައިވާއިރު، ކެފޭ ބަންދު ކުރުމުގެ ސަބަބުން އެއާޕޯޓަށް ދަތުރު ކުރާ ފަރާތްތަކާއި، އެއާޕޯޓުގައި މަސައްކަތް ކުރާ މުވައްޒަފުންނަށް ވެސް އެތައް ތަކުލީފެއް ޖެހޭ ކަމުގެ ޝަކުވާ ވަނީ ކޮށްފަ އެވެ.
ކޫއްޑޫ އެއާޕޯޓުގައި ކެފޭ ހިންގަމުން އައީ ޓެކް ކޮންޓެލިއަން ހޯލްޑިންސް އިންނެވެ. ކެފޭ ބަންދު ކުރުމާ ގުޅޭ ގޮތުން އެ ކުންފުނިން ބުނެފައި ވަނީ، ކެފޭ ބަންދު ކޮށްފައި ވަނީ ފައިދާ ނުވާތީ ކަމަށެވެ. އެގޮތުން ކެފޭ އިން ލިބޭ އާމްދަނީ އާއި، އެ ކެފޭ ހިންގުމަށް ދާ ޚަރަދާއި، އަދި އެތަނުގެ ކުއްޔަށް ބަލާއިރު އެތަން ނުހިންގޭތީ ބަންދު ކުރީ ކަމަށް އެ ކުންފުނިން ބުނެފައިވެ އެވެ.
ޓެކް ކޮންޓެލިއަން ކުންފުނިން ވަނީ ގާތް ގަނޑަކަށް ދެ އަހަރު ވަންދެން ކޫއްޑޫ އެއާޕޯޓުގެ ކެފޭ ހިންގައިފަ އެވެ. އެ ކުންފުނިން ބުނެފައި ވަނީ، އެ ކެފޭ ނުހިންގުނީ ކޫއްޑޫ އަށް އެކަން އެފޯޑު ނުކުރެވޭތީ ކަމަށެވެ. ކެފޭގެ ޚިދުމަތް ބޮޑަށް ދޭން ޖެހޭނީ މުވައްޒަފުންނަށްކަން ފާހަގަކޮށް އެ ކުންފުނިން ބުނެފައި ވަނީ، ކެފޭ ހިންގުމަށް ދިވެހި މުވައްޒަފުން ވެސް ނުލިބޭ ކަމަށެވެ.
ފަހުން ފަހުން އައިސް އެ ތަނުގެ ކުލި ދެއްކުމުގެ މައްސަލަތައް ވެސް ދިމާވެފައިވާ ކަމަށާއި، އެއްކޮށް ގެއްލުމުގައި ހިންގަން ޖެހުމުގެ ސަބަބުން ކެފޭ ބަންދު ކުރަން ޖެހުނީ ކަމުގައި ކުންފުނިން ވަނީ ފާހަގަ ކޮށްފަ އެވެ. އެ ކެފޭގެ ކުލީގެ ގޮތުގައި އެ ކުންފުނިން ދައްކަމުން ގެންދިޔައީ މަހަކު 1200 އެމެރިކާ ޑޮލަރެވެ.
ކެފޭ ހިންގުމަށް އެންމެ ފުރަތަމަ އެއްބަސްވުން ހަދާފައި އޮތީ ތިން އަހަރު ދުވަހަށް ކަމަށާއި، އޭގެ ފަހުން އެއްބަސްވުން އައު ކުރާ ގޮތަށް އޮތް ކަމަށް އެ ކުންފުނިން ބުންޏެވެ. އެއްބަސްވުމުގެ ވަކި ހިސާބަކުން ކުލި ބޮޑުވާ ގޮތަށް އޮތް ނަމަވެސް، ދެ އަހަރު ވަންދެން ކުލީގެ ގޮތުގައި ދައްކަން ޖެހެނީ 1200 އެމެރިކާ ޑޮލަރު ކަމަށް ވެސް ފާހަގަ ކޮށްފައިވެ އެވެ.
އެ ކެފޭ ބަންދު ކުރުމުގެ ސަބަބުން އެއާޕޯޓަށް އަންނަ ފަތުވެރިންނަށް ވެސް ބޮޑު ތަކުލީފެއް ކުރިމަތިވެފައިވާއިރު، އެ ކުންފުނިން ބުނެފައި ވަނީ އެ ކެފޭ އަކީ ފަތުވެރިންނަށް ޚިދުމަތް ދެވޭ ފެންވަރުގައި ޤާއިމު ކޮށްފައިވާ ކެފޭއެއް ނޫން ކަމަށެވެ. ނަމަވެސް، ކެފޭ ހިންގަމުން އަންނަ މިންވަރަކުން ތަރައްޤީ ކުރުމަށް އެއާޕޯޓާ އެކު އެއްބަސްވެފައި އޮތް ނަމަވެސް، އެކަމުގައި އެއާޕޯޓުގެ ފަރާތުން އެއްބާރުލުމެއް ނުލިބޭ ކަމަށް އެ ކުންފުނިން ވަނީ ފާހަގަ ކޮށްފަ އެވެ.
އެގޮތުން ކެފޭ ތަރައްޤީ ކޮށްފައި ނުވަނީ އަމިއްލަ ފައިސާ އިން ކުރަން ޖެހިފައިވާތީ ކަމަށާއި، ތަރައްޤީ ކުރި ނަމަ އިތުރު ގެއްލުމަކާ ކުރިމަތިލާން ޖެހުނީސް ކަމަށް ވެސް ކުންފުނިން ވަނީ ބުނެފަ އެވެ.
