ގއ. ކޫއްޑޫ ފަޅުގައި އޮތް ހުރިހާ މަސް ދޯންޏެއްގެ ހުރިހާ މަސްކިރާ ގޮތަށް ހަމަޖައްސާފައިވާކަމަށް ސަރުކާރުން ބުނެފިއެވެ.
މަސް ކިރުމުގައި ދިމާވަމުންދާ ދަތިތަކާއެކު ކޫއްޑޫގައި އަންގާރަ ދުވަހު އިހުތިޖާޖެއްކޮށްފައިވާއިރު ރައީސް އޮފީހުން އަންގާރަ ދުވަހުގެ ރޭ ނެރުނު ބަޔާނެއްގައި ބުނެފައިވަނީ މަސްނުކިރިގެން މަސްވެރިންގެ ހުރި ޝަކުވާތައް އަޑުއެހުމަށްފަހު ސަރުކާރާއި މިފްކޯގެ މަޝްވަރާގެ މަތިން މަސްވެރިންގެ ދަތިތަކަށް ހައްލު ހޯދުމަށްފަހު އަލުން މަސްކިރަން ފަށާފައިވާކަމަށެވެ. މިގޮތުން މަސްވެރިންނަށް އެއްބަސްވެވޭ ފަދަ ގޮތަކަށް ސަރުކާރުން ވަނީ އިމްޕްލިމެންޓޭޝަން ޕްލޭން އެއް ހަދާފައިކަމަށް ރައީސް އޮފީހުން ބުނެއެވެ.
މަސްވެރިންނަށް ކިއު އޯޑަރެއް ހަމަޖައްސައި އެ އޯޑަރާ އެއްގޮތަށް މަސްކިރޭނެ އިންތިޒާމުތައް ކޫއްޑޫގައި ސަރުކާރުން މިހާރު ހަމަޖައްސާފައިވާކަމަށް ސަރުކާރުން ބުނެއެވެ. މިޕްލޭންގެ ދަށުން މަސްކިރޭނެ ތަރުތީބާއި ދުވަސް މަސްވެރިންނަށް އަންގާފައިވާކަމަށްވެސް ސަރުކާރުން ވަނީ ބުނެފައެވެ.
ދެކުނުގެ މަސްވެރިކަން ރަނގަޅުވެ މިފްކޯގެ ކެޕޭސިޓީއަށްވުރެ ބާނާ މަސް ގިނަވުމުގެ ސަބަބުން އޭޕްރީލް 6ން ފެށިގެން ކޮންމެ ދޯންޏަކުން 5 ޓަނުގެ މަސް ކިރާ ގޮތަށް ވަނީ ހަމަޖައްސާފައެވެ. އެދުވަހުން ފެށިގެން މަސްވެރިން މިކަމުގައި ކަންބޮޑުވުންތައް ފާޅުކުރަމުންދާއިރު އަންގާރަ ދުވަހު ކޫއްޑޫގައި ބޮޑު ހަޅުތާލެއް ހިންގާފައިވަނީ ބައެއް މަސްވެރިން 5 ޓަނަށްވުރެ އިތުރަށް ކިރުމާއި ދެކޮޅު ހެދުމުގެ ސަބަބުން ކަމަށް ރާއްޖެއެމްވީ އާ ވާހަކަދެއްކި މަސްވެރިން ބުނެފައިވެއެވެ. ކޫއްޑޫގައި ހުރި މަސްވެރިއަކު ރާއްޖެއެމްވީއާއި ވާހަކަ ދައްކަމުން ބުނީ މަސްވެރިން އެދުނުގޮތަށް ލިމިޓެއްނެތި މަސް ކިރައިދޭން ފަށާފައިވަނިކޮށް އެއްބަޔަކު އެކަމަށް ހުރަސްއަޅާ މަސް ކިރުން ހުއްޓުވާލީކަމަށެވެ.
މައްސަލަ ހޫނުވެފައިވާއިރު ދާދިފަހުން ފިޝަރީޒް މިނިސްޓަރ ޑރ ހުސައިން ރަޝީދު ހަސަން ވެސް ވަނީ މަސްވެރިންގެ ކަންބޮޑުވުންތައް އަޑު އެއްސެވުމަށް ކޫއްޑޫއަށް ޒިޔާރަތްކުރައްވާ މަސްވެރިންނާއި ބައްދަލުކުރައްވާފައެވެ.
އަދި މި ކަމާއި ގުޅިގެން މިނިސްޓަރު ވިދާޅުވީ ދިމާވެފައިވާ ދަތިތަކަށް ހައްލު ގެނައުމަށް މަސްގަތުމަށް ވަގުތީ ގޮތުން ބޭރުގެ ބޯޓެއް ހޯދުމުގެ މަސައްކަތް މިފްކޯއިން ކުރަމުންދާކަމަށެވެ. ވަގުތީގޮތުން މަސްކިރުމުގެ މައްސަލަ ހައްލުކުރުމަށް މަސްފިނިކުރާ ބޮޑުއުޅަނދެއް ފެލިވަރުން ކޫއްޑޫއަށް ގެނެސްފައިވާނެ ކަމަށާއި، މަސްގަނެ ފިނިކޮށް ސްޓޯރ ކުރެވޭވަރު އިތުރު ކުރުމަށް މަސްގަންނަ ބާޖެއްވެސް މާންދޫގައި ބޭނުން ކުރަމުން އަންނަ ކަމަށެވެ. މިމައްސަލައަށް ޙައްލެއް ހޯދުމުގެ ގޮތުން މިފްކޯގެ ކެޕޭސިޓީ ފުރެންދެން މަސްވެރިންބާނާ މަސް ކިރޭނެ ކަމަށް މިފްކޯއިން ވަނީ އަންގާފައެވެ.
މިހާރު މާންދޫ ގައި 120 ޓަނު، ކޫއްޑޫ ގައި 240 ޓަނު، ޖަޒީރާ ގައި 120 ޓަނު، މަހާކަލަމިންޖާ ގައި 75 ޓަނު، އަދި ހުޅުމީދޫގައި 60 ޓަނުގެ ފުރީޒިންގ ކެޕޭސިޓީ އާއެކު ޖުމްލަ 615 މެޓްރިކް ޓަނު ބޭނުންކޮށްގެން މަސްގަނެވޭނެ އެންމެ ގިނަ އަދަދަކަށް އެތަންތަނުން މަސް ގަންނަމުންދާކަމަށް މިނިސްޓަރ ވިދާޅުވިއެވެ.
ދާދިފަހުން ރާއްޖެޓީވީގެ ފަލަސުރުޚީގެ ޕްރޮގްރާމްގައި ވާހަކަދައްކަވަމުން މިފްކޯގެ ސީއީއޯ އިސްމާއިލް ފައުޒީ ވިދާޅުވީ ކެޕޭސިޓީ އިތުރުނުކޮށް މަސްވެރިންނާއެކު ކުރިޔަށް ނުދެވޭނެކަމަށެވެ. އަދި މިހާރު ކުރިޔަށްދާ މަސްކާރު ޚާނާތަކުގެ މަސައްކަތް ނިމުމުން މިފްކޯގެ ފްރީޒިންގ ކެޕޭސިޓީ 1000 ޓަނާއި ހަމައަށް އަދި ސްޓޯރޭޖް ކެޕޭސިޓީ 13،000 ޓަނާ ހަމައަށް އިތުރުވެގެންދާނެކަމަށް ފައުޒީ ވިދާޅުވިއެވެ. މިދިޔަ އަހަރު މިފްކޯއިން ވަނީ 58،000 ޓަނުގެ މަސް ގަނެފައިކަމަށް ފައުޒީ ވިދާޅުވިއެވެ.
