ދިވެހި ދައުލަތަށް ނޭނގޭ ކަމަކީ، ކޫއްޑޫ އިންޓަރނޭޝަނަލް ޕޯޓެއްގެ މަސައްކަތް އެތާނގައި ހިނގާކަން - ސައުދު
27 ފެބުރުއަރީ 2023 | ހޯމަ 12:10ރާއްޖޭގައި ގާއިމް ކުރެވިފައި އޮތް މިވަރުގެ ބޮޑު ފެސިލިޓީ އެއް އެތާނގައި އޮއްވާ އެ ތަނަށް އިމްޕޯޓް ނުކުރުމުން ހުވަދު އަތޮޅަށް އިމްޕޯޓް ކުރުމުގެ ދޮރު ބަންދުވެފައިވޭ
ވިލިނގިލި ދާއިރާގެ މެންބަރު ސައުދު ހުސައިން
ދިވެހި ސަރުކާރާއި، ދައުލަތަށް ނޭނގޭ ކަމަކީ، ކޫއްޑޫ އިންޓަރނޭޝަނަލް ޕޯޓެއްގެ މަސައްކަތް އެތާނގައި ހިނގާކަން ކަމަށް ވިލިނގިލި ދާއިރާގެ މެންބަރު ސައުދު ހުސައިން ވިދާޅުވެއްޖެއެވެ.
ކުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއްލަޠީފް ހުށަހަޅުއްވާފައިވާ، ދިވެހިރާއްޖޭގައި ޤާއިމުކުރެވިފައިވާ ސަރަޙައްދީ ބަނދަރުތައް ބޭނުންކޮށްގެން ސަރަޙައްދީ ތަރައްޤީގެ ދުވެލި ހަލުވިކުރުމަށް ކުރަންޖެހޭ ކަންތައްތައް ދެނެގަނެ، އެ މަސައްކަތް ހަލުވިކުރުމަށް އެދި ގޮވާލައި ހުށަހަޅާ ޤަރާރަށް ބަހުސްކުރައްވަމުން މެންބަރު ސައުދު ވިދާޅުވީ ދިވެހިރާއްޖޭގެ މެރިޓައިމް ދާއިރާ ތަރައްޤީވަމުން ފުޅާވަމުންދާވަރަކަށް ދިވެހިރާއްޖޭގެ އިމްޕޯޓް އެކްސްޕޯޓް ފުޅާވަމުންދާ ކަމަށެވެ.
ސައުދު ވިދާޅުވީ ރާއްޖޭގެ ބަނދަރުތައް ލޮކޭޓް ކުރެވި ތަރައްޤީ ކުރެވެމުންދަނީ ފޯސްފުލް ޑިވެލޮޕްމަންޓެއްގެ ސިޔާސަތުގެ ތެރެއިން ކަމަށެވެ. އަސްލު ބަނދަރު ބޭނުންވަނީ ކޮންތަނަކަށްތޯ، ދުނިޔޭގައި ރާއްޖެ އިންޑިއާ ކަނޑުގެ މެދުގައި އޮންނައިރު، ރާއްޖޭގައި ބަނދަރުތައް ގާއިމް ކުރެވި، އެ ބަނދަރުތައް ރަނގަޅު ގޮތުގައި އޮޕަރޭޓް ކުރެވެނީ ކޮން ހިސާބެއްގައިތޯ މިއީ ވިސްނާލަންޖެހޭ ކަމެއް ކަމަށެވެ.
މެންބަރު ސައުދު ވިދާޅުވީ ރާއްޖޭގައި އެންމެ ބޮޑު އެކްސްޕޯޓް އޮޕަރޭޝަން ހިނގާ ބަނދަރަކީ، ގއ. ކޫއްޑޫގައި ގާއިމް ކުރެވިފައި އޮތް ކޫއްޑޫ އިންޓަރނޭޝަނަލް ޕޯޓުގައި ކަމަށެވެ. ދިވެހި ސަރުކާރަށް ދިވެހި ދައުލަތަށް ނޭނގޭ ކަމަކީ، ކޫއްޑޫ އިންޓަރނޭޝަނަލް ޕޯޓެއްގެ މަސައްކަތް އެތާނގައި ހިނގާކަމެވެ. އަދި މި ނިމިގެން މިދިޔަ 2022 ވަނަ އަހަރު 53 ހާސް މެޓްރިކްޓަނުގެ މަސް އެ ޕޯޓުން އިންޓަރނޭޝަނަލް އެކްސްޕޯޓް ކެރިއަރު ބޯޓުފަހަރު، 20 ބޯޓަށް ލޯޑް ކޮށްގެން ޑައިރެކްޓް ކޫއްޑޫން ތައިލެންޑަށް ފުރާފައިވާ ކަމަށެވެ.
މެންބަރު ސައުދު ވިދާޅުވީ އިމްޕޯޓް އޮޕަރޭޝަން އިމްޕޯޓް ކުރުމަކީ އެ ޕޯޓަށް މަނާ ކަމެކެވެ. އެތަނަށް އިމްޕޯޓް ނުކުރެވެންވީ ކިއްވެގެންތޯ މެންބަރު ސުވާލު އުފެއްދެވިއެވެ. އައި.އެސް.ޕީ.އެސް ކޯޑަށް ޢަމަލުކުރާ، ބައިނަލްއަގުވާމީ ސްޓޭންޑަޑަށް ބަލަހައްޓާ ޕޯޓަށް އިމްޕޯޓެއްނުކުރެވޭ ކަމަށާއި، ހަމައެކަނި އެކްސްޕޯޓް ކުރެވޭ ކަމަށެވެ. އެހެންކަމުން ސިޔާސަތު ތަކުގައި މައްސަލަ އެބަހުރި ކަމަށާއި، ރާއްޖޭގައި ގާއިމް ކުރެވިފައި އޮތް މިވަރުގެ ބޮޑު ފެސިލިޓީ އެއް އެތާނގައި އޮއްވާ އެ ތަނަށް އިމްޕޯޓް ނުކުރުމުން ހުވަދު އަތޮޅަށް އިމްޕޯޓް ކުރުމުގެ ދޮރު ބަންދުވެފައިވާ ކަމަށެވެ.
ސައުދު ވިދާޅުވީ ވިޔަފާރިވެރިން ތިބީ އަތްފައި ބަނދެވިފައި ކަމަށެވެ. ވިޔަފާރިކޮށްލެވޭނެ މަގުތައް ތަނަވަސްވެފައި ނެތް ކަމަށާއި، އެފަދަ ޕޯޓުތަކުގެ ވަސީލަތްތައް ރަނގަޅު ގޮތުގައި ބޭނުންކުރެވިއްޖެއްޔާ ހަމަ ޔަގީނުން ވެސް ހުވަދު އަތޮޅު މާޒީއެއް އިއާދަވެ، ކުރީގަ އެ ހުރި މިންވަރުގައި ވިޔަފާރިތައް އުފެދި ފުޅާވެގެން ރާއްޖޭން ބޭރުން މުދާ އިމްޕޯޓް ކޮށްގެން ސަރަޙައްދީ ލެވަލްގައި ވިޔަފާރި ފުޅާވެގެންދާނެކަމާ މެދު އެއްވެސް ޝައްކެއް ނެތް ކަމަށެވެ.
