މަސް ގަންނަ އަގު ބޮޑުކުރުމަށް ވެލިއުއެޑެޑް އުފެއްދުންތައް އިތުރު މާކެޓްތަކަށް ފުޅާ ކުރަނީ
ކެޕޭސިޓީ އިތުރުވުމުން ވެލިއުއެޑެޑް އުފެއްދުންތައް ގިނަ މާކެޓްތަކަށް ފޮނުވޭނެ
ފެލިވަރު މަސް ފެކްޓަރީ
މިފްކޯއިން މަސްވެރިންގެ އަތުން ގަންނަ މަސް އަގުބޮޑުކޮށް ގަތުމަށްޓަކައި ކެޕޭސިޓީ އިތުރުކޮށް ވެލިއުއެޑެޑް އުފެއްދުންތައް އިތުރު މާކެޓްތަކަށް ފުޅާކުރުމުގެ މަސައްކަތް ފަށަން ތައްޔާރުވަމުން އަންނަ ކަމަށް އެކުންފުނިން ބުނެފިއެވެ.
ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަދައްކަވަމުން މިފްކޯގެ މެނޭޖިންގ ޑިރެކްޓަރ އިސްމާއިލް ފައުޒީ ވިދާޅުވީ ފާއިތުވި 3 އަހަރު ދުނިޔޭގެ ބާޒާރުގައި މަހުގެ އަގު ހުރީ ދަށްކޮށް ކަމަށެވެ. ނަމަވެސް މަހުގެ އަގަކީ އެއް އިރެއްގައިވެސް އެއް ގޮތަކަށް ހިފެހެއްޓިފައި ހުންނަ އެއްޗެއް ނޫން ކަމަށެވެ. މިފްކޯއިން ބޮޑަށް ރޯމެޓީރިއަލް ބޭރު ކުރަމުންދާއިރު އިތުރު ގޮތްތައް ވެސް ހޯދުމުގެ މަސައްކަތް ކުރަމުން އަންނަ ކަމަށް ފައުޒީ ވިދާޅުވިއެވެ.
ފައުޒީ ވިދާޅުވީ ރައީސް ވިދާޅުވެފައިވަނީ ދުނިޔޭގެ ބާޒާރުގައި މަހުގެ އަގު ހުންނަ ގޮތަށް ބަލާފައި މިފްކޯގެ މަހުގެ އަގުވެސް ބަދަލުކުރަމުން ދިޔުމަށް ކަމަށެވެ. އަދި 2020 ވަނަ އަހަރު ސެޕްޓެމްބަރ 25 ވަނަ ދުވަހު ކޮވިޑާއެކު މަހުގެ އަގު 16 ރުފިޔާއަށް ބަދަލުކޮށް ގަންނަމުން ދިޔަ ކަމަށާއި، ނަމަވެސް މިއަހަރުގެ މާޗް މަހުގެ ފުރަތަމަ ހަފްތާގައި މަހުގެ އަގު ރިވިއުކޮށް އަގަށް ބަދަލު ގެނެސްގެން ދެން މަސް ގަންނަމުންދާނީ އެގޮތުގެ މަތިން ކަމަށެވެ.
ފައުޒީ ވިދާޅުވީ މަހުގެ އަގަކީ ފިކްސްޑް އަގެއް ނޫން ކަމަށެވެ. އަދި ކުރީ ސަރުކާރުން ވަކި އަގެއް ކަނޑައަޅައިގެން މަސް ގަތުމުގެ ސަބަބުން މިފްކޯގެ ތަރައްޤީއަށް ގޮންޖެހުންތަކެއް ދިމާވި ކަމަށެވެ. މިކަމުގެ ސަބަބުން ރިޕެއަރ އަދި މެއިންޓެނެންސާއި މުވައްޒަފުންގެ ކުރިއެރުމަށް ވެސް ހުރަސްތަކެއް ހުރި ކަމަށެވެ. ނަމަވެސް ދެން ކުރިއަށްދާނީ މަހުގެ އަގު ފްލޯޓްކޮށްގެން ދުނިޔޭގެ ބާޒާރުގައި މަހުގެ އަގު ހުންނަ ގޮތަކަށް ބަލާފައި ކަމަށް ފައުޒީ ވިދާޅުވިއެވެ. މިކަމުގެ ސަބަބުން މަސްވެރިންނަށް މިހާރަށްވުރެ ރަނގަޅު އަގެއް ލިބިގެންދާނެ ކަމަށެވެ. އަދި ކުރިއަށް އޮތްތަނުގައި މަހުގެ އަގަށް ވެލިއު އެޑްކޮށްގެން ދުނިޔޭގެ ބާޒާރުތަކުގައި މާކެޓްކޮށްގެން އަގު ހޯދުމަށް ސަރުކާރާއި މިފްކޯއިން މަސައްކަތް ކުރަމުންދާ އިރު، މިހާރު ހުރި ކެޕޭސިޓީ ދެގުނަކުރުމަށްފަހު ވެލިއުއެޑްކުރުމުން މިފްކޯއިން ގަންނަ މަހުގެ އަގު ބޮޑުވެގެންދާނެ ކަމަށެވެ. މިފްކޯއިން މި ކުރާ މަސައްކަތާއެކު ފެލިވަރުގެ ކެޕޭސިޓީ އިތުރުވުމުން އެމަސައްކަތް ކުރުމަށް ފަސޭހަވެގެންދާނެ ކަމަށްވެސް ފައުޒީ ވިދާޅުވިއެވެ.
ފައުޒީ ވިދާޅުވީ މިދިޔަ އަހަރަކީ ވެސް މަސްވެރިކަމުގެ ދާއިރާއިން ފާހަގަކޮށްލެވުނު އަހަރެއް ކަމަށެވެ. މަސް ގަނެވުނު އަދަދަށް ބަލާކަމުގައިވާނަމަ ފާއިތުވި 3 އަހަރުގެ ތެރޭގައި ވެސް ފާހަގަކޮށްލެވުނު އަހަރެއް ކަމަށާއި، މަސްގަނެވުނު އަދަދު 58 ހާސް ޓަނާއި ހަމައަށް ގެންދެވުނު ކަމަށެވެ. އަދި މިފްކޯގައި ހުރި ވަސީލަތްތައް އިތުރަށް ތަރައްޤީކުރަން ޕްލޭން އެބައޮތް ކަމަށާއި، ސަރުކާރުގެ ތަސައްވުރެއް ވެސް މިކަމުގައި އެބަ އޮތް ކަމަށް ފައުޒީ ވިދާޅުވިއެވެ.
މިފްކޯގެ ކެޕޭސިޓީއާއި ގުޅޭގޮތުން ފައުޒީ ވިދާޅުވީ އަދިވެސް ގޮންޖެހުން ބޮޑު ކަމަށެވެ. މިހާރު މަސްވެރިކަމަށް ނުކުންނަ އުޅަނދުފަހަރުން ސީޒަނެއްގައި ގެންނަ އަދަދު އިތުރުވާ ކަމަށާއި، ދުވާލަކަށް 700 ޓަނު މިފްކޯއަށް ގަންނަ ކަމަށެވެ. އަދި މިހާރު ހުރި ކެޕޭސިޓީއަށް ބަލާކަމުގައިވާނަމަ މިހާރުގެ ޖީލުގެ މަސްވެރިކަމަށް އަމާޒުކޮށްގެން ކެޕޭސިޓީ އިތުރުކުރަން ޖެހޭ ކަމަށެވެ. ސަރުކާރުގެ ޕްލޭނާއެކު ފައިނޭންސް ހޯދާފައި އަމަލީ މަސައްކަތަށް ނުކުމެވިއްޖެ ކަމަށާއި، ގޮންޖެހުމާއެކު ކުރިއަށް ނުކުމެ މިފްކޯއިން މަސްވެރިންނަށް ރަނގަޅު ގޮތްގޮތް ހޯދުމަށް މަސައްކަތް ކުރަމުންދާ ކަމަށްވެސް ފައުޒީ ވިދާޅުވިއެވެ.
މިފްކޯ ވަކި ކުންފުންޏެއްގެ ގޮތުގައި ހިންގުމާއި ގުޅޭގޮތުން ފައުޒީ ވިދާޅުވީ ފިނޭންސް މިނިސްޓްރީއާއި، އެސްޓީއޯއާއި ދެމެދު ކުރަންޖެހޭ ކަންކަން މިހާރު ކުރަމުން އަންނަ ކަމަށެވެ. އަދި މިފްކޯ ވަކި ކުންފުންޏެއްގެ ގޮތުގައި ހިންގަން ފެށުމުން، މިފްކޯއަށް ވަރަށް ގިނަ ފަސޭހަތަކެއް ހުންނާނެ ކަމަށާއި، ރިސޯސްގެ ގޮތުން ބަލާނަމަވެސް މިފްކޯ އަކީ ކުޑަ ކުންފުންޏެއް ނޫން ކަމަށެވެ. އަދި މިއާއެކު ސަރުކާރުގެ މަސްވެރިކަމުގެ ޕޮލިސީތައް ތަންފީޒުކުރަން ފަސޭހަވެގެންދާނެ ކަމަށްވެސް ފައުޒީ ވިދާޅުވިއެވެ.
