ޖޫން މަހާ ހަމައަށް ދާއިރު ކޫއްޑޫގެ ކެޕޭސިޓީ ޑަބަލް ކުރެވޭނެ - ފައުޒީ
18 ޑިސެމްބަރު 2022 | އާދީއްތަ 16:51ކޫއްޑޫގައި އިތުރު 1250 ކޮންޓެއިނަރުގެ އޮޕަރޭޝަން ފަށައިގަނެވޭނެ
މަސްވެރިން ކޫއްޑޫއަށް މަސްކިރަނީ
އަންނަ އަހަރުގެ ޖޫން މަހަށް ކޫއްޑޫގެ ކެޕޭސިޓީ ދެގުނަ ކުރެވިގެންދާނެ ކަމަށް, މިފްކޯގެ ސީއީއޯ އިސްމާއީލް ފައުޒީ ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަފުޅުދައްކަވަމުން ފައުޒީ ވިދާޅުވީ، ކޫއްޑޫގެ ކެޕޭސިޓީ އިތުރުކުރުމުގެ މަސައްކަތް ފަށާފައިވާކަމަށާއި، ކޫއްޑޫގެ ކޯލްޑް ސްޓޯރޭޖަށް ދިމާވެފައިވާ ދަތިތަކަށް ހައްލު ހޯދުމަށް އެސްޓީއޯއާއެކު މަސައްކަތްތަކެއް ފަށާފައިވާކަމަށެވެ.
އެގޮތުން ރީފަރ ކޮންޓެއިނަރ އޮޕަރޭޝަން ފެށުމަށް މަސައްކަތްކުރަމުން ދާކަމަށާއި، އޭގެ ބޭނުމަކީ އިތުރު މާކެޓްތަކަށް ވާސިލްވުން ކަމަށާއި، ބަލްކް ކެރިއަރުގައި އިތުރު މާކެޓްތަކަށް ރިފަރ ކޮންޓެއިނަރުގެ އޮޕަރޭޝަންތައް، އެސްޓީއޯގެ ސަބްސިޑަރީ ކުންފުނި، މޯލްޑިވްސް ސްޓޭޓް ޝިޕިންގއާއެކު ފެށުމުން، ކުރިއަށް ގެންދެވޭނެ ކަމަށެވެ.
ފައުޒީ ވިދާޅުވީ އިތުރު މާކެޓްތަކަށް ފޮނުވުމަށް ގޮންޖެހުންތަކާ ދިމާވާ ކަމަށާއި، މިހާރު ކުރަނީ މާލެއިން ކޮންޓެއިނަރ ގެނެސްގެން، މާލެއަށް އަނބުރާ އެ ފޮނުވައިގެން މަސް އެކްސްޕޯޓް ކުރުމުގެ މަސައްކަތް ކަމަށެވެ.
މަސްވެރިންގެ އަތުން ގަންނަ މަސް އެކްސްޕޯޓްކޮށް، މަސްވެރިން ބާނާ ހުރިހާ މަހެއް ގަނެވޭނެ އިންތިޒާމް ހަމަޖެއްސުމަށްޓަކައި ކޫއްޑޫގެ ސްޓޯރޭޖް ކެޕޭސިޓީ 4000 މެޓްރިކް ޓަނަށް ބޮޑުކުރުމުގެ މަސައްކަތް ދަނީ ކުރެވެމުންނެވެ. ކޫއްޑޫގައި މިހާރު ހުރި ބްރައިން ފްރީޒިންގ ކެޕޭސިޓީ 120 ޓަނަށް އިތުރުކުރުމުގެ މަސައްކަތް މިހާރު އަންނަނީ ކުރެވެމުންނެވެ. އަދި 1250 މެޓްރިކް ޓަނު ރައްކާކުރެވޭ ރީފަރ ކޮންޓެއިނަރ ޔާޑެއް ކޫއްޑޫގައި ގާއިމުކުރުމުގެ މަސައްކަތްވެސް ފެށިގެން ކުރިއަށް އެބަދެއެވެ.
މިހާރު ކޫއްޑޫގައި ހުރި ބްރައިން ފްރީޒިންގެ އެފިޝަންސީ އިތުރުކޮށް، އިތުރު 60 ޓަނާ 80 ޓަނާ ދެމެދުގެ ޢަދަދަކަށް މަސް ރައްކާކުރެވޭގޮތް މިހާރުވަނީ ހެދިފައެވެ. އޭގެއިތުރުން، ތިނަދޫގައި ގާއިމުކުރާ 120 މެޓްރިކް ޓަނުގެ ބްރައިން ފްރީޒިންގއާއި، 1000 ޓަނުގެ ކޯލްޑް ސްޓޯރޭޖްގެ މަސައްކަތް ޖެނުއަރީ މަހުގެ ތެރޭގައި ފެށޭނެއެވެ.
މަސްކިރުމުގެ ދަތިކަމަށް ވަގުތީ ހައްލެއް ހޯދުމަށް މަސް ގަންނަ ތިން ބޯޓު ގަނެ، ރާއްޖެ ގެނައުމުގެ މަސައްކަތް ކުރެވެމުން އެބަދެއެވެ. އަދި ހަތަރު ވަނަ ބޯޓެއް ގަތުމުގެ އެގްރީމެންޓް ކުރެވި، އެ ބޯޓުވެސް ލަސްތަކެއްނުވެ ގެނައުމުގެ މަސައްކަތް ފެށިގެންދާނެއެވެ. މި ހަތަރު ބޯޓުގައި 730 ޓަނުގެ ސްޓޯރޭޖް ކެޕޭސިޓީއާއި، 300 ޓަނުގެ ބްރައިން ފްރީޒިންގ ކެޕޭސިޓީ ހުންނާނެއެވެ.
