މީޑިއާ ކޮންޓްރޯލް ގާނޫނު ތަސްދީކުރީ ދޮގުހެދުމާއި ފަސާދަ ނައްތާލަން ކަމަށް ރައީސް މުއިއްޒު ވިދާޅުވެފައިވާ ކަމަށާއި ރައީސް އެ ވިދާޅުވި ހުރިހާ ވާހަކައެއް ވެސް ރައްދުވަނީ ޚުދު އެމަނިކުފާނަށް ކަމަށް އެމްޑީޕީގެ ގައުމީ މަޖިލިސް މެމްބަރު ހުސެއިން ހަސަން ވިދާޅުވެއްޖެ އެވެ.

ރާއްޖެ ޓީވީގެ ފަށާއިރު ޕްރޮގްރާމުގައި ވާހަކަދައްވަމުން ހުސެއިން ވިދާޅުވީ ރައްޔިތުން އަބަދުވެސް ތިބޭނީ ތެދަށް، ހައްގަށް ވަކާލާތު ކޮށް މަސައްކަތް ކުރައްވާ ބޭފުޅުންނާއި އެކުގައި ކަމަށާއި ތެދު ހާމަކުރުމަށްޓަކައި ސަރުކާރުން އެ ހިންގާ ލާންއިންސާނީ އަމަލުތައް ކަމުގައިވާ ފަސާދައާއި ކޮރަޕްޝަންގެ ވާހަތަށް ގެނެސްދޭކަމުގައިވާ ނަމަ އެއީ ރައްޔިތުން ތިބި ފަޅި ކަމަށެވެ.

ހުސެއިން ވިދާޅުވީ ރައްޔިތުންނާއި ހަމައަށް ތެދާއި ކޮރަޕްޝަނުގެ ވާހަތަށް ގެނެސްދީގެން އަނިޔާކުރިޔަސް އަދި ކޮންމެ ފުރައްސާރައެއް ކުރިޔަސް އަދި ޖަލު ގޮޅީގައި އޮންނަން ޖެހުނަސް އެއްވެސް ފަރުވާލެއް ނެތްކަމަށެވެ.

އަދި މިއަދު ދައުލަތް ހިނގާ ގޮތުން ދިވެހި ރައްޔިތުން ތިބީ ސަރުކާރުން ކުރާ ވައްކަމާއި ހިންގާ ކޮރަޕްޝަނުގެ ވާހަތަކާއި ތެދު މައުލޫމާތުތަކަށް ފެންބޮވައިގެންފައި ކަމަށް ވެސް ހުސެއިން ވިދާޅުވި އެވެ.

ހުސެއިން ވަނީ ސަރުކާރުގެ ވައްކަންތަކާއި ކޮރަޕްޝަނުގެ އަމަލުތައް ރައްޔިތުންނަށް ގެނެސް ދިނުމުގައި ނޫސް ވެރިން ފިސާރި ކެރިގެން ތިބުމަށް ގޮވާލާފަ އެވެ.

ހުސެއިން ވިދާޅުވީ ނޫސްވެރިން ސަރުކާރުގެ އެއްވެސް ކަމަކަށް ފުރައްސާރަ ނުކުރާ ކަމަށާއި ނޫސްވެރިންނަށް ފުރައްސާރަ ކުރަނީ މި ސަރުކާރުން ކަމަށެވެ.

މީޑިއާ ކޮންޓްރޯލް ގާނޫނު ތަސްދީގުކުރީ މުޖުތަމައުގައި ދޮގު ވާހަތަކާއި ފިތުނަ ފަސާދަ ފެތުރޭތީ އެކަންތައް ނައްތާލުމަށް ކަމަށް ރައީސް ވިދާޅުވި ވިދާޅުވުމަށް ރައްދު ދެއްވައި ހުސެއިން ވިދާޅުވީ ރައީސް އެ ދައްކަވަނީ ޚުދު އެމަނިކުފާނުގެ ވާހަ ކަމަށާއި އެ ހުރިހާ ވާހަކައެއް ވެސް ރައްދުވަނީ ޚުދު އެމަނިކުފާނަށް ކަމަށެވެ.

އެގޮތުން ވެރިކަމަށް އައުމަށް ފަހުގައި ވެވަޑައިގެންނެވި ގިނަ ވައުދުތަކެއް ނުފުއްދަވާ ހުރުމަނީ ވެސް އެމަނިކުފާނު ދޮގުހައްދަވާފައިވާ ކަމުގެ ހެއްކެއް ކަމަށް ވެސް ހުސއިން ވިދާޅުވި އެވެ.