ކުރިން 2024 ގައި ހިއްކައި ނިމޭނެ ކަމަށް ބުނި ފެލިދޫގެ ބިން އެތާރީހަށް ނުނިމި އަނެއްކާ މުޢިއްޒުގެ އައު ވައުދެއް!
ރައީސް މުޢިއްޒު ފެލިދޫގައި 12 ހެކްޓަރުގެ ބިމެއް 2026 ވަނަ އަހަރުގެ ކުރީކޮޅު ހިއްކައި ނިންމައިދޭނެ ކަމަށް ވަޢުދުވެލެއްވި
ރައީސް މުއިއްޒު ފެލިދޫ ރައްޔިތުންނާއި ބައްދަލުކުރެއްވުން
ވ. ފެލިދޫގެ ލޭންޑް ޔޫސް ޕްލޭންގައި އޮތް ވަރަށް ހިއްކައި ނިމޭނެ ކަމަށް ވިދާޅުވި ބިން 2024 ވަނަ އަހަރު ނުފެށި އަނެއްކާ 2026 ވަނަ އަހަރުގެ ކުރީކޮޅު 12 ހެކްޓަރުގެ ބިމެއް ހިއްކައި ނިންމައިދޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެ ރަށުގެ ރައްޔިތުންނަށް ވައުދުވެވަޑައިގެންފި އެވެ.
2024 ވަނަ އަހރުގެ މާޗު މަހުގެ 6 ވަނަ ދުވަހު ފުލިދޫގެ ރައްޔިތުންނާއި ބައްދަލުކުރައްވާ ރައީސް މުޢިއްޒު ވިދާޅުވީ، ވ. ފެލިދޫގެ ބިން ހިއްކުމުގެ މަސައްކަތް ފަށައި، 2024 ވަނަ އަހަރުގެ ތެރޭ އެ މަސައްކަތް ނިންމޭނެ ކަމަށެވެ. އެހެން ނަމަވެސް ފެލިދޫގެ ބިން ހިއްކުމުގެ މަޝްރޫއު މިއަދާއި ހަމައަށް ވެސް ފެށިފައި ނުވެ އެވެ.
" މި މަޝްރޫއު މި ރަށުގެ ފަޅުތެރެއިން ޖާގަ އޮތް މިންވަރަކުން ހިއްކޭނެ އެންމެ ބޮޑަކަށް މިހާރު ލޭންޑް ޔޫސް ޕްލޭންގަ ހިމަނާފަ އޮތް ވަރަށް އިރާދަކުރެއްވިއްޔާ ހިއްކަދޭނެ ކަމަށް އަޅުގަނޑު ހަމަ ޔަގީންކަން ދެން. އެހެންވީމަ ކައުންސިލާއި މިނިސްޓްރީއާ ގުޅިގެން މިދެންނެވި މަސައްކަތްތައް ކުރިއަށް ގެންދެވީމަ އަޅުގަނޑުމެން ބަޔަކު ހޯދައިގެން މަސައްކަތް ފަށާނަން.ރައީސް ޑރ. މުޙައްމަދު މުޢިއްޒު - (2024 ވަނަ އަހަރުގެ މާޗު މަހުގެ 6 ވަނަ ދުވަހު)
އޭގެ ފަހުން ހުކުރު ދުވަހު ވ. އަތޮޅުގެ ރަށްތަކަށް ރައީސް ކުރައްވަމުންގެންދަވާ ދަތުރުފުޅުގެ ތެރެއިން ފެލިދުއަށް ވަޑައިގެން އެރަށު ރައްޔިތުންނާއި ބައްދަލުކުރައްވާ އަނެއްކާވެސް އެ ރަށުގެ ބިން ހިއްކުމުގެ މަޝްރޫއު އަންނަ އަހަރުގެ ކުރީކޮޅު ނިންމާނެ ކަމަށް ރައިސް ވަނީ ވިދާޅުވެފަ އެވެ.
ރައީސް ވިދާޅުވީ ވ. ފެލިދޫ ބިން ހިއްކުމުގެ މަޝްރޫއުގެ ދަށުން 2026 ވަނަ އަހަރުގެ ބަޖެޓުގެ ތެރެއިން އެ އަހަރުގެ ކުރީކޮޅު 12 ހެކްޓަރުގެ ބިން ހިއްކައިދޭނެ ކަމަށެވެ. އަދި އޭގެ ނަތީޖާ އަކަށް ވާނީ ރަށުގެ އެކިއެކި ބޭނުންތަކަށް ބޭނުންވާ ބިން އިތުރުވެގެން ދިއުން ކަމަށް ރައީސް ވިދާޅުވި އެވެ.
މި ދަތުރުގައި މިރަށުގެ މަޝްރޫއުއެއް ނުއެއް ފެށޭ އެއީ އެކަމުގެ މަތިން އަޅުގނޑު ހަނދާން ނެތިގެން ވީ ކަމެއް ނޫން. މިއަހަރުގެ ބަޖެޓުގެ ތެރެއިން އަޅުގަނޑުމެންނަށް ތަރުތީބު ކޮށްލެވުނު އިރުގަ ސިއްހީ ދާއިރާ ތަރައްގީ ކޮށްދެއްވުމާއި އަދި ބައެއް އެހެން ކަންތައްތައް ކުރުމަށް އިސްކަން މި ދެވުނީ. ބިން ހިއްކުމުގެ މަޝްރޫއުގެ ދަށުން އިރާދަ ކުރެއްވިއްޔާ މިއަންނަ އަހަރުގެ ބަޖެޓުގެ ތެރެއިން އަހަރުގެ ކުރީކޮޅު އިރާދަކުރެއްވިއްޔާ 12 ހެކްޓަރުގެ ބިން މިރަށާއި ގުޅިގެން ހިއްކައިދޭނެ ކަމުގެ ޔަގީންކަން ތިބޭފުޅުންނަށް ދެން.ރައީސް ޑރ. މުހައްމަދު މުޢިއްޒު - ( 2025 ވަނަ އަހަރުގެ ސެޕްޓެމްބަރު މަހުގެ 19 ވަނަ ދުވަހު)
ރައީސް ވ. އަތޮޅުގެ ރައްތަކަށް ކުރައްވަމުން ގެންދަވާ ދަތުރުފުޅުގައި އެ އަތޮޅު ފުލިދޫގައިވެސް 12 ހެކްޓަރުގެ ބިން ހިއްކައިދޭން ވަނީ ވައުދުވެވަޑައިގެންފަ އެވެ. އަދި ބ. ދޮންފަނުގައި ދިމާވިފަދަ މައްސަލައެއް ދިމާވެދާނެތީ އެކަން ތަކުރާރު ނުކުރެއްވުމުގެ ގޮތުން ރައްޔިތުންގެ ފަރާތުން ކައުންސިލް މެދުވެރިކޮށް ސަރުކާރަށް ލިޔުމެއް ހުށަހެޅުމަށް ވެސް ރައީސް މުޢިއްޒު ވަނީ އެދިވަޑައިގެންފަ އެވެ.
