12 ހެކްޓަރުގެ ބިމެއް ހިއްކުމަށް ފުލިދޫ ރައްޔިތުންގެ ލިޔުމެއް ބޭނުންވާ ކަމަށް މުއިއްޒު ވިދާޅުވެއްޖެ
ރައީސް ވިދާޅުވީ މި މަސައްކަތް ކުރިއަށް ގެންދެވޭނީ މިހާރު އެރަށުގައި އެމްޓީސީސީން ކުރަމުންދާ ބަނދަރު ހެދުމުގެ މަޝްރޫއުގެ ތެރެއިން ކަމަށް
ރައީސް މުޢިއްޒު ވ ފުލިދޫ ރައްޔިތުންނާއި ބައްދަލުކުރެއްވުން
ވ. ފުލިދޫގެ ބިން ހިއްކުމުގެ މަޝްރޫއު ކުރިއަށް ގެންދިއުމުގެ ކުރިން، އެކަމަށް ރައްޔިތުން އެދޭކަން އަންގައިދޭ ލިޔުމެއް ބޭނުންވާނެ ކަމަށް ރައީސް މުހައްމަދު މުއިއްޒު ވިދާޅުވެއްޖެ އެވެ.
ވ. ފުލިދޫގައި 12 ހެކްޓާރުގެ ބިން ހިއްކަން ރައްޔިތުންގެ ގެ ލިޔުމެއް ކައުންސިލް މެދުވެރިކޮށް ސަރުކާރަށް ހުށަހަޅަން ރައީސް ވިދާޅުވީ ބ. ދޮންފަނުގައި ދިމާވިފަދަ މައްސަލައެއް ދިމާވެދާނެތީ އެކަން ތަކުރާރު ނުކުރައްވަން ކަމަށް ރައީސް ވިދާޅުވި އެވެ. ބ. ދޮންފަނުގައި ބިން ހިއްކުމުގެ މަޝްރޫއު ފައްޓަވަން އެއްބަސް ވުމުގައި ސޮއި ކޮށްފައިވަނިކޮށް އެރަށު ރައްޔިތުން އެކަން މިހާރު ބޭނުން ނުވާކަމަށް ބުނެ ރައީސް ވަނީ އެކްސް ގައި ޕޯސްޓެއް ކުރައްވާފަ އެވެ.
ރައީސްގެ އެ ނިންމެވުމާއި ގުޅިގެން ދޮންފަނު ކައުންސިލުން ވަނީ އެކަން ހަރުކަށި އިބާރާތުން ކުށްވެރި ކުރައްވާފަ އެވެ. އެ ކައުންސިލުން ބުނި ގޮތުގައި އެ ރަށު ރައްޔިތުން ބިން ހިއްކުމަށް ބޭނުންނުވާ ކަމަށް ވިދާޅުވެ މަޝްރޫޢު ހުއްޓާލައްވަން ނިންމަވާފައިވަނީ، ރައްޔިތުންނާއި ކައުންސިލާ އެއްވެސް މަޝްވަރާއެއް ކުރުމެއްނެތި އެވެ.
އޭގެ އިތުރުން ދޮންފަނު ކައުންސިލްގެ ރައީސް ވިދާޅުވިގޮތުގައި، ދޮންފަނު ރައްޔިތުން ބޭނުންވެގެން ވައުދުވި ބިން ހިއްކުމުގެ މަޝްރޫއު މިހާރު އެރަށު ރައްޔިތުން އެކަން ބޭނުން ނުވާކަމަށް ބުނެ ރައީސުލް ޖުމްހޫރިއްޔާ ހެއްދެވީ ސީދާ އިތުރުފުޅެއް ކަމަށެވެ. އަދި އެއްވެސް އިރެއްގައި ކައުންސިލުން ވެސް އަދި ރަށު ރައްޔިތުން ވެސް އެ މަޝްރޫއު ކުރިޔަށް ނުގެންދިއުމަށް ނުވަތަ ހުއްޓާލުމަށް އެދިފައެއް ނޯންނާނެ ކަމަށް ކައުންސިލް ގެ ރައީސް ވިދާޅުވި އެވެ.
ފުލިދޫގައި މިއަދު ބޭއްވި ރައްޔިތުންނާ ބައްދަލުކުރެއްވުމުގައި ވާހަކަފުޅު ދައްކަވަމުން، ރައީސް މުއިއްޒު ވިދާޅުވީ ރަށުގެ ބިން ހިއްކުމާ ދެކޮޅަށް ބަޔަކު މަސައްކަތްކޮށްފި ނަމަ، ރައްޔިތުންގެ އެދުން އެނގޭނެ ލިޔުމެއް އޮތުމަކީ މުހިންމު ކަމެއް ކަމަށެވެ.
އެހެން ބަޔަކު މި އަތޮޅު ތެރޭގައި މިސާލަކަށް ތިބޭފުޅުންގެ ރަށަށް ބޭނުންވާ ބިން ހިއްކުމާ ދެކޮޅަށް މަސައްކަތެއް ކޮށްފިއްޔާ އެކަމަށްޓަކައި ދެއްކެން އޮންނާނެ ލިޔުމަކަށް ވާނެ އެލިޔުން، އެހެންމަ ކައުންސިލް މެދުވެރިކޮށް ރައްޔިތުންގެ ބަސް ރައްޔިތުން ބޭނުންވާ ކަން މިކަން ކުރަން އިނގޭނެ ކަހަލަ ލިޔުމެއް ސަރުކާރަށް ފޮނުވައިދުނުމަކީ އަޅުގަނޑު ވަރަށް އެދޭ ކަމެއްރައީސް މުޢިއްޒު
ރައީސް ވިދާޅުވީ މި މަސައްކަތް ކުރިއަށް ގެންދެވޭނީ މިހާރު އެރަށުގައި އެމްޓީސީސީން ކުރަމުންދާ ބަނދަރު ހެދުމުގެ މަޝްރޫއުގެ ތެރެއިން ކަމަށް ރައީސް މުއިއްޒު ވިދާޅުވި އެވެ.
ދޮންފަނުގެ މައްސަލައިގައި ރައްޔިތުން ވަނީ ކައުންސިލް ދޮށުގައި މުޒާހަރާކޮށް، ހަނިފަރު ބޭ އަށް ފީނަން ދިޔަ ދޯނިފަހަރަށް ހުރަސްއަޅާފައެވެ. އަދި ބިން ހިއްކުމުގެ މަޝްރޫއު ވީހާވެސް އަވަހަށް ފެށުމަށް ގޮވާލާ ޕޯސްޓަރުތައް ހިފައިގެން އެ ސަރަހައްދުގައި ވަނީ މުޒާހަރާކޮށްފައެވެ.
