ނޫސްވެރިން ހުށަހެޅި ޕެޓިޝަންގެ މަސައްކަތް އަދިވެސް ނުފަށާ

މިނިވަން މީޑިއާ ނެތިކޮށްލުމަށް ސަރުކާރުން ހުށަހަޅާފައިވާ ބިލު ބޭރުކޮށްލުމަށް ގޮވާލައި ރައްޔިތުންގެ މަޖިލީހާއި ރައީސުލްޖުމްހޫރިއްޔާގެ އޮފީހަށް 151 ނޫސްވެރިންގެ ސޮޔާއެކު ޕެޓިޝަނެއް ހުށަހެޅި ނަމަވެސް މަޖިލީހުގެ ކޮމިޓީ އިން އެ މަސައްކަތް އަދިވެސް ނުފަށައެވެ.

ރާއްޖޭގައި ހަރަކާތްތެރިވާ 41 މީޑިއާއަކަށް ނިސްބަތްވާ ނޫސްވެރިންނާއި ފްރީލާންސް ނޫސްވެރިން ވަނީ ސޮއިކޮށްފައެވެ. މަޖިލީހަށް ހުށަހެޅި ޕެޓިޝަން ވައްދަން ސޮއިކުރީ ވެލިދޫ ދާއިރާގެ މެންބަރު މުހައްމަދު އައްބާސެވެ. އަދި ރައީސުލްޖުމްހޫރިއްޔާއަށް ހުށަހެޅި ޕެޓިޝަނުގައި ވަނީ އެ ބިލު މަޖިލީހުން ފާސްކުރި ނަމަވެސް ތަސްދީގު ނުކުރުމަށް ގޮވާލާފައެވެ. ޕެޓިޝަން މަޖިލީހަށް ހުށަހެޅީ މި މަހުގެ 3 ވަނަ ދުވަހުއެވެ.

ނަމަވެސް މިހާތަނަށް އައި އިރު، ޕެޓިޝަން ކޮމިޓީއިން މި ޕެޓިޝަންގެ މަސައްކަތެއް ކޮށްފައި ނުވެއެވެ. އެންމެ ފަހުން އެ ކޮމީޓީގެ ބައްދަލުވުމެއް އޮތީ 18 އޮގަސްޓް 2025 ގައެވެ. މައުލޫމާތު ލިބޭ ގޮތުގައި މަޖިލީހުގެ އިދާރާއިން ޕެޓިޝަން ކޮމިޓީއަށް އެ ޕެޓިޝަން ފޮނުވީ މިދިޔަ އަންގާރަ ދުވަހުއެވެ. އެއީ ޕެޓިޝަން ހުށަހެޅިތާ 7 ވަނައަށްވީ ދުވަހެވެ.

ޕެޓިޝަން ކޮމިޓީއިން ނޫސްވެރިން ހުށަހެޅި ޕެޓިޝަނުގެ މަސައްކަތް ނުފަށާ ލަސްކޮށްފައިވާއިރު އާދިއްތަ ދުވަހަށް މިވީ ކޮމިޓީގައި ޕެޓިޝަން އޮންނަތާ 6 ދުވަހެވެ. ޕެޓިޝަން ހުށަހެޅީ މީޑިއާތައް ކޮންޓްރޯލް ކުރާ ބިލު ބޭރުކޮށްލުމަށް ނަމަވެސް، އެ ބިލު ދިރާސާކުރާ މިނިވަން މުއައްސަސާތަކުގެ ކޮމިޓީން ބިލުގެ މަސައްކަތް ނިންމަން އޮތީ 15 ސެޕްޓެމްބަރުގެ ނިޔަލަށެވެ.

މިނިވަން މުއައްސަސާތަކުގެ ކޮމިޓީން މި ބިލު ދިރާސާކުރަމުން އަންނައިރު، ނޫސްވެރިން ވަނީ އެ ކޮމިޓީއަށް ހާޒިރުވެ ބިލު ބޭރުކޮށްލުމަށް އެދިފައެވެ. ބިލުގެ ސުންގަޑިއެއްގެ ގޮތުގައި ކަނޑައަޅާފައިވަނީ ސެޕްޓެމްބަރު 15 އެވެ. ނަމަވެސް ނޫސްވެރިންގެ މި ގޮވާލުމަށް ބީރުކަންފަތެއް ދެއްވައި، ބިލު ބޭރުކޮށްލަންޖެހޭ ސަބަބެއް ނެތްކަމަށް ބަންޑާރަ ނައިބު އަހުމަދު އުޝާމް ވަނީ އޮގަސްޓު 28 ގައި ވިދާޅުވެފައެވެ.

މި ބިލުގެ ދަށުން މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި އައު ކޮމިޝަނެއް އުފެދުމާއެކު، މިހާރުގެ މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވިގެންދާނެއެވެ. އައު ކޮމިޝަނުގައި ހިމެނޭ ހަތް މެންބަރުންގެ ތެރެއިން ތިން މެންބަރުންނަކީ ރައީސުލްޖުމްހޫރިއްޔާ އައްޔަންކުރާ މެންބަރުންނެވެ. އަދި ހަތަރު މެންބަރުންނަކީ މީޑިއާތަކުގެ ފަރާތުން އިންތިޚާބުކުރާ މެންބަރުންނެވެ.

ކޮމިޝަނުގެ މެންބަރުކަމަށް ކުރިމަތިލެވޭނީ ވުޖޫދުވިތާ ފަސް އަހަރުވެފައިވާ މީޑިއާތަކަށް އެކަނި ކަމަށް ބިލުގައި ބަޔާންކޮށްފައިވާއިރު، މީޑިއާ ރެގިއުލޭޓްކުރާ ކޮމިޝަނެއްގައި ރައީސުލްޖުމްހޫރިއްޔާ އައްޔަންކުރާ މެންބަރުން ތިބެންޖެހޭ ސަބަބެއް ބިލުގައި ބަޔާންކޮށްފައެއް ނުވެއެވެ. އަދި ކޮމިޝަނުގެ ރައީސް އައްޔަންކުރުމުގެ ބާރު ވެސް އޮންނާނީ ރައީސުލްޖުމްހޫރިއްޔާއަށެވެ.

މި ބިލަކީ މިނިވަން މީޑިއާއަށް ނުރައްކާވެދާނެ ބިލެއްކަމަށް ބުނެ، ރާއްޖޭގެ ނޫސްވެރިންނާއި ޖަމްއިއްޔާތަކުން އަދި ސިޔާސީ ޕާޓީތަކުން ދަނީ މި ބިލު ބޭރުކޮށްލުމަށް ގޮވާލަމުންނެވެ.