ގްރީން ޒޯންގައި ހެދި މީޑިއާ ފެންޑާ، އުސޫލާ ޚިލާފަށް ބޭނުންކުރަމުންދާ ކަމަށް ބުނެ ރައީސް އޮފީހުން އެތަން ބަންދުކޮށްފިއެވެ.

ރައީސް އޮފީހުން މީޑިއާ ފެންޑާ ބަންދުކޮށްފައިވަނީ އެތަން ބޭނުން ކުރަމުންދަނީ އުސޫލާއި ހިލާފަށް ކަމަށް ބުނެ އެވެ. ރައީސް އޮފީހުން ނެރުނު އިއުލާނުގައި ބުނީ، މީޑިއާ ފެންޑާއަކީ މިދިޔަ މެއި 29 ގައި ޤާއިމުކުރެވުނު، ރައީސުލްޖުމްހޫރިއްޔާގެ އޮފީހާއި އެ ސަރަޙައްދުގައި ހިމެނޭ ސަރުކާރު އޮފީސްތަކުގެ ޚަބަރާއި މަޢުލޫމާތު ހޯދުމަށް ނޫސްވެރިންނަށް ޚާއްސަކޮށްފައިވާ ތަނެކެވެ.

ނަމަވެސް، މީޑިއާ ފެންޑާ ބޭނުންކުރުމުގެ ހުއްދަ ނުހޯދާ ބަޔަކު އެތަނަށް ވަދެ، އުސޫލުތަކާ ޚިލާފު ޢަމަލުތައް ތަކުރާރުކޮށް ހިންގަމުން ގެންދާކަމަށް ރައީސް އޮފީހުން ތުހުމަތުކޮށްފައިވެއެވެ. މީގެ އިތުރުން، އެތަނުގައި ތިބެ ޚަބަރާއި މަޢުލޫމާތު ހޯދުމުގެ މަސައްކަތް ނުކުރެވޭކަމުގެ ޝަކުވާ، ހުއްދަ ލިބިފައިވާ ނޫސްވެރިން ވެސް ކުރަމުންދާކަމަށް އިޢުލާނުގައި ފާހަގަކޮށްފައިވެއެވެ.

ރައީސް އޮފީހުގެ އިޢުލާނުގައި އިތުރަށް ބަޔާންކޮށްފައިވާ ގޮތުން، ގްރީން ޒޯންގައި ހުންނަ މި ތަނުގައި އާންމު މަޞްލަޙަތު ގެއްލޭފަދަ އަދި އިޖްތިމާޢީ މިންގަނޑުތަކާ ޚިލާފު ޢަމަލުތައް ހިންގަމުންދިއުމުގެ ސަބަބުން، އެ ސަރަޙައްދުގެ ސަރުކާރު އޮފީސްތަކަށް ޚިދުމަތް ހޯދަން އަންނަ ފަރާތްތަކަށް ދަތިތަކާ ކުރިމަތިވަމުންދެއެވެ.

މި ކަންކަމަކީ މީޑިއާ ފެންޑާ ބޭނުންކުރުމަށް ކަނޑައަޅާފައިވާ އުސޫލުތަކާ ޚިލާފު، ޤާނޫނީ ކުށްތަކެއް ކަމަށް ރައީސް އޮފީހުން ބުނެފައިވެއެވެ. އެހެންކަމުން، ނޫސްވެރިންނަށް އެހެން އިންތިޒާމެއް ހަމަޖައްސައިދިނުމަށްޓަކައި، އާދިއްތަ ދުވަހުން ފެށިގެން މީޑިއާ ފެންޑާ އުވާލާފައިވާ ކަމަށް އެ އޮފީހުން ބުނެފައިވެއެވެ.

މި ނިންމުން ނިންމާފައިވަނީ، ސަރުކާރަށް މީޑިއާތައް ކޮންޓްރޯލްކުރެވޭ ގޮތަށް ތުޅާދޫ ދާއިރާގެ މެންބަރު ޢަބްދުލްޙަންނާން އަބޫބަކުރު ރައްޔިތުންގެ މަޖިލީހަށް ހުށަހަޅާފައިވާ ބިލަކާ ގުޅިގެން ނޫސްވެރިން ކަންބޮޑުވުން ފާޅުކުރަމުންދާ ދަނޑިވަޅެއްގައެވެ. އެ ބިލާ ދެކޮޅަށް ނޫސްވެރިން މުޒާހަރާކޮށް، މީޑިއާ ފެންޑާގައި ވެސް އިހުތިޖާޖީ ޙަރަކާތްތައް ކުރިއަށް ގެންގޮސްފައިވާކަން ފާހަގަކޮށްލެވެ އެވެ.