މުއިއްޒުގެ ނާގާބިލް ސަރުކާރުން, ރާއްޖޭގެ ހުރިހާ ސިނާއަތެއް ލޫޓުވައިފި: ވަހީދު
ރާއްޖޭގެ ހުރިހާ ސިނާއަތެއް މިހާރުގެ ސަރުކާރުން ލޫޓުވާލައިފި
އެމްޑީޕީ ހަރުގެ ޖަލްސާގައި އަބްދުﷲ ވަހީދު ވާހަކަދައްކަވަނީ
ރައީސް ޑރ. މުހައްމަދު މުއިއްޒުގެ ނާގާބިލް ސަރުކާރުން މިއަދު ރާއްޖޭގެ ހުރިހާ ސިނާއަތެއް ލޫޓުވައިފި ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެ އެވެ.
އެމްޑީޕީން ހޮނިހިރު ދުވަހު ބޭއްވި ޕިކަޕް ޖަލްސާގައި ވާހަކަދައްކަވަމުން ވަހީދު ވިދާޅުވީ، ރާއްޖޭގެ ހުރިހާ ސިނާއަތެއް މިހާރުގެ ސަރުކާރުން ލޫޓުވާލައިފި ކަމަށާއި ނާގާބިލު ވެރިއަކު މިގައުމުގެ ހުންގާނުގައި ހުރުމުގެ ސަބަބުން ރާއްޖޭގެ އިގްތިސާދު މިވަނީ މުޅިން ފުނޑިފައި ކަމަށެވެ.
އޭގެ ހެއްކެއްގެ ގޮތުގައި ވަހީދު ފާހަގަކުރެއްވީ ތަކެތީގެ އަގުތައް މައްޗަށް ގޮސް، އާފަލާއި އޮރެންޖު ފަދަ އަސާސީ ކާބޯތަކެތީގެ އަގުތައްވެސް އެތައް ގުނައަކަށް މައްޗަށް ގޮސްފައިވާ ކަމެވެ.
ސަރުކާރުގެ ނާގާބިލުކަން ކެބިނެޓް ފެންވަރުގައިވެސް ފެންނަން އޮތް ކަމަށް ވަހީދު ވިދާޅުވިއެވެ. އެގޮތުން ދެ އަހަރު ވާއިރު އެއްވެސް މަޝްރޫއެއް ކުރިއަށް ނުދާއިރު، ދެންވެސް މިސަރުކާރާއެކު ތިބެވޭކަށް ނެތް ކަމަށް ވިދާޅުވިއެވެ.
ވަހީދު އިތުރަށް ފާހަގަކުރެއްވި ގޮތުގައި ސަރުކާރުން ވެފައިވާ ވައުދުތަކާ ޚިލާފުވަމުންދާއިރު، ނޫސްވެރިކަން ކޮންޓްރޯލްކުރާ ބިލާ ގުޅޭގޮތުން ނޫސްވެރިން ފާޅުކުރާ ކަންބޮޑުވުންތަކަށްވެސް ސަރުކާރުން އަޑުއަހާލުމެއް ނެތެވެ. އަދި ކޯޓުތަކުން އިންސާފު ނުލިބޭ ކަމަށާއި، ހުކުމްތައް ގަންނަން ޖެހޭ ހިސާބަށް ކަންތައްތައް ގޮސްފައިވާ ކަމަށްވެސް ވަހީދު ވިދާޅުވިއެވެ. "ރައްޔިތުން މިތިބީ ވަރަށް ނިކަމެތި ހާލުގައި" ކަމަށް ވިދާޅުވަމުން، މަޖިލިސް ތަޅުއަޅުވާފައި އޮތުމަކީވެސް މިކަމަށް އިތުރު ހެއްކެއް ކަމަށްވެސް އޭނާ ވިދާޅުވިއެވެ.
މި ހުރިހާ ސަބަބުތަކަށްޓަކައި، ގައުމު ސަލާމަތްކުރުމަށް ރައްޔިތުން 3 އޮކްޓޯބަރުގައި މަގުމައްޗަށް ނިކުމެ، މިއަދުން މިއަދަށް ރައީސް ބާލަން ޖެހޭ ކަމަށް ވަހީދު ގޮވާލެއްވިއެވެ.
