"ދިވެހިންގެ ހާލަތު ބަދަލު ކުރައްވާކަށް ރައީސް މުއިއްޒު މަސައްކަތެއް ނުކުރައްވާ، އޮފީހުން ބޭރުގައި އުޅުއްވަނީ މަސައްކަތް ނުކުރަން"

ދިވެހިންގެ ހާލަތު ބަދަލު ކުރައްވާކަށް ރައީސް ޑރ.މުހައްމަދު މުއިއްޒު މަސައްކަތެއް ނުކުރައްވާ ކަމަށާއި ރައީސުލްޖުމްހޫރިއްޔާ އާއި ސަރުކާރުގެ އެހެނިހެން ވެރިން އޮފީހުން ބޭރުގައި އުޅުއްވަނީ މަސައްކަތް ނުކުރަން ކަމަށް ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެއެވެ.

އޭނާ އެފަދައިން ވިދާޅުވީ ކޮބާ މަގޭ ގޯތި، ކޮބާ މަގޭ ފްލެޓް ކަވަރޭޖްގެ ތެރެއިން ވާހަކަދައްކަވަމުންނެވެ.

އޭނާ ވިދާޅުވީ މި ސަރުކާރުގެ ވެރިން ގިނަ ވަގުތުު އަތޮޅު ތެރޭގައި ދަތުރުތަކުގައި ހޭދަކުރެއްވި ނަމަވެސް ނަތީޖާ އެއް ނުފެންނަ ކަމަށެވެ. އަދި ޖަވާބުދާރީވުމުގެ އެއްވެސް ސިފަ އެއް ސަރުކާރުގެ ނެތް ކަމަށް އޭނާ ވިދާޅުވިއެވެ. ހަމަ އެހެންމެ ރައީސް ވެސް އަތޮޅުތެރޭގެ ދަތުރުތަކަށް ފަހު މާލެ ވަޑައިގަންނަވާފައި، އެމްޑީޕީގެ ހަރަކާތެއް ނެތް ނަމަ ދެން ވަޑައިގަންނަވަނީ ރާއްޖެއިން ބޭރަށް ކަމަށް ވަހީދު ވިދާޅުވިއެވެ. އޮފީހުގައި ތިބެ ރައްޔިތުން އެދޭ ކަންކަން ހައްލުކޮށްދިނުމުގެ ސިފަ މި ސަރުކާރުގެ ކިބައިގައި ނެތް ކަމަށް އޭނާ ވިދާޅުވިއެވެ.

"މާލޭގައި އޮފީހެއްގައި ރައީސް ވެސް މަޑެއް ނުކުރައްވާ، ވަޒީރެއް ވެސް މަޑެއް ނުކުރައްވާ. އެމްޑީ އެއް ވެސް މަޑު ނުކުރައްވާ ކީއްވެތޯ؟ މަސައްކަތް ނުރަން ވެގެން. މެމްބަރުން ދިޔައީމަ ވަޒީރެއް ނުހުރޭ. މެމްބަރެއް ނުހުރޭ. ރަށްރަށުގައި އުޅުއްވާފައި ވަަޑައިގެން ރައީސް މާލޭގައި މަޑެއް ނުކުރައްވާ." އޭނާ ވިދާޅުވިއެވެ.

މީގެ އިތުުރުން ޕީޕީއެމް ޕީއެންސީގެ ވިސްނުމަކީ އަބަދުވެސް ރައްޔިތުންނަށް ބިރު ދައްކައިގެން އުޅުން ކަމަށާއި މިހާރު ރައްޔިތުން އެފަދަ އުކުޅުތަކުން ކޮންޓްރޯލް ނުކުރެވޭނެ ކަމަށް އޭނާ ވަނީ ވިދާޅުވެފައެވެ. ރައްޔިތުން ހިތްހަމަ ނުޖެހޭ ކަމައް ވާނަމަ ރައްޔިތުން އަޑު އުފުލާނެ ކަމަށާއި މި ވެރިކަމުގައި މިހާރު ރައްޔިތުން ތިބީ ނުރުހޭ ކަންކަން ގިނަވުމުން އަޑު އުފުލާފަ، ނުއުފުލާނެ ކަމެއް ނޭނގޭ ހިސާބުގައި ކަމަށް އޭނާ ވަނީ ވިދާޅުވެފައެވެ.

ރައްޔިތުންގެ ހައްގުތައް ނުހައްގުން ފޭރިގަންނަން ސަރުކާރަށް ފުރުސަތު ދީގެން ރައްޔިތުން ނުތިބޭނެ ކަމަށް އޭނާ ވަނީ ވިދާޅުވެފައެވެ. ސަރުކާރުގެ ކިބައިން ފެންނަނީ ހައްގުތަކަށް ވަކާލާތުކުރުމުން އިތުރު ދަތިތައް ކުރިމަތިކުރުވާނެ ކަމަށް ބުނަމުންދާ މަންޒަރު ކަމަށް ވެސް ދިއްދޫ ދާއިރާގެ ކުރީގެ މެމްބަރު ވިދާޅުވިއެވެ. އަޅުވެތިކަމާއި ބިރުވެރިކަން ފަދަ ރާއްޖެއިން ނެތި ގޮސްފައިވާ ކަންކަން އިއާދަކުރާ ސަރުކާރަކަށް މި ސަރުކާރު ވެފައިވާ ކަމަށް އޭނާ ވިދާޅުވިއެވެ.

ހަމައެހެންމެ، ރައީސް މުއިއްޒު އަކީ ދިވެހިރައްޔިތުން ކޮންޓްރޯލް ކުރުމަށް މަސައްކަތް ކުރައްވާ ބޭފުޅެއްކަން ހުރިހާ ދިވެހިންނަށް މިހާރު އެނގޭ ކަަމަށާއި އެހެން ރައީސް އަމަލުކުރައްވަން ޖެހެނީ ރައްޔިތުންގެ ތާއީދު ސަރުކާރަށް ނެތުމުން ކަމަށް ވެސް ވަހީދު ވަނީ ވިދާޅުވެފައެވެ.

މީގެ އިތުރުން އޭނާ ވަނީ ސަރުކާރުން ބަޖެޓް އެކުލަވާލާ ގޮތަށް ވެސް ފާޑު ވިދާޅުވެފައެވެ. އަދި މި ވެރިކަން އައިފަހުން ޕީއެސްއައިޕީ މަޝްރޫޢުތައް ވެސް ނުހިނގާ ކަމަށާއި އެއީ ވަރަށް ލަދުވެތި ކަމެއް ކަމަށް ވިދާޅުވެފައެވެ. ބަޖެޓް ހޭދަކުރާ ގޮތް ވެސް މި ސަރުކާރުން ހާމަ ނުކުރާ ކަމަށާއި އެއީ އޮޅުވާލުން ކަމަށް ވެސް އޭނާ ވިދާޅުވިއެވެ.