ޝަރީއަތް ނިމެންދެން ބަންދުކޮށްފައި ހުރި ޝަމްއާންގެ އަޑުއެހުމެއް ތާވަލުކޮށްފި
ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދުގެ މައްޗަށް މަނީ ލޯންޑަރިންގ، ފޭރުން އަދި ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ ކުރެވިފައިވޭ
ކުރީގެ ކޮންޓްރޯލަރ ޝަމްއާންގެ ޝަރީއަތުގެ ތެރެއިން
މަނީ ލޯންޑަރިންގެ ދައުވާ ކޮށްފައިވާ ކުރީގެ ކޮންޓްރޯލަރ ޖެނެރަލް އޮފް އިމިގްރޭޝަން މުހައްމަދު ޝަމްއާން ވަހީދުގެ އަޑުއެހުމެއް އާދީއްތަ ދުވަހަށް ކްރިމިނަލް ކޯޓުގައި ތާވަލުކޮށްފި އެވެ.
ޝައްމާންގެ މައްޗަށް ދައުވާ ކޮށްފައި ވަނީ 11 މާޗުގެ ރޭގަނޑު 11:30 ހާއިރު، އިމިގްރޭޝަންގެ ކަމާއި ގުޅުން ހުރި ޑިޕާޓްމަންޓަށް އެންގުމެއް ނެތި، ކޮންޓްރޯލަރުގެ ބިއުރޯގައި މަސައްކަތްކުރަމުން ދިޔަ އިބްރާހީމް އަހުމަދާއި އަހުމަދު ލައްސާނު އަދި މުހައްމަދު އަލްސަން އިސްމާއީލާއި ދެ މީހުންނަށް ބިދޭސީންތަކެއް ރާއްޖޭގައި ކުރާ މަސައްކަތް ބެލުމަށް އިރުޝާދުދިން މައްސަލަ އާއި ގުޅިގެންނެވެ. އަދި އޭނާ ޝަރީއަތް ނިމެންދެން ވަނީ ވާނުވާ ބަންދު ޖަހާފަ އެވެ.
އާދީއްތަ ދުވަހު ކްރިމިނަލް ކޯޓުގައި އޭނާގެ ޝަރިއަތް ތާވަލުކޮށްފައިވަނީ 3:30 ގައެވެ. އެއީ ފޭރުމުގައި ބައިވެރިވުމާއި، ރަސްމީ ހައިސިއްޔަތު ނަހަމަގޮތުގައި ބޭނުން ކުރުން އަދި މަނީ ލޯންޑަރިންގ ކުށުގެ ދައުވާގެ އަޑުއެހުމެވެ. މި މައްސަލަތަކުގެ ޝަރީއަތް ފެށީ މިދިޔަ ޖޫންމަހު އެވެ.
އި ޝަމްއާންއަށް ކުރާ ދައުވާތަކަކީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމާއި، ފޭރުމުގައި ބައިވެރިވުމުގެ ކުށުގެ ދައުވާގެ އިތުރުން މަނީ ލޯންޑަރިންގެ ދައުވާއެވެ.ޝައްމާންގެ އަމުރަށް، 530،000 ދިވެހި ރުފިޔާއާއެކު ބިދޭސީއެއް ދޫކޮށްލާފައިވާ ކަމަށް ބުނާ މިމައްސަލާ ގުޅިގެން ޝައްމާން ދިރިއުޅޭ ގެ ވެސް ފުލުހުން ބަލާ ފާސްކޮށްފައިވެއެވެ. އަދި އެގެއިން ގިނަ އަދަދެއްގެ ފައިސާގެ އިތުރުން އިލެކްޓްރޯނިކް ސާމާނުތަކެއް ފުލުހުންގެ ބެލެމުގެ ދަށަށް ގެންގޮސްފައިވެ އެވެ.
ދައުވާގައި ފާހަގަކޮށްފައިވާ ކަންކަމަށް ބަލާއިރު ޝަމްއާންއަށް އެނގިގެން އެ މުވައްޒަފުން އެ ރެއިޑް ޖަހާފައިވާ ކަމަށާއި ރެއިޑް ޖެހުމުގެ ރަސްމީ ހުއްދައެއް ނެތްކަން އަދި މޯލްޑިވްސް އިމިގްރޭޝަންގެ އުސޫލުތަކާ ހިލާފަށް އެކަން ކޮށްފައިވާ ކަމަށް ފާހަގަކޮށްފައިވެ އެވެ.
މީގެ އިތުރުން މި ރެއިޑް ޖެހިރޭ މޯލްޑިވްސް އިމިގްރޭޝަންގެ ރިސްކް ސެކްޝަން މުވައްޒަފުން އެ ތަނަށް ހާޒިރުވުމަށް ފަހު އެ ތަނުގައި ތިބި ބިދޭސީންގެ ތެރެއިން 530،000ރ.އާ އެކު ބަންގަލަދޭޝްެގެ ރައްޔިތެއް އިމިގްރޭޝަންގެ ބެލުމުގެ ދަށަށް ގެންދިޔަ ކަމަށް ވަނީ ބުނެފައެވެ. އަދި އޭނާ ބަންދުން ދޫކުރުމަށް އޭނާގެ ސްޕޮންސަރުގެ ނަމުގައި ސައްހަ ނޫން ސިޓީއެއް އިމިގްރޭޝަންގެ މެއިލް އަށް ފޮނުވާފައިވާ ކަމަށް ވެސް ވަނީ ބުނެފަ އެވެ.
މީގެ އިތުރުން ބިދޭސީ މީހާ ދޫކޮށްލުމަށް ފަހު އޭނާގެ އަތުގައި ހުރި ފައިސާގެ ތެރެއިން 500،000ރ. ދިނުމަށް އަންގާފައިވާ ކަމަށް ވަނީ ބުނެފައެވެ. އެ ފައިސާ ނުދެވޭނެ ކަމަށް އޭނާ ބުނުމުން، އޭނާގެ އަތުން އަތުން 500،000ރ. އަތުލުމަށް ޝަމްއާން އެންގި ކަމަށް ވެސް ދައުވާގައި ފާހަގަކޮށްފައިވެއެވެ. އެ ބިދޭސީ މީހާ އަށް ރާއްޖެ އިން ދިއުމަށް އަންގާ ބިރު ދެއްކި ކަމަށް ދައުވާގައި ފާހަގަކޮށްފައިވެ އެވެ.
13 މާޗުގެ ދަންވަރު 3 ހާއިރު ޝަމްއާން ދިރިއުޅޭ ގެއަށް އެ ފައިސާ ގެންގޮސްދީފައިވާ ކަމަށާޢި އެ ފައިސާގެ ތެރެއިން 400،000ރ. ޝަމްއާން އަށް ދީފައިވާ ކަމަށް ދައުވާގައި ބުނެފައިވެއެވެ. އެ ފައިސާ ބޭނުންކޮށްގެން ޝަމްއާންގެ ނަމުގައި ނަގާފައިވާ ދެ ސްޓޫޑަންޓް ލޯންއަކަށް ހަމަ އެ ދުވަހު ފައިސާ ދައްކާފައިވާ ކަމަށް ދައުވާގައި ބަޔާންކޮށްފައިވެ އެވެ.
މޯލްޑިވްސް އިމިގްރޭޝަންގެ ބައެއް މުވައްޒަފުން މަގާމުގެ ނުފޫޒު ނަހަމަ ގޮތުގައި ބޭނުންކޮށް ބިދޭސީ މަސައްކަތްތެރިންގެ އަތުން ނާޖާއިޒް މަންފާ ހޯދަމުންދާ ކަމަށް ތުހުމަތު ކުރެވޭ މައްސަލަ އާއި ގުޅިގެން ބަންދުގައި ތިބި ހަތަރު މުވައްޒަފުންނާއި، ޝަމްއާންގެ މައްޗަށް ދައުވާކޮށްދިނުމަށް އެދި ފުލުހުން ވަނީ މީގެ ކުރިން ޕީޖީ އޮފީހަށް ފޮނުވާފަ އެވެ. މި މައްސަލައިގައި ޝަމްއާންގެ އިތުރުން ހައްޔަރުކުރި 4 މީހުންނަކީ ތ ބުރުނި، މޫނިމާ، މުހައްމަދު އަލްސަން އިސްމާއީލް (21އ)، މާލެ، ގ.ހެޕީސައިޑް، އިބްރާހިމް އަހުމަދު (37އ) އަދި މާލެ ގ ހެޕީސައިޑް، ހަސަން ސަހެޝާން (47އ) ކަމަށެވެ. މި 3 މީހުން ހައްޔަރުކުރީ މާޗް 20 ވަނަ ދުވަހުގެ ރެއެވެ. އަދި 21 ވަނަ ދުވަހު މާލެ، މ. ހަޒާރީވިލާ އަހުމަދު ލައްސާން (40އ)އެވެ. މި 4 މީހުންގެ މައްޗަށް ވެސް ވަނީ ދައުވާ އުފުލާފަ އެވެ.
ފޭރުމުގައި ބައިވެރިވުމުގެ ކުށުގެ ދައުވާ ޝަމްއާންގެ މައްޗަށް ސާބިތުވެއްޖެ ނަމަ ތިން އަހަރާއި ދެ މަހާއި 12 ދުވަހުގެ މުއްދަތުގެ ޖަލު ހުކުމެއް އަންނާނެއެވެ. ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާ ސާބިތުވެއްޖެނަމަ އަންނާނީ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެކެވެ. އަދި މަނީ ލޯޑްރިންގެ ކުށުގެ ދައުވާ ޝަމްއާންގެ މައްޗަށް ސާބިތުވެއްޖެ ނަމަ ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުން ނުވަތަ ކުށުގެ އަމަލު ހިންގުމުގައި ބޭނުންކުރި ފައިސާގެ ފަސް ގުނައަށްވުރެ އިތުރުނުވާ އަދަދަކުން ޖޫރިމަނާކުރުމާއެކު ފަސް އަހަރާއި 15 އަހަރާ ދެމެދުގެ މުއްދަތަކަށް ޖަލަށްލުމުގެ ހުކުމެއް އަންނާނެ އެވެ.
