ބ. ދޮންފަނުގެ ބިން ހިއްކުމަށް ރައްޔިތުން ބޭނުންވާކަންކަން ރައީސް ޑރ. މުޙައްމަދު މުއިއްޒަށް އަންގަން، އެ ރަށު ރައްޔިތުން ހުކުރު ދުވަހު ކަނޑުމަތީ މުޒާހަރާކުރަން ފަށައިފި އެވެ.

ދޮންފަނު ބިން ހިއްކުމަށް އެމްޓީސީސީއާ ހަވާލުކުރުމަށް ފަހުގައި ރައީސް ޑރ. މުޙައްމަދު މުއިއްޒު ވަނީ އެ ރަށް ނުހިއްކަން ނިންމަވައިފައެވެ. މުއިއްޒު މި ގޮތައް ނިންމެވީ، އެކަން ކޮށްފިނަމަ އެ ރަށް ކައިރި އޮންނަ, ގުދުރަތީ ގޮތުން މުއްސަނދި, އަދި ޓޫރިސްޓުންގެ ވަރަށް މަގުބޫލު މަންޒިލެއް ކަމަށްވާ, ހަނިފަރު ބޭއަށް ލިބޭނެ ގެއްލުންތަކާ ގުޅިގެން އެތައް ބަޔަކު ކަންބޮޑުވުން ފާޅު ކުރަމުން ގެންދަނިކޮށްނެވެ.

ބިން ހިއްކުން ކުރިއަށް ނުގެންދާ ގޮތައް ނިންމެވީ ދޮންފަނު ރައްޔިތުން އެދިގެން ކަމަށް މުއިއްޒު ވިދާޅުވި ނަމަވެސް، އެއީ ކަނޑައެޅިގެން އިތުރުފުޅެއް ކަމަށް ދޮންފަނު ކައުންސިލުން ވަނީ ބުނެފައެވެ.

އެ ނިންމެވުމާ ގުޅިގެން ނުރުހުން ފާޅުކޮށް އެ ރަށު ރައްޔިތުން އަންނަނީ ސިލްސިލާ މުޒާހަރާތަކެއް ކުރަމުންނެވެ. އެގޮތުން ދޮންފަނު ކައުންސިލްގެ ރައީސް އަހުމަދު އިރުޝާދު ވިދާޅުވީ، ސަރުކާރުގެ ނިންމުން ބަދަލު ކުރަންދެން އެ ރަށު ރައްޔިތުން ސުލްހަވެރި އިހުތިޖާޖުތައް ކަނޑުމަތީ ކުރިއަށް ގެންދާނެ ކަމަށެވެ.

އެގޮތުން، އެ މުޒާހަރާ ކުރިއަށް ގެންދަނީ ކައުންސިލްގެ އިހުތިސާސުގައި ހިމެނޭ ކަނޑުގެ ބައި ކަމަށްވާ، ރަށު ފަރުން ފެށިގެން 700 މީޓަރު ސަރަހައްދުގައި ކަނޑުމަތީގައި ކަމަށް އިރުޝާދު ވިދާޅުވި އެވެ.

އެ ރަށުގެ ރައްޔިތުން ވަނީ މި މަހުގެ 10 ވަނަ ދުވަހު ވެސް މުޒާހަރާކޮށްފަ އެވެ. އެ ދުވަހު ވެސް މުޒާހަރާގެ ބައިވެރިން އެއް އަޑަކުން ގޮވާލަމުން ގެންދިޔައީ ރައީސް މުއިއްޒުގެ އެ ނިންމުން ބަދަލުކުރައްވައި، ދޮންފަނުގެ ރައްޔިތުންނަށް ދިމާވެފައިވާ ބޯހިޔާވަހިކަމަށް ހައްލެއް ހޯއްދަވައިދެއްވައި ބިންހިއްކުން އަވަސް ކުރުމަށެވެ.

ކައުންސިލްގެ ރައީސް އިރުޝާދު ވިދާޅުވީ، ބ. އަތޮޅުގެ އެއްވެސް ތަނަކަށް ގެއްލުމެއް ދިނުމަށް ދޮންފަނުގެ އެއްވެސް ރައްޔިތަކު ބޭނުމެއް ނުވާނެ ކަމަށެވެ.

އެ ކައުންސިލުން މިހާރު ވަނީ ރަށު ފަރުން ފެށިގެން 700 މީޓަރު ސަރަހައްދުގައި މުޒާހަރާކުރާ ވަގުތުތަކުގައި ފީނުމާއި ޑައިވްކުރުން މަނާކޮށްފައެވެ.

ދޮންފަނު ހިއްކުން ހުއްޓާލި ނަމަވެސް އެ ރަށުގެ ބަނދަރުގެ މައްސަލަ ހައްލުކުރުމާއި، ގޮޑުދޮށް ހިމާޔަތްކުރުން ސަރުކާރުން ކުރިއަށް ގެންދާނެ ކަމަށް ކޮންސްޓްރަކްޝަން މިނިސްޓަރު ޑރ. އަބްދުالله މުއްތަލިބު ވަނީ ވިދާޅުވެފައެވެ.