މީޑިއާ ކޮންޓްރޯލް ބިލު ފާސްކުރައްވައިފި ނަމަ އެއީ ރައީސް ޑރ. މުޙައްމަދު މުޢިއްޒު ނިމުމުގެ ފެށުން ކަމަށް ގަލޮޅު ދެކުނު ދާއިރާގެ އެމްޑީޕީ މެންބަރު މީކާއީލް އަހްމަދު ނަސީމް ވިދާޅުވެއްޖެއެވެ.

ރާއްޖެޓީވީގެ ޓީވީޓޯކް ޕްރޮގްރާމްގައި މީކާއީލް ވިދާޅުވީ، ނޫސްވެރިކަން ހުއްޓުވައިފި ނަމަ އެއީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިމުމުގެ ފެށުން ކަމަށާއި ދޮން އަމާ ޑޮޓްކޮމް ވެސް އެހެން ނަމެއްގައި އަންނާނެ ކަމަށެވެ. އަދި ތަފާތު ކުރުސީތަކާއި ދިވެހި އޮބްޒާވަރުންނާއި ކޮއިމަލާ ވެސް އަނެއްކާ އަންނާނެ ކަމަށާއި އިންސާނެއްގެ ފިކުރެއް ވިސްނުމެއް ގައިދެއް ނުކުރެވޭނެ ކަން އެއީ ޒަމާނުއްސުރެ ހުރިހާ ހުދުމުހުތާރު ވެރިކަންތަކެއްގައި އެމީހުންނަށް ފެނިފައި ހުރި ކަންކަން ކަމަށް މީކާއިލް ވިދާޅުވި އެވެ.

މީގެ އިތުރުން މީކާއިލް ވިދާޅުވީ، މީޑިއާއިން ހަތަރުދަމު ދައްކަނީ ރައްޔިތުން މަޖިލީހުގެ މެންބަރުންނާއި އެމެންބަރުނާއި ގުޅުން ހުރި އެކިއެކި މަސްލަހަތުގެ ވާހަކަ ކަމަށާއި އެހެންކަމުން އެ މެންބަރުންގެ އަތްމަތީގައި މީޑިއާތައް ރެގިއުލޭޓު ކުރުމުގެ ބާރު އޮވެގެން ނުވާނެ ކަމަށެވެ. އަދި ދިވެހި ރާއްޖޭގެ މިނިވަން ނޫސްވެރިކަމަކީ ރައީސް މުޢިއްޒުގެ މި ފަސް އަހަރުގެ ތެރޭގައި ފާސްވެގެން އުޅޭ އެއްޗެއް ނޫންކަމަށާއި މިނިވަން ނޫސްވެރިކަމަކީ އެތައް ބައެއްގެ ބުރަ މަސައްކަތުން އެތައް ބައެއްގެ ގުރުބާނީއަކަށް ފަހު ދިވެހި ރައްޔިތުންނަށް ލިބުނު އެއްޗެއް ކަމަށް މީކާއީލް ވިދާޅުވި އެވެ.

މީކާއިލް ވިދާޅުވީ، ޕިއެންސީ ޕީޖީ ގުރުޕުގެ ހެޔޮފުލުކަމުން އިރުޝާދު ފުޅާއި ލަފާފުޅުގެ މަތިން ފާސްކުރެވޭ ކޮމިޝަނަކަށް ނޫސްވެރިން ތަބާވާން ނުޖެހޭކަމަށެވެ.