ކުރީގެ ރައީސް ބައިޑަންގެ ރިޔާސީ ލައިބްރަރީ ޑެލްވެއާގައި ޤާއިމު ކުރަން ފަންޑު ހޯދަނީ

އެމެރިކާގެ ކުރީގެ ރައީސް ޖޯ ބައިޑަންގެ ރިޔާސީ ލައިބްރަރީ ޑެލްވެއާގައި ޤާއިމު ކުރުމަށް ނިންމައި، އެ މަޝްރޫއު ކުރިއަށް ގެންދިޔުމަށް ބޭނުންވާ ފައިސާ ހޯދުމާއި، ތަން ހޯދުމުގެ މަސައްކަތް ކުރިއަށް ގެންދިޔުމަށް 13 މެމްބަރުންގެ ބޯޑެއް އެކުލަވާލައިފި އެވެ.

ކުރީގެ ރައީސް ބައިޑަން އަދި އަނބިކަނބަލުން ޖިލް ބައިޑަން ފައުންޑޭޝަން އިން މިދިޔަ ހަފުތާގެ އެކުލަވާލި ބޯޑުގައި ހިމެނޭ މެމްބަރުންނަކީ، ބައިޑަންގެ ދައުރުގައި ސެކްރެޓަރީ އޮފް ސްޓޭޓްގެ މަގާމުގައި ހުންނެވި އެންތަނީ ބްލިންކަންގެ އިތުރުން، ދިގު މުއްދަތެއް ވަންދެން ބައިޑަން އަށް ލަފާދޭ ފަރާތެއްގެ ގޮތުގައި ހުންނެވި ސްޓީވް ރިޗެޓީ އަދި ޑިމޮކްރަޓިކް ޕާޓީގެ ފަންޑުގެ ކަންކަން ބަލަހައްޓާން ރޫފަސް ގިފޯޑް އެވެ. ގިފޯޑް އަކީ ބައިޑަންގެ ދެމަފިރިންނާ ގާތް ގުޅުމެއް ވެސް އޮންނަ ފަރާތެެކެވެ.

އެމެރިކާގެ ސިޔާސީ މަޝްރަހު ދިރާސާ ކުރާ ފަރާތްތައް އަދި ބައެއް މީޑިއާ ތަކުގައި ބުނެފައިވާ ގޮތުގައި ކުރީގެ ރައީސް ބައިޑަންގެ މި މަޝްރޫއަށް ފައިސާ ހޯދުމަކީ އުނދަގޫ ކަމަކަށް ވާނެ ކަމަށާއި، އެކަމުގައި ގޮންޖެހުން ތަކެއް ކުރިމަތި ވާނެ ކަމަށް ބެލެވޭ ކަމަށެވެ. އެއީ ޑިމޮކްރަޓިކް ޕާޓީ އަށް ބޮޑެތި އަދަދު ތަކުން ފައިސާ ހަދިޔާ ކުރާ ފަރާތްތަކުން ވެސް، މި ވަގުތު ފައިސާ ދިނުން މަދު ކޮށްފައިވާތީ ކަމަށް ބުނެފައިވެ އެވެ.

އެ މަޝްރޫއު ކުރިއަށް ގެންދިޔުމަށް އެކުލަވާލި ބޯޑުގެ ޗެއާ އަކީ ގިފޯޑް އެވެ. އެ މަޝްރޫއާ ގުޅޭ ގޮތުން ވާހަކަ ދައްކަވަމުން އޭނާ ވިދާޅުވީ، އެ މަޝްރޫއު ކުރިއަށް ގެންދިޔުމަށް ބޯޑުން ވަކި އަމާޒުތަކެއް ކަނޑައަޅާފައިވާ ކަމަށެވެ. އަދި އެ އަމާޒަށް ވާސިލުވާނެ ކަމުގެ ޔަގީންކަން އޮތް ކަމަށް ވެސް އޭނާ ވަނީ ވިދާޅުވެފަ އެވެ.

އެމެރިކާގެ ކުރީގެ ބައެއް އެހެން ރައީސުން ވެސް ވަނީ، އެ ބޭފުޅުންގެ ނަން މަތީގައި ލައިބްރަރީތައް ޤާއިމު ކޮށްފަ އެވެ. އެގޮތުން އެމެރިކާގެ ކުރީގެ ރައީސް ޖޯޖް އެޗްޑަބްލިއު ބުޝްގެ ލައިބްރަރީ 1997 ވަނަ އަހަރު ހުޅުވާފައިވާއިރު، އެ ލައިބްރަރީގެ އަގަކީ 43 މިލިއަން އެމެރިކާ ޑޮލަރެވެ.

ކުރީގެ ރައީސް ބިލް ކްލިންޓަންގެ ލައިބްރަރީގެ އަގަކީ 164 މިލިއަން އެމެރިކާ ޑޮލަރެވެ. އަދި ޖޯޖް ޑަބްލިއު ބުޝްގެ ލައިބްރަރީ އަށް ޚަރަދުވެފައި ވަނީ 500 މިލިއަން އެމެރިކާ ޑޮލަރެވެ. މީގެ އިތުރުން، ކުރީގެ ރައީސް ބަރަކް އޮބާމާގެ ލައިބްރަރީ އަށް 1.6 ބިލިއަން އެމެރިކާ ޑޮލަރު ވަނީ ޚަރަދުވެފަ އެވެ.

ކުރީގެ ރައީސުންގެ ނަމުގައި ރިޔާސީ ލައިބްރަރީތައް ޤާއިމު ކުރާއިރު، އެ އިމާރާތްތައް ޤާއިމު ކުރުމުގެ ޕްރޮގްރާމްތައް ހިންގުމަށް ފައިސާ ހޯދަނީ ކުރީގެ ރައީސުން އުފައްދާ ނޮން-ޕްރޮފިޓް ޖަމިއްޔާ ތަކަށް އަމިއްލަ ފަރާތްތަކުން ދޭ ހަދިޔާ އިންނެވެ. ބައިޑަންގެ ލައިބްރަރީ ޤާއިމު ކުރުމުގެ މަޝްރޫއު އަދި އޮތީ ފެށުމުގެ މަރުޙަލާގަ އެވެ.

ނިމިދިޔަ ދައުރު އެމެރިކާގެ ރައީސް ކަމުގެ މަޤާމު އަދާ ކުރެއްވި ބައިޑަން، ރައީސް ކަމުގެ މަޤާމަށް ވަޑައިގެންނެވީ 2020 ވަނަ އަހަރު އޮތް ރިޔާސީ އިންތިޚާބު ކާމިޔާބު ކުރައްވައިފަ އެވެ. އެ އިންތިޚާބުގައި ބައިޑަން ވަނީ ޑޮނަލްޑް ޓްރަމްޕްގެ މައްޗަށް ކުރި ހޯއްދަވައިފަ އެވެ.

އޭގެ ފަހުން މިދިޔަ އަހަރު އޮތް އެމެރިކާގެ ރިޔާސީ އިންތިޚާބުގައި ބައިޑަން ވަނީ، ދެ ވަނަ ދައުރެއް ހޯދުމަށް ވާދަ ކޮށްފަ އެވެ. ނަމަވެސް، އިންތިޚާބުގެ ވަކި ހިސާބަކުން ބައިޑަން ވަނީ ރިޔާސީ ރޭހުން ވަކިވެ ވަޑައިގެންފަ އެވެ. އެއީ ބައިޑަންގެ ޞިއްޙީ ޙާލަތާ ގުޅޭ ގޮތުން ގިނަ ވާހަކަ ތަކެއް ދެކެވި، އޭނާ އަށް އެތައް ފާޑު ކިޔުން ތަކެއް އަމާޒުވަމުން ދިޔުމުންނެވެ.

އެމެރިކާގެ ރައީސް ކަމުގެ މަޤާމު އަދާ ކުރެއްވުމުގެ ކުރިން ބައިޑަން ވަނީ، އޮބާމާގެ ރިޔާސީ ދެ ދައުރުގައި ވެސް އޭނާގެ ނައިބު ރައީސްކަން ކުރައްވައިފަ އެވެ. ނައިބު ރައީސް ކަމަށް ވަޑައިގެންނެވުމުގެ ކުރިން ވެސް ބައިޑަން ވަނީ އެކި ދާއިރާ ތަކުން ދައުލަތަށް ޚިދުމަތް ކޮށްފަ އެވެ.