ލަައިގެންހުރި ބޮކްސާ ތެރޭގައި މަސްތުވާތަކެތި އެތެރެކުރަން އުޅުނު މީހަކު ހައްޔަރުކޮށްފި
ހައްޔަރު ކޮށްފައިވަނީ 50 އަހަރުގެ ދިވެހި ފިރިހެނެއް
ކްރިމިނަލް ކޯޓު
ވެލާނާ އިންޓަނޭޝަނަލް އެއަރޕޯޓުން ރާއްޖެ އެތެރެވަމުން ދަނިކޮށް، ލައިގެންހުރި ބޮކްސާ ތެރެއިން މަސްތުވާތަކެތި ފެނިގެން 50 އަހަރުގެ ދިވެހި ފިރިހެނެއް ހައްޔަރުކޮށްފިއެވެ.
ކްރިމިނަލް ކޯޓުން ނެރުނު އަމުރެއްގައިވާ ގޮތުން، އަހުމަދު ޒާހިދު ނަމަކަށް ކިޔާ މި މީހާގެ އަތުން 250 ގްރާމްގެ މެފްޑްރޯން ފެނިފައިވެއެވެ. ފުލުހުންނާއި ކަސްޓަމްސްގެ ލިޔުންތަކުގައިވާ ގޮތުން، މި މަސްތުވާތަކެތި ފެނުނީ އޭނާ ލައިގެން ހުރި ބޮކްސާގެ ތެރެއިންނެވެ.
ކޯޓުގައި މައްސަލަ ބެލި އަޑުއެހުމުގައި އަހުމަދު ޒާހިދު ވަނީ، މި މައްސަލާގައި ހިމެނޭ އަސްލު މީހާ ހޯދުމަށް ފުލުހުން މަސައްކަތް ނުކުރާ ކަމަށް ބުނެފައެވެ. ނަމަވެސް، މި މައްސަލައިގެ ތަހުގީގު ކުރިއަށްދާ ގޮތުގެ އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
އަހުމަދު ޒާހިދަކީ މީގެ ކުރިންވެސް އެކި މައްސަލަތަކުގައި ހައްޔަރުކުރެވިފައިވާ މީހެއްކަން ފާހަގަކުރެވެއެވެ. މި މައްސަލައާ ގުޅިގެން އޭނާ 30 ދުވަހުގެ މުއްދަތަށް ބަންދުގައި ބެހެއްޓުމަށް ކްރިމިނަލް ކޯޓުން ވަނީ އަމުރުކޮށްފައެވެ.
