އިންޝުއަރެންސް ފައިސާ ހޯދުމުގެ ދަހިވެތި ކަމުގައި އިނގިރޭސި ވިލާތުގެ ޑޮކްޓަރަކު އަމިއްލަ ދެ ފައި ބުރިކޮށްލައިފިއެވެ.

ނޭޝަނަލް ހެލްތް ސާރވިސް (އެން.އެޗް.އެސް) ގެ ވަސްކިއުލަރ ސަރޖަން އޭނާގެ އަމިއްލަ ދެ ފައި ބުރިކޮށްލި ކަމަށް އޭނާގެ މައްޗަށް އުފުލާފައިވާ ދައުވާ ގައި ވަނީ އިޢުތިރާފު ވެފައެވެ.

އުމުރުންގެ 49 އަހަރުގެ ނީލް ހޮޕަރ ވަނީ 2019 ގައި އޭނާގެ އަމިއްލަ ދެ ފައި ބުރިކޮށްލުމުގެ ކުރިން އެތައް ސަތޭކަ ފައި ބުރިކުރުމުގެ އޮޕަރޭޝަންތައް ކޮށްފައެވެ.

ޓްރޫރޯ ކްރައުން ކޯޓުގައި އޮތް އަޑުއެހުމުގައި ހާމަވި ގޮތުގައި އޭނާ އިންޝުއަރެންސް ކުންފުންޏަށް ދޮގު ހަދާ، ބުނެފައި ވަނީ އޭނާގެ ދެ ފަޔަށް ސެޕްސިސް ބަލީގެ ސަބަބުން ލިބުނު ގެއްލުމެއް ކަމަށެވެ. އެއީ އޭނާ އަމިއްލަ އަށް ކުރި ކަމެއް ކަމަކަށް ނުބުނެއެވެ. ކޯޓުގައި ހާމާވި ގޮތުގައި 2019 ގެ މޭ މަހު ހޮޕަރ ވަނީ "ގޮތްނޭނގޭ ބައްޔެއް" ގެ ސަބަބުން ކަކުލުން ތިރީ ބައި ބުރިކޮށްލާފައެވެ. އޭނާ ވަނީ ގަނޑުފެނާއި އަދި ޑްރައި އައިސް ބޭނުން ކޮށްގެން އަމިއްލަ ދެ ފައި ގަނޑުކޮށް، ބުރިކޮށްލަން ޖެހޭ ހިސާބަށް ގެންގޮސްފައެވެ.

ކޯޓުގައި ހާމަވި ގޮތުގައި 2019 ގެ މޭ މަހު ހޮޕަރ ގެ ދެފައި ވެސް ބުރިކޮށްލީ ދެފައިގައި ރިހޭކަމަށް ބުނެއެވެ. އޭނާ އަށް ފަރުވާ ދެވުނީ ސެޕްސިސް ބަލި ހުރި ކަމަށް ބަލައިގެން ކަމަށްވެއެވެ. އަދި އޮޕަރޭޝަން ޑޮކްޓަރުން އޭނާގެ ދެ ފައި ވެސް ބުރި ކޮށްލަން ޖެހޭ ކަމަށް ބުނެފައިވެއެވެ. އޭގެ ފަހުން އޮޕަރޭޝަން ކުރެވުނެވެ. އޭނާގެ ދެ ފަޔަށް ގެއްލުން ލިބުނު ހަގީގީ ސަބަބު ޑޮކްޓަރުންގެ ގާތުގައި ބުނެފައި ނުވާ ކަމަށް ކޯޓު އަޑުއެހުމުގައި ވަނީ ހާމަ ވެފައެވެ.

ދެފައި ބުރި ކޮށްލުމަށްފަހު ދެ ކުންފުންޏަކުން ކުރި އިންޝުއަރެންސް ކްލެއިމްތަކުގެ ޖުމްލަ އަދަދު 466,000 ޕައުންޑަށް ވުރެ ގިނަ ކަމަށް ކޯޓު އަޑުއެހުމުގައި ވަނީ ހާމަ ވެފައެވެ. އޭނާ މިކަން ކުރީ "ދަހިވެތިކަމުން" ކަމަށް ކޯޓުގައި ބުނެފައިވެއެވެ.

އޭނާ ރައްޓެއްސަކަށް މެސެޖް ކޮށް ބުނެފައިވަނީ މިކަމުން "ފައިދާ ނަގަން" ޖެހޭނެ ކަމަށެވެ. އިންޝުއަރެންސްގެ ފައިސާ އިން 50,000 ޕައުންޑަށް ވުރެ ގިނަ އަދަދެއް އަނބިމީހާ އަށް ފޮނުވާފައި ވާއިރު، 255,000 ޕައުންޑް އިމާރާތް ކުރުމާއި ގެ މަރާމާތު ކުރުމަށާއި ހޮޓް ޓަބެއް ގަތުމަށް ހޭދަކޮށްފައިވެއެވެ.

ފައި ބުރިކޮށްލުމަށްފަހު، އޭނާ ވަނީ 6 މަސްދުވަހަށްވުރެ ކުޑަ މުއްދަތެއްގެ ތެރޭގައި، ޖަހާފައިވާ މަސްނޫއީ ފައިތަކާއެކު އަނބުރާ ހޮސްޕިޓަލުގެ މަސައްކަތައް ނުކުތެވެ.

އޭނާ ހައްޔަރުކުރެވުނީ 2023 ވަނަ އަހަރުގެ މާރިޗު މަހުގައެވެ. އަދި 2023 ވަނަ އަހަރުގެ ޑިސެމްބަރު މަހުން ފެށިގެން މެޑިކަލް ރަޖިސްޓަރީން އޭނާ ސަސްޕެންޑް ކުރެވިފައިވެއެވެ.