ރައީސް މުއިއްޒުގެ ހެޔޮފުޅުކަން؛ އެއްވެސް މަސައްކަތެއް ނުކުރާ ފެނަކަ މެނޭޖަރަކަށް މުސާރަ ހިނގާތާ 14 މަހަށް ވުރެ ގިނަ ދުވަސް
ހދ. ނޭކުރެންދޫ ފެނަކަ އޮފީހުގެ އެސިސްޓެންޓް މެނޭޖަރ މުހައްމަދު ތޯހިރު 14 މަހަށްވުރެ ގިނަ ދުވަހު މަސައްކަތަށް ނުނިކުމެ މުސާރަ ނަގަމުންދޭ
ހދ. ނޭކުރެންދޫ ފެނަކަ އޮފީސް
ހދ. ނޭކުރެންދޫ ފެނަކަ އޮފީހުގެ އެސިސްޓެންޓް މެނޭޖަރެއްގެ މަގާމުގައި ހުރި މުހައްމަދު ތޯހިރަށް، އެއްވެސް މަސައްކަތެއް ނުކުރާތާ 14 މަހަށް ވުރެ ގިނަ ދުވަސްވެފައި ވާއިރުވެސް މުސާރަ ލިބެމުންދާކަން ހާމަވެއްޖެއެެވެ.
ރާއްޖެ ޓީވީ އިން ކުރި ސުވާލަކަށް ޖަވާބުދެއްވަމުން، ހދ. ނޭކުރެންދޫ ފެނަކަ އޮފީހާ މިވަގުތު ހަވާލުވެ ހުންނެވި ޑެޕިއުޓީ މެނޭޖަރ އަލީ ޒާހިރު ވަނީ މިކަން ކަށަވަރު ކޮށްދެއްވާފައެވެ. ނޭކުރެންދޫ ފެނަކަ އޮފީހުގައި ޖާގަ ނެތުމުގެ ސަބަބުން މިވަގުތު އެއޮފީހުގައި މަސައްކަތްކުރާ 3 މެނޭޖަރުންވެސް މަސައްކަތް ކުރަން ހުންނަނީ އެންމެ ކޮމްޕިއުޓަރ ސިސްޓަމެއް ކަމަށާއި، އެސިސްޓެންޓް މެނޭޖަރ ތޯހިރު މަސައްކަތައް ނުނިކުންނަނީ އޮފީހުގައި ޖާގައިގެ ދަތިކަން ހުރުމުންކަމަށް ލަފާ ކުރެވޭ ކަމަށް އަލީ ޒާހިރު ފާހަގަ ކުރައްވާފައި ވެއެވެ.
މީގެ އެތަށް މަހެއް ކުރިން، މިކަން ފެނަކަ ހެޑް އޮފީހުގެ ސަމާލުކަމަށް ގެނެސްފައިވާނޭ ކަމަށާއި ނަމަވެސް އެޅިހާވެސް ފިޔަވަޅަކީ ބަޔާން ނަގަން އަންގާ، ލިޔުމުން ނަސޭހަތް ދިނުން ކަމުގައި އަލީ ޒާހިރު ވިދާޅުވެފައިވެއެވެ. ނަމަވެސް ބަޔާނުގައި ސޮއި ކުރުމަށް ތޯހިރު ދެކޮޅު ހަދާފައިވާ ކަމަށްވެސް އަލީ ޒާހިރު ވިދާޅުވެފައިވެއެވެ. އަދި އެސިސްޓެންޓް މެނޭޖަރު ތޯހިރަށް ލިޔުމުން ނަސޭހަތް ދެވުނު ފަނުން މިހާރު 3 މަސް ދުވަހަށްވުރެ ގިނަ ދުވަސް ވެފައިވާކަމަށާއި ނަމަވެސް އޭގެ ފަހުން ހެޑް އޮފީހުން ވަކި އެއްޗެއް އަނގާފައި ނުވާކަންވެސް އަލީ ޒާހިރު ވިދާޅުވިއެވެ.
އެސިސްޓެންޓް މެނޭޖަރު މަސައްކަތެއް ނުކުރާތާ 12 މަހެއް ނޫން 14 މަސް ދުވަހަށްވުރެ ގިނަ ދުވަސްވެދާނެ..މިކަން ހެޑް އޮފީހުގެ ސަމާލު ކަމަށްވެސް ގެނެސްފަވާނީ..ހެޑް އޮފީހުން އެންގި ތޯހިރު [އެސިސްޓެން މެނޭޖަރު] ގެ ބަޔާން ނަގާ، ބަޔާނުގަ ސޮއި ކުރުވުމަށް..އެހެން ނަމަވެސް އެބޭފުޅާ [އެސިސްޓެންޓް މެނޭޖަރ] އޭގަ ސޮއި ނުކުރޭ..ސޮއި ނުކުރި ވާހަކަވެސް އޮންނާނީ އަންގާފާ..އޭގެ ފަހުން ލިޔުމުން މީގެ 3 މަސް ކުރިން ނޯޓިސް އެއް ދީފައިވޭ...........ވަޒީފާއިން ކަނޑާލުންފަދަ ފިޔަވަޅެއް އަޅަން އުޅޭކަމުގެ މައުލޫމާތެއް ނުލިބޭހދ. ނޭކުރެންދޫ ފެނަކަ އޮފީހުގެ ޑެޕިއުޓީ މެނޭޖަރ އަލީ ޒާހިރު
ރާއްޖެ ޓީީވީ އަށް މައުލޫމާތު ލިބިފައިވާގޮތުން، ނޭކުރެންދޫގައި އަމިއްލަ ވިޔަފާރިވެސް ކުރާ މުހައްމަދު ތޯހިރު ކޮންމެ ދުވަަހަކުވެސް އޮފީހަށް ސައިން އިން ވުމަށްފަހު ދެން އުޅެނީ އަމިއްލަ މަސައްކަތްތަކުގައެވެ.
ސަރުކާރުގެ ދަރަނިތައް އިންތިހާއަށް ބޮޑުވުމުގެ ސަބަބުން، ހަރަދު ކުޑަކުރުމަށް ދުނިޔޭގެ މާލީ އިދާރާތަކުން ހައިރާންވާފަދަ ފިޔަވަޅު ތަކެއް އަޅަމުންދާކަމަށް ސަރުކާރުން ވިދާޅުވަމުން ދާއިރު، އެންމެ ފަހުން ރައީސް މުއިއްޒު ހދ. ނޭކުރެންދޫއަށް ކުރެއްވި ދަތުރުފުޅާ ދިމާކޮށްވެސް ވަނީ، ބަނގުރޫޓު ވެފައިވާ ފެނަކައިންވެސް ކުންފުންޔަށް އިތުރަށް ގެއްލުންވާ ގޮތަށް ވަޒީފާތައް ދެއްވާފައެވެ.
މީގެ އިތުރުން އާބާދީގައި 600 އެއްހާ މީހުން ދިރިއުޅޭ ނޭކުރެންދޫގެ ސިއްހީ މަރުކަޒު އަދި ރަށު ކައުންސިލަށް 2 ޕޮލިޓިކަލް ޑިރެކްޓަރުން ރައީސް މުއިއްޒުގެ ދަތުރުފުޅާ ދިމާކޮށް އައްޔަނު ކޮށްފައިވެއެވެ. މި މަގާމުތަކަަށް މީހުން އައްޔަނު ކުރުމާއެކު ނޭކުރެންދޫގެ ސިއްހީ މަރުކަޒު އަދި ކައުންސިލަށް ރައީސް މުއިއްޒު އައްޔަނުކޮށްފައިވާ ސިޔާސީ މީހުންގެ ޖުމްލަ އަދަދު ފަހަކަށް އަރައެވެ. އަދި ނޭކުރެންދޫ ފެނަކައިގަވެސް 30 އަށްވުރެ ގިނަ މީހުން މަސައްކަތްކުރެއެވެ.
ގައުމުގެ އިގްތިޞާދީ ހާލަތު ދުވަހެއް ދުވަހަކަަށް ދަށަށްދާއިރު ވެސް ސަރުކާރުގެ އިސްރާފުކުރުން ބޮޑުތަނުން އިތުރުވެފަވާކަމަށް އިދިކޮޅު ފަރާތްތަކުން ފާހަގަކުރެއެވެ.
