އިސްރާއީލް އިން ޣައްޒާގައި ހިންގަމުން އަންނަ ހަނގުރާމައިގެ ސަބަބުން، އެ ޤައުމަށް ދުނިޔޭގެ ތާއީދު ގެއްލުންދާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޑެއިލީ ކޯލާ އަށް ދެއްވި އިންޓަވިޔުއެއްގައި ވާހަކަ ދައްކަވަމުން ޓްރަމްޕް ވިދާޅުވީ، ޣައްޒާގައި ހިންގަމުން އަންނަ ހަނގުރާމައިގެ ސަބަބުން އިސްރާއީލް އަށް އަސްކަރީ ގޮތުން ކާމިޔާބީ ތަކެއް ހޯދިދާނެ ކަމަށެވެ. އެހެން ނަމަވެސް، އިސްރާއީލް އަށް ދުނިޔޭގެ ތާއީދު ގެއްލެމުންދާ ކަމަށް ޓްރަމްޕް ވިދާޅުވި އެވެ.

ޣައްޒާގައި އިސްރާއީލް އިން ހިންގަމުން އަންނަ ހަނގުރާމަ އަށް އިޝާރާތް ކުރައްވައި ޓްރަމްޕް ވިދާޅުވީ، އިސްރާއީލް އިން ވީހާ ވެސް އަވަހަކަށް ޣައްޒާ ހަނގުރާމަ ނިންމާލަން ޖެހޭ ކަަމަށެވެ. އެކަން ފާހަގަ ކުރައްވައި ޓްރަމްޕް ވިދާޅުވީ، މުޅި ދުނިޔޭގެ ކުރިމަތީގައި އިސްރާއީލްގެ ތާއީދު ދަނީ ފަނޑުވަމުން ކަމަށާއި، އެ ތާއީދު ގެއްލެމުންދާ ކަމަށެވެ.

އަބަދު ވެސް އިސްރާއީލާ އެކު ގާތް ގުޅުމެއް ބާއްވަވާ ޓްރަމްޕް މިހެން ވިދާޅުވެފައި ވަނީ، ޕިއު ރިސާޗް ސެންޓަރުން ދާދި ފަހުން ހާމަ ކުރި ދިރާސާއަކާ ގުޅޭ ގޮތުން ސުވާލު ކުރުމުންނެވެ. އެ ދިރާސާގައި ދައްކާ ގޮތުން ރިޕަބްލިކަން ޕާޓީ އަށް ނިސްބަތްވާ ޒުވާނުންގެ މެދުގައި އިސްރާއީލް އަށް އޮންނަ ތާއީދު ދަށްވަމުންދާ ކަމަށެވެ.

އެކަމާ ގުޅޭ ގޮތުން ސުވާލު ކުރެއްވުމުން ޓްރަމްޕް ވިދާޅުވީ، މީގެ 20 އަހަރު ކުރިއަށް ބަލާއިރު، ކޮންގްރެސްގައި އެންމެ ބާރު ގަދަ ލޮބީ އޮތް ފަރާތަކީ އިސްރާއީލް ކަމަށެވެ. އެހެން ނަމަވެސް، މިއަދު އެ ބާރުވެރި ކަމެއް ނެތް ކަމަށާއި، އެއީ ހައިރާންވާން ޖެހޭ ކަމެއް ކަމަށް ޓްރަމްޕް ވިދާޅުވެފައިވެ އެވެ.

އިސްރާއީލް އަށް ދޭތެރެ އަކުން ފާޑު ވިދާޅުވާ ޓްރަމްޕް ވިދާޅުވީ، މީގެ ކުރިން އިސްރާއީލާ ދެކޮޅަށް ވާހަކަ ދެއްކުމަކީ ސިޔާސީ ގޮތުން ނުކުރެެވޭނެ ކަމެއް ކަމަށެވެ. އެހެން ނަމަވެސް، މިހާރު އެކަން ވެސް ބަދަލުވެފައިވާ ކަމަށް ޓްރަމްޕް ފާހަަގަ ކުރެއްވި އެވެ.

ޓްރަމްޕް މިހެން ވާހަކަ ދައްކަވާފައި ވާއިރު، ކޮންގްރެސްގައި ހިމެނޭ ޑިމޮކްރަޓްސް ޕާޓީގެ މެންބަރު އެލެކްސެންޑްރިއާ އޮކޮޒިއޯ ކޯޓެޒް އަދި އެހެން މެމްބަރުންގެ އިތުރުން، ޓްރަމްޕް ނިސްބަތްވެ ވަޑައިގަންނަވާ ރިޕަބްލިކަން ޕާޓީގެ މެމްބަރު މާޖަރީ ޓެއިލާ ގްރީން ވެސް ވަނީ އިސްރާއީލްގެ އަމަލުތަކާ ދެކޮޅަށް ވާހަކަ ދައްކަވައިފަ އެވެ.

އިސްރާއީލް އިން ޣައްޒާގައި ހިންގަމުން އަންނަ ހަނގުރާމައާ ގުޅިގެން، އިންޓަނޭޝަނަލް އެސޯސިއޭޝަން އޮފް ޖެނޮސައިޑް ސްކޮލާސް އިން ފާސްކޮށްފައިވާ ޤަރާރެެއްގައި ބުނެފައި ވަނީ، ޣަައްޒާ ގައި އިސްރާއީލް އިން ހިންގަމުން ދަނީ ނަސްލު ނައްތާލުމުގެ ޖަރީމާ އެއް ކަމަށެވެ. އެ ޖަމިއްޔާގެ 500 މެމްބަރުންގެ ތެރެއިން، 86 އިންސައްތަ މެމްބަރުން ވަނީ އެ ޤަރާރަށް ތާއީދު ކޮށްފަ އެވެ.

މީގެ އިތުރުން، އެމެރިކާގެ ކައުންސިލް އޮފް ފޮރިން ރިލޭޝަންސް އިން ބުނާ ގޮތުގައި، އިސްރާއީލް އަކީ އެމެރިކާގެ އެހީތެރިކަން އެންމެ ބޮޑަށް ލިބޭ ޤައުމެވެ. ނަމަވެސް މެދު އިރުމަތީގައި ހިނގަމުންދާ ހަމަ ނުޖެހުންތަކާ ގުޅިގެން، އެމެރިކާ އިން އިސްރާއީލް އަށް ދޭ އެހީތެރިކަން ބޭނުން ކުރެވޭ ގޮތާ މެދު ސުވާލު އުފެދެމުންދާކަން ވެސް ފާހަގަ ކުރެވެ އެވެ.