ހަނގުރާމަ ހުއްޓުވުމަށް ޓްރަމްޕް ކުރާ މަސައްކަތަށް ޔޫރަޕުން ހުރަސްއަޅާ ކަމަށް ރަޝިޔާ އިން ބުނެފި

ރަޝިޔާ އާއި ޔުކްރެއިންއާ ދެމެދު ހިނގަމުން އަންނަ ހަނގުރާމަ ހުއްޓުމަކަށް ގެނައުމަށް، އެމެރިކާގެ ރައީސް ޑޮނަލްޑް ޓްރަމްޕް ކުރައްވަމުން ގެންދަވާ މަސައްކަތަށް ޔޫރަޕުން ހުރަސް އަޅަމުން ގެންދާ ކަމަށް ރަޝިޔާ އިން ބުނެފި އެވެ.

ރަޝިޔާގެ ރިޔާސީ ގަނޑުވަރު، ކްރެމްލިންގެ ތަރުޖަމާނު ޑިމިޓްރީ ޕެސްކޮވް ވިދާޅުވީ، ޔުކްރެއިން އިން ސުލްޙަވެރި ކަމަށް ތައްޔާރުވެފައިވާ ކަމުގެ ހަގީގީ ނިޝާން ތަކެއް ފެންނަންދެން، ރަޝިޔާ އިން އެ ޤައުމުގައި ކުރިއަށް ގެންދާ "ސްޕެޝަލް މިލިޓަރީ އޮޕަރޭޝަން" ކުރިއަށް ގެންދާނެ ކަމަށެވެ.

ރަޝިޔާގެ ސަރުކާރުގެ މީޑިއާއާ ވާހަކަ ދައްކަވަމުން ޕެސްކޮވް ވިދާޅުވީ، "ޔޫރަޕިއަން ޕާޓީ އޮފް ވޯ" އިން ޔުކްރެއިންގެ މައްސަލައިގައި އެމެރިކާ އާއި ރަޝިޔާ އިން ކުރަމުން ގެންދާ މަސައްކަތަށް ހުރަސް އަޅަމުން ގެންދާ ކަމަށެވެ. އޭނާ ވިދާޅުވީ ރަޝިޔާ އިން ބޭނުން ވަނީ، ސިޔާސީ ގޮތުން އަދި ޑިޕްލޮމެޓިކް ގޮތް ތަކުން އެ މައްސަލަ ޙައްލު ކުރަން ކަމަށާއި، އެކަމަށް އެ ޤައުމު އޮތީ ތައްޔާރަށް ކަމަށެވެ.

އެހެން ނަމަވެސް، މިހާތަނަށް އައިއިރު އެކަމުގައި ޔުކްރެއިންގެ ފަރާތުން އެއްބާރުލުމެއް ނުލިބޭކަން ފާހަގަ ކުރައްވައި ޕެސްކޮވް ވިދާޅުވީ، އެ ސަބަބާ ހުރެ ރަޝިޔާގެ ޚާއްސަ އަސްކަރީ އޮޕަރޭޝަން ކުރިއަށް ގެންދާނެ ކަމަށެވެ. އޭނާ ފާހަގަ ކުރެއްވި ގޮތުގައި އެކަމުގައި އެމެރިކާ އާއި ރަޝިޔާ އިން އަންނަނީ ގިނަ މަސައްކަތް ތަކެއް ވެސް ކުރަމުންނެވެ.

ރަޝިޔާގެ ރައީސް ވޮލަޑިމިއަރ ޕުޓިން، ޔުކްރެއިންގެ ހަނގުރާމަ ރަސްމީކޮށް އިއުލާން ކުރައްވާފައި ވަނީ 2022 ވަނަ އަހަރުގެ ފެބްރުވަރީ މަހުގެ ތެރޭގަ އެވެ. މި ހަނގުރާމަ އިއުލާން ކޮށްފައި ވަނީ، އޭގެ ކުރިން އިރުމަތީ ޔުކްރެއިންގައި އަށް އަހަރު ވަންދެން ރަޝިޔާގެ ބާރުދޭ ވަކިވަކި ވެގެންދާ ސަރަހައްދުތަކާއި، ޔުކްރެއިންގެ ސިފައިންނާ ދެމެދު ހިނގަމުން ދިޔަ ހަނގުރާމަ އަށް ފަހު އެވެ.

ރަޝިޔާ-ޔުކްރެއިން ހަނގުރާމައާ ގުޅޭ ގޮތުން މީގެ ކުރިން ވެސް އެމެރިކާ އިން ބުނެފައި ވަނީ، 2022 ވަނަ އަހަރުން ފެށިގެން މިހާތަނަށް އައިއިރު މި ހަނގުރާމައިގައި އެތައް ހާސް ބަޔަކު މަރުވެފައިވާ ކަމަށާއި، ގިނަ އަދަދެއްގެ ބަޔަކަށް ޒަޚަމުތައް ލިބިފައިވާ ކަމަށެވެ.

ޔޫރަޕުގެ ބާރުތަކުން ބުނާ ގޮތުގައި، ރަޝިޔާގެ ރައީސް ޕުޓިން، ސުލްޙަވެރިކަން ޤާއިމު ކުރުމަށް ބޭނުމެއް ނުވެ އެވެ. އެހެން ނަމަވެސް، ޕުޓިން ވިދާޅުވަމުން ގެންދަވަނީ ރަޝިޔާ އިން ވެސް ބޭނުން ވަނީ ސުލްޙަވެރިކަން ޤާއިމު ކުރަން ކަމަށާއި، ރަޝިޔާ އިން ހިފާފައިވާ ޔުކްރެއިންގެ ބިންތައް ދޫކޮށްލުމަށް ވެސް ނުބުނެވޭނެ ކަމަށެވެ.

ރަޝިޔާގެ ޑިފެންސް މިނިސްޓަރު އަންދްރޭ ބެލޯސޯވް ހުކުރު ދުވަހު ވިދާޅުވެފައިވާ ގޮތުގައި، ރަޝިޔާގެ ސިފައިން މިހާރު ވެސް ވަނީ ކުރިއެރުންތަކެއް ހޯދައިފަ އެވެ. އެގޮތުން މިއަހަރު ފެށުނުއިރު މަހަކު 300-400 އަކަ ކިލޯ މީޓަރުގެ ސަރަަހައްދެއް ހޯދަމުން ގެންދިޔަ ނަމަވެސް، މިހާރު މަހަކު 600-700 އަކަ ކިލޯ މީޓަރުގެ ސަރަހައްދު ކޮންޓްރޯލް ކުރަމުން ގެންދާ ކަމަށް އޭނާ ވިދާޅުވި އެވެ.