އުކުޅަހުގައި ބައްޕަ އަށް ވަޅިން ހަމަލާ ދިން ޒުވާނާ އަށް މެންޓަލް ހެލްތް ކެއަރ ޔުނިޓްގައި ފަރުވާ ދެނީ
ހަމަލާދީފައިވަނީ ނަފްސާނީ ބަލި ހުންނަ 26 އަހަރުގެ ޒުވާން ފިނެހެނެއް
އައިޖީއެމްއެޗް
އއ.އުކުޅަހުގައި ބައްޕައަށް ވަޅިން ހަމަލާ ދިން ޒުވާނާއަށް އައިޖީއެމްއެޗްގެ މެންޓަލް ހެލްތް ކެއަރ ޔުނިޓްގައި ފަރުވާ ދޭން ފަށައިފިއެވެ.
ރާއްޖެއެމްވީ އަށް މައުލޫމާތު ލިބިފައިވާ ގޮތުގައި ހަމަލާދީފައިވަނީ 26 އަހަރުގެ ޒުވާން ފިނެހެނެކެވެ. އަދި އޭނާގެ ބައްޕަ 60 އަހަރުން މަތިވާނެއެވެ.
ހޯމަ ދުވަހު ފުލުހުން ބުނީ، އުކުޅަހުގައި ނަފްސާނީ ނުކުޅެދުންތެރިކަން ހުންނަ ފިރިހެނަކު އޭނާގެ ބައްޕައަށް ތޫނު އެއްޗަކުން ހަމަލާދީފައިވައިވާ މައްސަލަ 31 އޮގަސްޓް 2025 ވަނަ ދުވަހުގެ ރޭ 10:20 އެހާކަންހާއިރު ރިޕޯޓުކޮށްފައިވާ ކަމަށެވެ.
އަނިޔާވި މީހާއަށް ސިއްހީ މަރުކަޒުގައި ފަރުވާ ދީފައިވާ ކަމަށާއި، ހާލަތު ސީރިއަސް ނޫން ކަމަށް ޑޮކްޓަރުން މައުލޫމާތު ދީފައިވާ ކަމަށް ފުލުހުން ބުނެއެވެ.
މިމައްސަލަ ފުލުހުން އިތުރަށް ތަހުގީގު ކުރަމުންދާއިރު، މި ހާދިސާއާ ގުޅިގެން އެރަށުގެ ސިއްހީ މަރުކަޒުގެ އިންޗާޖު ސައުދުﷲ ވިދާޅުވީ ވަޅިން ހަމަލާދިން ފިރިހެން މީހާ މާލެއަށް ގެނެސްފައިވާ ކަމަށާއި، އައިޖީއެމްއެޗްގެ މެންޓަލް ހެލްތް ކެއަރ ޔުނިޓްގައި ފަރުވާދޭން ފަށާފައިވާ ކަމަށެވެ. އަދި އޭނާގެ ބައްޕަގެ ބަނޑަށް ވަޅިން ހަމާލާދީފައިވާތީ، އިތުރަށް ޓެސްޓުތައް ހެދުމަށް އައިޖީއެމްއެޗަށް ގެނެސްފައިވާ ކަމަށް ސައުދުﷲ ވިދާޅުވިއެވެ.
މެންޓަލް ހެލްތް ކެއަރ ޔުނިޓްގައި މިހާރު ފަރުވާ ފަށާފައިވާ ޒުވާނަކީ ގަވާއިދުން އިންޖެކްޝަނެއް ޖަހަން ޖެހޭ މީހެކެވެ. ނަމަވެސް މިފަހުން އޭނާ އިންޖެކްޝަން ޖެހުމަށް ދެކޮޅު ހަދަމުންދާތީ، އާދިއްތަ ދުވަހުގެރޭ ސިއްހީ މަރުކަޒުން އޭނާގެ ގަޔަށް އިންޖެކްޝަން ޖެހިއެވެ. އަދި އެކަމާއި ރުޅިގަދަވެ، މީހަކު ނެތް ވަގުތު އޭނާގެ ބައްޕައަށް ހަމަލާ ދިނީ ކަމަށް މައުލޫމާތު ލިބެއެވެ.
ރާއްޖޭގައި ނަފްސާނީ ބައްޔަށް ފަރުވާ ދޭންޖެހޭ މީހުންނަށް އެކަށީގެންވާ ފަރުވާ ނުލިބޭ މައްސަލަ ބޮޑެވެ.
