"ފަހު ދުވަސް" ނަމުގައި ނޫސްވެރިން މަޖިލިސް ދޮށުގައި މުޒާހަރާ ކުރަން ފަށައިފި

މިނިވަން ނޫސްވެރިކަމާއި ހިޔާލުފާޅުކުރުމުގެ މިނިވަންކަން ހަނިކޮށްލާ ގޮތަށް ހުށަހަޅާފައިވާ "މީޑިއާ އެންޑް ބްރޯޑްކާސްޓިން ރެގިއުލޭޝަން" ބިލު ފާސްކުރުމަށް މިއަދު ރައްޔިތުންގެ މަޖިލީހުގައި ބާއްވާ ޖަލްސާއާ ދެކޮޅަށް ނޫސްވެރިން މުޒާހަރާކުރަން ފަށައިފިއެވެ.

މަޖިލީހުގެ ދައުރުން ބޭރުގައި މިއަދު ބާއްވާ ޖަލްސާގެ އިއުލާން މަޖިލީހުގެ އިދާރާއިން ކުރީ އިއްޔެއެވެ. ނަމަވެސް ޖަލްސާގެ އެޖެންޑާއާއި ބާއްވާ ގަޑި މިވަގުތާ ހަމައަށްވެސް ހާމަކޮށްފައެއް ނުވެއެވެ. ނޫސްވެރިން ތަކުރާރުކޮށް މި މައުލޫމާތު ސާފުކުރަން މަސައްކަތްކުރި ނަމަވެސް އެކަށިގެންވާ ޖަވާބެއް ލިބިފައި ނުވާ ކަމަށް ނޫސްވެރިން ބުނެ އެވެ. ނޫސްވެރިން ސުވާލު ކުރުމުން މަޖިލީހުގެ މީޑިއާ ޓީމުން ބުނެފައިވަނީ އެޖެންޑާ ފައިނަލްވުމުން މައުލޫމާތު ހިއްސާކުރާނެ ކަމަށެވެ.

މި ވަގުތު މަޖިލިސް ސަރަހައްދުގެ ގްރީން ޒޯން މުޅިން ބަންދުކޮށް، ގިނަ އަދަދެއްގެ ފުލުހުން އެ ސަރަހައްދުގައި ހަރަކާތްތެރިވަމުން ދެއެވެ. ނޫސްވެރިންނަށް އެ ސަރަހައްދަށް ވަނުމުގެ ފުރުސަތު ފުލުހުން ދީފައި ނުވާއިރު މުޒާހަރާގައި ބައިވެރިވާ ނޫސްވެރިން ގޮވަމުންދަނީ މިނިވަން ނޫސްވެރިކަން ހިމާޔަތްކޮށް، މި ބިލު ބޭރުކޮށްލުމަށެވެ. އަދި މުޒާހަރާގައި ބާއިވެރިވި ނޫސްވެރިންނަށް އެ ސަރަހައްދަށް ނުވަދެވޭގޮތައް ފުލުހުންވަނީ ހުރަސް އަޅައި ބާރުގެ ބޭނުންކޮށްފަ އެވެ.

މީގެ އިތުރުން މަޖިލީހުގެ މެންބަރުން ފާހަގަ ކުރި ގޮތުގައި، މަޖިލީހުގެ ދައުރުން ބޭރުން ބާއްވާ ޖަލްސާގެ އެޖެންޑާ މަޖިލީހުގެ ގަވާއިދާ އެއްގޮތަށް މެންބަރުންނަށް ލިބިފައި ނުވެ އެވެ. އަދި ތުޅާދޫ ދާއިރާގެ މެންބަރު އަބްދުލް ހަންނާނު އަބޫބަކުރު ހުށަހެޅުއްވި މި ބިލަކީ ސަރުކާރުގެ ބިލެއް ނޫން ކަމަށް ބުނަމުންދިޔަ ނަމަވެސް، ބިލު ދިފާއުކުރުމުގެ މަސައްކަތް ކުރަމުންދަނީ ސަރުކާރުންކަން ފާހަގަކޮށްލެވެ އެވެ.

ހޯމަ ދުވަހު މިނިވަން މުއައްސަސާތަކާ ބެހޭ ކޮމިޓީން މި ބިލު ފާސްކޮށްފައިވަނީ ނޫސްވެރިންނާއި އާންމު ރައްޔިތުން ކޮމިޓީއަށް ނުވައްދަ އެވެ. އަދި މަޖިލީހުގެ ގަވާއިދުގައި ކޮމިޓީ އަޑުއަހަން ބޭނުންވާ ފަރާތްތަކަށް ފުރުސަތު ދޭންޖެހޭ ކަމަށް ބަޔާންކޮށްފައި ވީނަމަވެސް، ބިލު ފާސްކޮށްފައިވަނީ ސިއްރު ބައްދަލުވުމެއްގައެވެ.