ރައީސް ޑރ.މުހައްމަދު މުއިއްޒުގެ އޮތީ މިނިވަން މުއައްސަސާތަކަށް ރައީސުން އައްޔަން ކުރެއްވުމުގެ ޓެރެކް ރެކޯޑެއް، ބޭނުންފުޅުވަނީ މީޑިއާ ވެސް އެމަގުން ގެންދަން ކަމަށް ތަޖުރިބާކާރު ނޫސްވެރިޔާ ހިރިގާ އަހުމަދު ޒާހިރު ވިދާޅުވެއްޖެއެވެ.

އޭނާ އެފަދައިން ވިދާޅުވީ މީޑިއާތަކުން ގުޅިގެން ކުރިއަށް ގެންދާ "ކޮންޓްރޯލް ބިލް ބޭރުކުރޭ" ބިލުގައި ވާހަކަދައްކަވަމުންނެވެ. ރައީސް ޑރ.މުއިއްޒު ނޫސްވެރިން ރެގިއުލޭޓް ކުރާ ކޮމިޝަނަކަށް މެމްބަރަކު އައްޔަންކުރަން ބޭނުންފުޅު ނުވާ ކަމަށް ވިދާޅުވި ނަމަވެސް އެ މަނިކުފާނުގެ ޓްރެކް ރެކޯޑް އޮތީ އެހެން ނޫން ކަމަށް އޭނާ ވިދާޅުވިއެވެ.

އޭނާ ވިދާޅުވީ ސެލްފް ރެގިއުލޭޓަރީ ނިޒާމަކީ ރަނގަޅު ނިޒާމެއް ކަމަށް ޤަބޫލުކުރެވޭ ކަމަށެވެ. އަދި ސަރުކާރުގެ ބާރުވެރިކަމާއި އެކު މީޑިއާ ރެގިއުލޭޓް ކުރުމަކީ އެއްވެސް ގޮތަކަށް ބަލައިގަންނަކަމެއް ނޫން ކަމަށާއި އެއީ ތަހުޒީބުކަމެއް ވެސް ނޫން ކަމަށް އޭނާ ވިދާޅުވިއެވެ.

" ބިލް ބޭރެއް ނުކުރި ނޫސްވެރިން އެދުނު ގޮތަށް. މިއީ އާދައިގެ ޤާނޫނެއް ނޫން. ޤާނޫނު އަސާސީން ދީފައިވާ ހައްގެއްގެ އިން ކަނޑައަޅަން މި އުޅެނީ." އޭނާ ވިދާޅުވިއެވެ.

ރާއްޖޭގެ މީޑިއާ އަދި ބްރޯޑްކާސްޓިންގ ރެގިއުލޭޝަން ބިލަކީ ނޫސްވެރިކަމުގެ މިނިވަންކަމަށް ނުރައްކާތެރި ބިލެއް ކަމަށް ބުނެ، ހިއުމަން ރައިޓްސް ވޮޗް އާއި އައި.އެފް.ޖޭ އާއި ސީ.ޕީ.ޖޭ ފަދަ ބޮޑެތި ބައިނަލްއަޤްވާމީ ޖަމިއްޔާތަކުން ރައީސް މުޢިއްޒަށް ވަނީ ސިޓީ އެއް ފޮނުވާފައެވެ.

އޮގަސްޓު 18 ވަނަ ދުވަހު، މި ބިލް ހުށަހެޅީ މިނިވަން މެންބަރެއް ކަމުގައިވާ ތުޅާދޫ ދާއިރާގެ މެމްބަރު ޢަބްދުލް ޙަންނާން އަބޫބަކުރުއެވެ. މި ބިލު ގާނޫނަކަށް ވުމުން، މިހާރު އޮތް މޯލްޑިވްސް މީޑިއާ ކައުންސިލާއި މޯލްޑިވްސް ބްރޯޑްކާސްޓިންގ ކޮމިޝަން އުވާލައި، އަލަށް މީޑިއާ ކޮމިޝަނެއް އުފައްދާނެއެވެ.