ކުރިނބީގެ ތަރައްގީގެ ގިނަ މަޝްރޫއުތަކުގެ އަމަލީ މިއަހަރު ފަށައި، އަންނަ އަހަރު ނިންމާނަން: ރައީސް މުއިއްޒު
ރައީސް މުއިއްޒުގެ މިދަތުރުފުޅުގައި، ކުރިނބީ ސިއްހީ މަރުކަޒުގެ އަލަށް ހަދާ އިމާރާތުގެ މަސައްކަތް ހަވާލުކޮށްފައިވޭ
ރައީސް މުއިއްޒު ހދ.ކުރިނބީ ރައްޔިތުންނާ ބައްދަލުކުރައްވާ ވާހަކަފުޅު ދައްކަވަނީ
ހދ.ކުރިނބީގެ ތަރައްގީގެ ގިނަ މަޝްރޫއުތަކުގެ އަމަލީ މަސައްކަތް ފަށައި، އަންނަ އަހަރު ނިމޭނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
މިމަހުގެ 27 ވަނަ ދުވަހު ކުރިނބީގެ ރައްޔިތުންނާ ބައްދަލުކުރައްވައި ރައީސް މުއިއްޒު ވިދާޅުވީ ރަށު ރައްޔިތުން ތަރައްގީއަށް ބޭނުންވާ ކަންކަމުގައި އަދި ވެފައިހުރި ހުރިހާ ވައުދެއް ފުއްދުމުގައި، ޚާއްސަ އިސްކަމެއްދީގެ މަސައްކަތް ކުރާނެ ކަމަށެވެ.
ކުރިނބީގެ ތަރައްގީގެ ގިނަ މަޝްރޫއުތަކުގެ އަމަލީ މަސައްކަތް މިއަހަރު ފަށައި، އަންނަ އަހަރު ނިންމާނެ ކަމުގެ ޔަގީންކަން އެމަނިކުފާނު ދެއްވިއެވެ.
ބަނދަރުގެ މަޝްރޫއަށް އިޝާރަތް ކުރައްވައި ރައީސް މުއިއްޒު ވިދާޅުވީ ބަނދަރުގެ މަސައްކަތް ކުރިއަށްގެންދާނީ ރައްޔިތުން އެދޭގޮތަށް ކަމަށެވެ. ރައްޔިތުން އެދޭ ބަދަލުގެ އިތުރުންވެސް ބަނދަރުގެ މަސައްކަތް ނިމިގެންދާއިރު، ދެވަނަ ފިޔަވައްސެއްގެ ގޮތުގައި މޫދަށް އެރޭ ސަރަހައްދަކާއި، އޮޑި އެހެލާނެ ސަރަހައްދެއްގެ އިތުރުން ގޮނޑުދޮށް ހިމާޔަތްކުރުމުގެ މަސައްކަތް ކުރާނެ ކަމުގެ ޔަގީންކަން ރައީސް މުއިއްޒު ދެއްވިއެވެ.
އަޅުގަނޑު ދަންނަވާލަން ބޭނުންވަނީ، ތިޔަބޭފުޅުންގެ ތަރައްޤީއަށް ބޭނުންވާ ކަންކަމުގައި އަދި އަޅުގަނޑު ވެފައިހުރި ހުރިހާ ވަޢުދެއް ފުއްދުމުގައި، އަޅުގަނޑުމެން ވަރަށްވަރަށް އިސްކަމެއްދީގެން، ކާމިޔާބުކަމާއެކީގައި ކުރިއަށް ގެންގޮސްދޭނެ ކަމުގެ ޔަޤީންކަން އަދިވެސް އަރުވާ ވާހަކަ. މި ގިނަ މަސައްކަތްތައް މިހާރު މި ފެށިގެން ގޮސް، މި އަންނަ އަހަރު ތެރޭގައި، މީގެ ގިނަ ކަންކަން ނިމިގެންދާނެ. އެންމެ ބޮޑެތި ކަންކަމުގެ ތެރޭގައި މި ހިމެނެނީ، ބަނދަރާ ގުޅިފައި ހުރި މި ހުރިހާ ކަމެއް. މިކަންކަން އިރާދަކުރެއްވިއްޔާ މި ދެންނެވި ގޮތަށް ގެންދެވޭނެ. އަދިވެސް އަޅުގަނޑު ވެފައިހުރި ބައެއް ވަޢުދުތައް އެބަހުރި. މަގު ހެދުމާއި، މިކަހަލަ ބައެއް ކަންތައްތައްވެސް. ކުނި މެނޭޖް ކުރުމުގެ މަރުކަޒުވެސް އެބައޮތް. އެވެސް އަޅުގަނޑު ވެފައި އޮތް ވައުދެއް.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރައީސް މުއިއްޒުގެ މިދަތުރުފުޅުގައި، ކުރިނބީ ސިއްހީ މަރުކަޒުގެ އަލަށް ހަދާ އިމާރާތުގެ މަސައްކަތް އެމް.ޓީ.ސީ.ސީ.އާ ވަނީ ހަވާލުކުރައްވާފައެވެ. މި އިމާރާތާއި އެކު ސިއްހީ މަރުކަޒުން އިތުރު ޚިދުމަތް ދެވޭގޮތަށް ޖާގަ ފުރިހަމަވެގެންދާނެ ކަމަށް ރައީސް މުއިއްޒު ވިދާޅުވިއެވެ.
އެގޮތުން އިތުރު ވޯޑުތަކާއި، ލެބޯޓްރީ އަދި ޕަބްލިކް ހެލްތު ޔުނިޓްފަދަ ޚިދުމަތް އިތުރުވެގެންދާނެ ކަން ފާހަގަކުރައްވައި އެ މަނިކުފާނު ވިދާޅުވީ އިމާރާތުގެ މަސައްކަތް ނިމުމުގެ ކުރިންވެސް 16 ގަޑިއިރަށް ޚިދުމަތް އިތުރުކުރުމަށް، ބޭނުންވާ މުވައްޒަފުން ހޯދައި މިއަހަރު އެ ޚިދުމަތްދެވޭތޯ މަސައްކަތް ކުރައްވާނެކަމަށެވެ. އަދި ސިއްހީ މަރުކަޒުގެ މަސައްކަތް ނިމުމުން ސައުވީސް ގަޑިއިރަށް ޚިދުމަތް ދެވޭނެކަމުގެ ޔަގީންކަން ދެއްވިއެވެ.
ކުޅިވަރުގެ ދާއިރާއިން ކުރައްވާ މަސައްކަތްތަކާއި ގުޅޭގޮތުން ވާހަކަފުޅުދައްކަވަމުން އެމަނިކުފާނު ވިދާޅުވީ ފުޓްބޯޅަ ދަނޑަކާއި، ފުޓްސަލް ދަނޑެއްގެ އިތުރުން، ހޭންޑްބޯލް ކޯޓެއްވެސް ކުރިނބީގައި އަޅުއްވާނެކަމަށެވެ. އެގޮތުން، ފުޓްސަލް ދަނޑު މިއަހަރު ނިންމަވާނެ ކަމުގެ ޔަގީންކަން އެމަނިކުފާނު ރައްޔިތުންނަށް ދެއްވިއެވެ.
ރައީސް މުއިއްޒު މިމޭރުމުން ވާހަކަފުޅު ދެއްކެވިއިރު، 26 ފެބުރުވަރީ 2024 ގައި އެރަށުގެ ކައުންސިލްއާ ބައްދަލުކުރައްވައި ތަރައްގީގެ މަޝްރޫއުތައް ކުރިއަށް ގެންދަވާނެކަމުގެ ފުރިހަމަ ޔަގީންކަން ދެއްވާފައިވެއެވެ. ނަމަވެސް އަހަރަކަށްވުރެ ގިނަ ދުވަސްވެގެން ދިޔައިރުވެސް ރައްޔިތުންގެ އެދޭ ގޮތަށް އެއްވެސް މަސައްކަތެއް ކޮށްފައިނުވެއެވެ.
