މި ސަރުކާރުން ދަނީ ދެއްކުންތެރިކަމުގައި ރައްޔިތުންގެ ފައިސާ ހުސްކުރަމުން: މެންބަރު ޝަމްހީދު
30 އޯގަސްޓު 2025 | ހޮނިހިރު 07:09މިއަހަރުގެ މިހާތަނަށް ގާތްގަނޑަކަށް 60 ބިލިއަންއާ ގާތަށް ހޭދަކޮށްފައިވާ ކަމަށް ބެލެވޭ
ރާއްޖެޓީވީގެ ޕްރޮގްރާމެއްގައި ހުޅުމާލޭ ދެކުނު ދާއިރާގެ މެންބަރު ޑރ.އަހްމަދު ޝަމްހީދު ވާހަކަ ދައްކަވަނީ
ރައީސުލްޖުމްހޫރިއްޔާ ޑރ.މުހައްމަދު މުއިއްޒުގެ ސަރުކާރުން ދެއްކުންތެރިކަމުގައި ރައްޔިތުންގެ ފައިސާ ހުސްކުރަމުންދާ ކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ.އަހްމަދު ޝަމްހީދު ވިދާޅުވެއްޖެ އެވެ.
ރާއްޖެޓީވީގެ ފަލަސުރުކީ ޕްރޮގްރާމްގައި މެންބަރު ޝަމްހީދު ވިދާޅުވީ މިސަރުކާރުން ހުރިހާ މަސައްކަތްތަކެއް ކުރަމުންދަނީ ދެއްކުންތެރިކަމާއެކު ކަމަށާއި، އެއުސޫލުގެ ދަށުން މަސައްކަތްކޮށް، ދެއްކުންތެރިކަމަށް ރައްޔިތުންގެ ފައިސާ ހުސްކުރަމުންދާ ކަމަށެވެ.
މެންބަރު ޝަމްހީދު ވިދާޅުވީ މި ސަރުކާރުގެ ފުރަތަމަ އަހަރު 56 ބިލިއަން ރުފިޔާ ހޭދަކޮށްލާފައިވާ ކަމަށާއި، މިއަހަރުގެ މިހާތަނަށް ގާތްގަނޑަކަށް 60 ބިލިއަންއާ ގާތަށް ހޭދަކޮށްފައިވާ ކަމަށް ބެލެވޭ ކަމަށެވެ. ނަމަވެސް ރައްޔިތަކަށް އަދި ގައުމަށް މިސަރުކާރުން ކޮށްދިން އެއްވެސް ކަމެއް ނެތް ކަމަށާއި، ރައްޔިތަކަށް ލިބުނު ލުޔެއް ނެތް ކަމަށް މެންބަރު ޝަމްހީދު ވިދާޅުވި އެވެ.
ވެލާނާ އިންޓަރނޭޝަނަލް އެއަރޕޯޓުގެ އައު ޓާމިނަލް ހުޅުވުމުގެ ރަސްމިއްޔާތަށް އިޝާރާތް ކުރައްވައި މެންބަރު ޝަމްހީދު ވިދާޅުވީ އައު ޓާމިނަލް ހުޅުވައި، ބޮޑު ރަސްމިއްޔާތެއް ބާއްވައި ހަވާ އަރުވާފައިވަނީ ދެއްކުންތެރިކަމާއެކު ކަމަށެވެ. އައު ޓާމިނަލްގެ މަސައްކަތް ނުނިމޭ ކަމަށާއި، ރައްޔިތުންނަށް ލުއިފަސޭހަ ކަމެއް ނުލިބޭ ކަމަށް މެންބަރު ޝަމްހީދު ވިދާޅުވި އެވެ.
އަޅުގަނޑުމެންނަށް ފެނިގެންދިޔަ އެއަރޕޯޓު ހުޅުވުމުގެ ރަސްމިއްޔާތު އެއާޕޯޓު ހޮޅުވުމުގެ ރަސްމިއްޔާތަށް ދެތިން ސަތޭކަ މިލިއަން ރުފިޔާ ހަމަ ދެގަޑިއެއްހާއިރު ހޭދަ ކޮށްނިންމާލީ. އަޅުގަނޑު އިހަށް ދުވަހު މިއައީ އެއަރޕޯޓުން. ލަގެޖަށް އަޅުގަނޑު މަޑު ކުރަން ޖެހުނު ދޮޅުގަޑިއިރު. ހަމައެއްކަލަ ބާ ބެލްޓް ބޭނުންކުރަން ޖެހުނީ. އެހެންވީމަ އެބަ އެނގޭ ނުނިމޭ ތަނެއް ހަމަ ދެއްކުމުގެ ގޮތުން ހަމަ ކަންދައްކަންވެން ހުޅުވީކަން. ބޮޑެތި ހަފްލާތައް ބާއްވައިގެން ވޯލްޑް ރިކޯޑު ހަދަން. މިއީ ކިހައި ބޮޑު ޖޯކެއްތޯ. އެންމެ ގިނައިން އެފަހަރާ ހަވާ އެރުވި ގައުމަކަށްވާން އަޅުގަނޑުމެންވާން ދެތިންސަތޭކަ މިލިއަން ރުފިޔާ ހޭދަކޮށްލަން. އަޅުގަނޑުމެން މިއުޅެނީ ބޭސްފަރުވާއަށް ދޭން ޖެހޭ 200 ޑޮލަރު ނުދެވިގެން. ރަށްރަށަށް ވަޑައިގަންނަވާއިރު ރައްޔިތުން މަގުމައްޗަށް ނެރުވައިގެން ސަފުހަދައިގެން އެ ފޮޓޯގަނޑު ދެއްކިޔަސް އެއީ ވޯޓު ލިބޭނެ ކަމެއް ނޫން. ރައްޔިތުންގެ ލޮއެއްބެއް ވެސް އެގޮތަކަށް ނުލިބޭނެ.ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެންބަރު ޑރ.އަހްމަދު ޝަމްހީދު
މެންބަރު ޝަމްހީދު ވިދާޅުވީ ދެއްކުންތެރިކަމުގައި ކަންކަން ކުރަމުންދާއިރު، މިސަރުކާރުގައި ގައުމު ދަނީ ފަހަތަށް ކަމަށާއި، މަސައްކަތް ކުރަނީ ރައްޔިތުންގެ ހައްގުތައް ނިގުޅައިގަތުމަށް ކަމަށެވެ. އަދި ކުރިން ލިބުނު ޚިދުމަތްތައް ނުލިބޭ ކަމަށް އޭނާ ވިދާޅުވި އެވެ.
އެގޮތުން ކުރިން ލިބުނު ބޭސް ނުލިބޭ ކަމަށާއި، ގައުމުގައި ސަލާން ޖަހާ މީހުން ގިނަ ކޮށްފައިވާ ކަމަށެވެ. އަދި ކޮންޓްރެކްޓަރުންނަށް ސަރުކާރުން ދޭންޖެހޭ ފައިސާ ނުދީ ހިފަހައްޓާފައިވާ ކަމަށް އޭނާ ވިދާޅުވިއެވެ. މެންބަރު ޝަމްހީދު ވިދާޅުވީ ރާއްޖެއިން ބޭރުގައި ކިޔަވަމުންދާ ބައެއް ދަރިވަރުންނަށް ފައިސާ ދެއްކޭނެ ގޮތެއް ނެތި، ބައެއް ދަރިވަރުން ރާއްޖެއަށް ބަދަލުވެފައިވާ ކަމަށެވެ.
މީގެ އިތުރުން މެންބަރު ޝަމްހީދު ވިދާޅުވީ މުއައްސަސާތަކާއި، ކުންފުނިތަކުގެ މެންޑިޑޭޓުން ބޭރުން މަސައްކަތްތައް ހަވާލުކޮށް، ގައުމު ބޮޑު ޖޯކަކަށް ހަދާފައިވާ ކަމަށެވެ.
މެންބަރު ޝަމްހީދު ވިދާޅުވީ މިދައުރު ނިމުމާއެކު، ރައީސް މުއިއްޒުގެ ލަގަސީ ވެސް ތާރީހުގައި ލިޔެވޭނެ ކަމަށާއި، ގައުމާއި، ރައްޔިތުންނަށް ކޮށްދިން ކަންކަމާއި މެދު ސުވާލު އުފައްދާނެ ކަމަށެވެ.
