އެމްޓީސީސީ އަށް ވަރި ކައިވެނީގެ ކަންކަން ހަވާލު ކުރިޔަސް ހައިރާން ނުވޭ: ކުރީގެ އެމްޕީ ސައްލެ
ދިވެހިން ބުރަ މަސައްކަތުން ބިނާކުރި ހުރިހާ އިންސްޓިޓިއުޝަންތަކެއް ބިމާ ހަމަކޮށްލައިފި
ހުކުރު ދުވަހުގެރޭ އެމްޑީޕީ އިން ބޭއްވި ކަންމަތީ ބައްދަލުވުމުގައި ހޯރަފުށި ދާއިރާގެ ކުރީގެ މެމްބަރު އަހްމަދު ސަލީމް ވާހަކަ ދައްކަވަނީ
ދިވެހިރާއްޖެ މިހާރު މި ފެނިގެން މިދަނީ އެއްވެސް އިންތިޒާމެއް ނެތް ތަނެއްގެ ގޮތުގައިކަން ފާހަގަ ކުރައްވާ، ވަރިކައިވެނީގެ ކަންކަން އެމްޓީސީސީ އާ ހަވާލުކުރިޔަސް ރައްޔިތުން ހައިރާން ނުވުމަށް ރައްޔިތުންގެ މަޖިލީހުގެ ހޯރަފުށި ދާއިރާގެ ކުރީގެ މެމްބަަރު އަހުމަދު ސަލީމް (ސައްލެ) ވިދާޅުވެއްޖެއެވެ.
ހުކުރު ދުވަހުގެ ރޭ އެމްޑީޕީ އިން ބޭއްވި ކަންމަތީ ޖަލްސާގައި ވާހަކަ ދައްކަވަމުން ސައްލެ ވިދާޅުވީ، ބޭރު މީހުންގެ ކުރިމަތީ ދިވެހިރާއްޖެ ޖޯކަކަށްވެ ނިމެން ދިވެހިން ބޭނުން ނުވާކަމުގައެވެ. ނަމަވެސް މިހާރު މި ފެނިގެންދަނީ އެތައް ޒަމާނަކުން ފެށިގެން، ލައްކަ ގިނަ މަސައްކަތުން ދިވެހިން ބިނާކުރި ހުރިހާ އިންސްޓިޓިއުޝަން ތަކެއް ބިމާ ހަމަކޮށްލާފައިވާ މަންޒަރުކަމަށް ސައްލެ ވިދާޅުވިއެވެ.
ފެނަކައިން އަޅަނީ މިސްކިތް، އެއަރޕޯޓް ކުންފުނިން އަޅަނީ ޖިމް. ހައިރާންވެވަޑައި ނުގަންނަވާތި އެމްޓީސީސީ އާ ވަރި ކައިވެނީގެ ކަންކަން ހަވާލު ކުރިޔަސްހޯރަފުށި ދާއިރާގެ ކުރީގެ މެމްބަރު އަހްމަދު ސަލީމް
މިއަދު މިރާއްޖޭގައި ހެޔޮވެރިކަމެކޭ ބުނާނެ އެއްވެސް ސިފައެއް ދައްކަން ނެތްކަން ފާހަގަ ކުރައްވާ ސައްލެ ވިދާޅުވީ، ދުނިޔޭގެ ގައުމު ތަކުގެ ކުރިމަތީގައި މިގައުމަށް އުފެއްދި އިތުބާރު ވެއްޔާ މޮޑެވިގެންގޮސް މިއަދު މިގައުމަށް އިތުބާރުކޮށްފަ ފައިސާ ފޮއްޗެއް ދިއްކޮށްލާނެ ބޭރުގެ އެހީތެރިވާނެ މުވައްސަސާއެއް ނެތި، ގައުމު ނިކަމެތި ވެއްޖެ ކަމުގައެވެ.
އެމްޑީޕީ އިން އަލުން ތެދުވެ ސަފުތައް ރުކުރުވާލާ އެކީ އެކެއްޗެއްގެ ގޮތުގައި މަސައްކަތަަށް އަލުން ތެދުވާން މިޖެހުނީ ގައުމު މި ވެއްޓެމުންދާ ވަޅުގަނޑުގެ ސަބަބުން، ކޮންމެ ގޮތެއް އެމްޑީޕީއަށް ވަރިހަމަނުވުމުން ކަމަށް ސައްލެ ވިދާޅުވިއެވެ.ދިވެހި ރައްޔިތުންނަށް އަބުރުވެރި ދިރިއުޅުމެއް އުޅެވެން ޖެހޭނެ ކަމަށާއި، ޚިޔާލު ފާޅުކޮށް ކަމުނުދަންޔާ ކަމުނުދާ ވެރިމަކެއްގެ ވާހަކަ މިނިވަންކަންމަތީ ބުނެވެން ޖެހޭނެ ކަމަށް ސައްލެ ފާހަގަ ކުރެއްވިއެވެ. އަދި މި ނޫން ގޮތަކަށް ގައުމު ކައްސާލައިގެން ދާތަން ބަލަން، ހުރިހާ ކަމެއް ވަރިހަމަވެގެން އެމްޑީޕީ އިން ނުތިބޭނެ ކަން ސައްލެ ވަނީ މި ސަރުކާރަށް ހަނދާން ކޮށްދެއްވާފައެވެ.
މި ސަރުކާރުން ފަހަރަކު މުއައްސަސާއެއް ކޮށަމުން ބިމާ ހަމަކުރަމުން ގޮސް، މިހާރު ކަނޑި ހިފައިގެން އެނިކުތީ ރާއްޖޭގެ މިނިވަން މީޑިޔާއާ ދިމާލަށް ކަމަށް ފާހަގަ ކުރައްވާ ސައްލެ ވިދާޅުވީ، ރައްޔިތުން އަޅުވެތި ކުރުވަން ބޭނުންވި ކޮންމެ ވެރިޔަކު ހިޔާލުފާޅު ކުރުމާ ދެކޮޅުހެދިކަން ދިވެހި ތާރީހުން ސާފުވާކަމުގައެވެ. ނަމަވެސް މިނިވަން ހިޔާލު ޑަބިޔަލަށް އަޅާ މަތިޖަހައިގެން ގެންގުޅުނު ޒަމާން މިހާރު ހިނގައްޖެ ކަމާއި، ދެން މިރާއްޖޭގަ މި އޮތް މިނިވަން މީޑިޔާއާ، މިނިވަން ހިޔާލާ، މިނިވަން ފިކުރު، މިނިވަން ބަސްބުނުމުގެ ހައްގު ކަނޑު ފެއްތޭނެ ކަމަކަށް ގަބޫލު ނުކުރެވޭކަމުގައެވެ.
އަޅުގަނޑުމެންގެ މުވައްޒަފުން ގައިގަ ތެޅީ، މަރުގެ ހަމަލާދިން، ރޯކުރި، އަނދާ އަޅިޔަށް ހަދާލި. އަޅުގަނޑުމެން ހުއްތުނުތޯ؟ އެހެންވާ ކަމެއް ނޫން އެއީކީ. މިނިވަން ޚިޔާލުގައި މިނިވަން ފިކުރުގައި އަތް އަޅަން އުޅޭ ކޮންމެ މީހަކު އޭނަ އަމިއްލައަށް ގޮސް އެބެދެނީ ދަންތުރައެއްގަހޯރަފުށި ދާއިރާގެ ކުރީގެ މެމްބަރު އަހްމަދު ސަލީމް
މިނިވަން މީޑިޔާ ނެތިކޮށްލުމުގެ ފުރުސަތު މިރާއްޖޭގައި ދެން އެއްވެސް ފަރާތަކަށް ނޯންނާނެ ކަމަށާއި އަދި ގައުމަށް ދިމާވާ އެފަދަ ކޮންމެ ހާލަތެއްގައި އެމްޑީޕީއިން ތެދުވާނެކަމުގެ ޔަގީންކަން ސައްލެ ދެއްވާފއިވެއެވެ. މިނިވަން ޚިޔާލު އަދި މިނިވަން ފިކުރުގަ އަތްއަޅަން އުޅޭ ކޮންމެ މީހަކު، އޭނާ އަމިއްލައަށް އެބެދެނީ ދަންތުރައެއްގަކަން ތާރީހު ހެކިދޭކަމަށް ސައްލެ ފާހަގަ ކުރެއްވިއެވެ.
