2024 ވަނަ އަހަރު ސްޓެލްކޯ އަށް ލިބުނު ބޮޑު ފައިދާގެ އަސްލަކީ ރައްޔިތުންގެ ކަރަންޓު ބިލުން ކުރި ބޮޑު ވައްކަން: ޣަފޫރު
ސްޓެލްކޯއިން 2023 ގައި 175 މިލިއަން ގެއްލުންވެ، 2024 ގައި 300 މިލިއަން ރުފިޔާގެ ފައިދާ ނެގީ ރައްޔިތުންގެ ކަރަންޓު ބިލުން ކުރި ވައްކަމުން
ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ: ވިދާޅުވީ މި ސަރުކާރަށް ކުރަން އެނގޭ ހަމަ އެކަނި ކަމަކީ ވައްކަން ކަމަށް
2023 ވަނަ އަހަރު ސްޓެލްކޯއިން 175 މިލިއަން ގެއްލުން ވެފައިވާއިރު، 2024 ވަނަ އަހަރު 300 މިލިއަން ރުފިޔާގެ ފައިދާ ނެގީ ރައްޔިތުންގެ ކަރަންޓު ބިލުން ކުރި ބޮޑު ވައްކަމުން ކަމުގައި ރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ ވިދާޅުވެއްޖެއެވެ.
ޣަފޫރު މިފަދައިން ވިދާޅުވީ ހުކުރު ދުވަހުގެ ރޭ އިދިކޮޅު ޕާޓީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އިން ބޭއްވި ކައްމަތީ އެއްވުމުގެ ޖަލްސާގަ އެވެ.
ރައީސް ޑރ މުހައްމަދު މުއިއްޒުގެ މި ސަރުކާރު އައިފަހުން މިހާރު ދެއަހަރު ވެގެން ދިޔަ އިރުގައި ވެސް ގާބުރިއެއްގެ މިންވަރު ވެސް ބާއްވާފައި ނުވާކަން ފާހަގަކުރައްވައި ގަފޫރު ވިދާޅުވީ ދައުލަތުގެ ފައިސާއިން 110 ބިލިއަން ރުފިޔާ ޚަރަދުކޮށް ހުސްކޮށްލާފައިވާ ކަމަށާއި އެހެން ނަމަވެސް ރާއްޖޭގެ އެއްވެސް ރަށެއްގައި އެއްވެސް ޕްރޮޖެކްޓެއް ކުރިޔަށް ނުގެންދާ ކަމަށެވެ.
ޣަފޫރު ވިދާޅުވީ 110 ބިލިއަން ރުފިޔާ ދުއްވާލައިގެން މި ސަރުކާރަށް ކުރެވިފައި ހުރި ހަމަ އެކަނި ކަމަކީ އެއް ނަމްބަރު ފާލަން ހެދުން އެކަނި ކަމަށެވެ. އެ ނޫން އެއްވެސް ކަމެއް މި ސަރުކާރަށް ކުރެވިފައި ނުވާ ކަމަށް ޣަފޫރު ވިދާޅުވި އެވެ.
އަޅުގަނޑުގެ ގާތުގައި ހއ އަތޮޅުގެ މީހަކު، އަޅުގަނޑު ކެފޭއެއްގައި އިންދާ އައިސް ބުނީ ކޮއްކޯއޭ މި ޅެން ބަހުރުވައިން މި ފަރުވާދޭ މިނިސްޓްރީގެ ބޭފުޅުން ނުވަ ގަޑީގެ ސަޔަށް އަންނައިރު، ހީވަނީ ހުވަހަންދޫ ބޭރަށް ރެހި އަރާފައި އޮންނަހެންނޭ. ހަމަ އެބޭފުޅާ ވިދާޅުވި ގޮތަށް އަޅުގަނޑު މި ބުނީ. ޅެންބަހުން ފަރުވާދޭ މިނިސްޓްރީގެ ސިޔާސީ މަގާމުތަކުގައި ތިއްބަވާ ބޭފުޅުން، އެބޭފުޅުން އޮފީސްކައިރީގައ ޗާންދަނީމަގު ހަތަރުއަނގޮޅި ކަންމަތީގައި ހުން ކެފޭއަކަށް ވަންނަ އިރު ހީވަނީ ހުވަހަންދޫ ބޭރަށް ރެހިއަރާފަ އިރުވާ މޫސުމގައި އޮންނަހެންނޭ. ދެން ތިބޭފުޅުން ވިސްނަވާ. މީކީ ސަމާސާ ވާހަތަކެއް ނޫން. އަޅުގަނޑު މިބުނާ އަދަދަށް ރައްޔިތުންގެ ފައިސާއިން ޚަރަދުވެއްޖެރައްޔިތުންގެ މަޖިލީހުގެ ހަނިމާދޫ ދާއިރާގެ މެމްބަރު އަބްދުލް ޣަފޫރު މޫސާ
ކަން މިހެންހުރިއިރު، ގައުމެއް ލޫޓުވަމުން ދާއިރު ބަލަން ތިބެގެން ނުނާނޭ ކަމަށް ޣަފޫރު ވިދާޅުވި އެވެ.
އޭނާ ވިދާޅުވީ މި ސަރުކާރުން ސްޕްރީމް ކޯޓުގައި އަތްލިފަހުން ފަހަރަކު އެއްޗަކަށް ފަހު އެއްޗެއް ހަލާކުރަމުން ދާނެކަން ދަންނަންޖެހޭ ކަމަށެވެ. އެގޮތުން މިއަދު މިއޮތީ މިޑިއާ އާއި ޖެހިފައި ކަމަށާއި އެގޮތުން މި ސަރުކާރުން އެދަނީ އެމީޙުން ބޭނުންވާ ގޮތަށް މީޑިއާ ބައްޓަން ކުރުމުގެ މަސައްކަތް ކުރަމުން ކަމަށް ޣަފޫރު ވިދާޅުވި އެވެ.
ޣަފޫރު ވިދާޅުވީ މި ސަރުކާރުން ކުރަމުން މި ގެންދާ ކަންކަން ނުހުއްޓުވައި ފަހަތަށް ޖެހިގެން ތިބެއްޖެ ނަމަ ދެން މި ގައުމު އަތު ނުވާނޭ ކަމަށެެވެ. އެހެންކަމުން މި ސަރުކާރު ހަމަމަގަށް އެޅުވުމަށް ނުކުންނަން އެބަޖެހޭ ކަމަށް އޭނާ ވިދާޅުވި އެވެ.
ގަފޫރު ވިދާޅުވީ މި ސަރުކާރަށް ރައްޔިތުންނަށްޓަކައި، ގައުމަށް ޓަކައި ކޮށްދެވޭނޭ އެއްވެސް ކަމެއް ނެތް ކަމަށާއި މި ސަރުކާރަށް ހަމަ އެކަނި ކުރަން އެނގޭ ކަމަކީ ވައްކަން ކުރުން ކަމަށެވެ.
ޣަފޫރު ވިދާޅުވީ 2023 ވަނަ އަހަރު ސްޓެލްކޯއިން 175 މިލިއަން ރުފިޔާގެ ގެއްލުންވެފައިވާ ކަމަށެވެ. އެހެން ނަމަވެސް ޖެހިގެން އައި 2024 ވަނަ އަހަރު 300 މިލިއަން ރުފިޔާފެ ފައިދާއެއް ސްޓެލްކޯއަށް ލިބުނު ކަމަށާއި އެއީ މި ސަރުކާރުން ރައްޔިތުންގެ ކަރަންޓު ބިލުން ކުރި ބޮޑުވައްކަންތަކުން ލިބުނު ފައިދާ ކަމަށް ޣަފޫރު ވިދާޅުވި އެވެ.
ޣަފޫރު ވިދާޅުވީ ސްޓެލްކޯ އަށް އެހާ ބޮޑު ގެއްލުމެއް ލިބިފައި އޮވެ ކުއްލިއަކަށް އެ ހާބޮޑު ފައިދާއެއް ލިބޭނޭ އިތުރު ވަސީލަތެއް މި ސަރުކާރަށް ނެތް ކަމަށާއި އެއީ ސީދާ ކަރަންޓު ބިލުން ކުރި ބޮޑު ވައްކަމުން ލިބުނު ފައިދާއެއް ކަމަށެވެ.
މި ވައްކަން މި ސަރުކާރުން ކުރަނީ ކަރަންޓު ބިލްތައް އޮޅުވާލައިގެން ކަމަށާއި މިހާރު އެ ވައްކަން ރަށްރަށުގައި ވެސް ކުރަމުން ގެންދާ ކަމަށް ޣަފޫރު ވިދާޅުވި އެވެ.
