ވޯޓަރ ތީމް ޕާކުގައި މަރުވެފައި އޮއްވާ ފެނުނީ ނޭޕާލު ޒުވާނެއް
28 އޯގަސްޓު 2025 | ބުރާސްފަތި 06:11ހުޅުމާލޭ ވޯޓަރ ތީމް ޕާކުން މަރުވެފައި އޮއްވާ ފެނުނު މީހާ އަކީ ނޭޕާލްގެ ރުޕަން ތަޕާ މަގަރް
ހުޅުމާލެ ވޯޓަރ ތީމް ޕާކު ސަރަހައްދުގައި ފުލުހުންގެ ވެހިކަލްއެއް މަޑުކޮށްލައިގެން
ހުޅުމާލޭގައި ހަދަން ފަށާ ހުއްޓިފައި ހުރި ވޯޓަރ ތީމް ޕާކު ތެރޭގައި މަރުވެފައި އޮއްވާ ފެނުނީ ނޭޕާލު ޒުވާނެއް ކަމަށް ފުލުހުން ބުނެފިއެވެ.
މި މަހުގެ 25 ވަނަ ދުވަހު ފުލުހުން ބުނީ ހުޅުމާލެ ވޯޓަރ ތީމް ޕާކް ހަދަން ދޫކޮށްފައިވާ ސަރަހައްދުގައި މަރުވެފައި އޮތް މީހަކު ފެނިފައިވާ ކަމަށެވެ. އަދި އެއީ ފިރިހެނެއް ކަމަށް ފުލުހުން އެއިރު ބުނެފައިވެއެވެ.
އަދި މަރުވެފައި އޮއްވާ ފެނުނު މީހާ އަކީ މި މަހުގެ 21 ވަނަ ދުވަހުން ފެށިގެން ގެއްލިގެން ހޯދަމުންދާ ބިދޭސީ މީހާ ކަމަށް ބެެވިދާނެ ކަންކަން ތަހުގީގަށް މިހާތަނަށް ހޯދިފައިވާ ކަމަށް އަންގާރަ ދުވަހު ފުލުހުން ބުނެފައިވެއެވެ. އަދި ހަށިގަނޑު އޮތީ ކުނިވެފައި ކަމަށްވެސް ފުލުހުން ބުނެއެވެ.
ބުދަ ދުވަހުގެ ރޭ ފުލުހުުން ފޮނުވި މެސެޖުގައި ބުނެފައިވަނީ ވޯޓަރ ތީމް ޕާކުގައި މަރުވެފައި އޮއްވާ ފެނުނީ 21 ވަނަ ދުވަހުން ފެށިގެން ގެއްލިގެން ހޯދަމުން ދިޔަ ނޭޕާލް އަށް ނިސްބަތްވާ ރުޕަން ތަޕާ މަގަރް (29އ) ކަން ފޮރެންސިކް ތަހުލީލުތަކުން ކަށަވަރު ކުރެވިފައިވާ ކަމަށެވެ.
އަދި މިހާތަނަށް ބެލި ބެލުމުން އޭނަ މަރުވުމުގައި ތުހުމަތުކުރެވޭ އެއްވެސް ކަމެއް ކުރެވިފައިނުވާ ކަމަށް ފުލުހުން ބުނެއެވެ. އަދި މި މައްސަލަ އަންނަނީ ތަހުގީގުކުރަމުންނެވެ.
