ސަރުކާރު ބަދަލުވި ގޮތަށް މަކުނުދޫ އެއަރޕޯޓުގެ މަސައްކަތް ހުއްޓިފައި
25 އޯގަސްޓު 2025 | ހޯމަ 18:37އެއަރޕޯޓަށް ބޭނުންވާ ބިން ހިއްކާފައި އޮންނަތާ އަހަރަކަށްވުރެ ގިނަ ދުވަސްވެއްޖެ
މަކުނުދޫ ކައުންސިލްގެ ރައީސް އައުޒަމް އާދަމް
ސަރުކާރު ބަދަލުވިފަހުން ހދ. މަކުނުދޫ އެއަރޕޯޓުގެ މަސައްކަތް ހުއްޓުނު ގޮތަށް އެތަނުގެ މަސައްކަތް ނުފަށާ ކަމަށް އެރަށު ކައުންސިލްގެ ރައީސް އައުޒަމް އާދަމް ވިދާޅުވެއްޖެ އެވެ.
ރާއްޖެޓީވީގެ 'ހާލު ކިހިނެއް' ޕްރޮގްރާމުގައި ވާހަކަ ދައްކަވަމުން އައުޒަމް ވިދާޅުވީ އެއަރޕޯޓަށް ބޭނުންވާ ބިން ހިއްކާފައި އޮންނަތާ އަހަރަކަށްވުރެ ގިނަ ދުވަސްވެއްޖެ ކަމަށެވެ. އަދި ބިން ހިއްކުމަށްފަހު ޖިއޯބޭގް ޖެހުމުގެ މަސައްކަތް ވެސް ފެށި ކަމަށާއި، ނަމަވެސް މަސައްކަތް މިހާރު އެއްކޮށް ހުއްޓިފައިވާތާ 6 މަސް ދުވަހަށްވުރެ ގިނަ ދުވަސްވެފައިވާ ކަމަށެވެ.
އައުޒަމް ވިދާޅުވީ ރައީސް އިބްރާހިމް މުހައްމަދު ޞާލިޙުގެ ސަރުކާރުގައި އެއަރޕޯޓުގެ މަސަައްކަތް ފަށައި، އެ މަސައްކަތުގެ ވަރަށް ބޮޑު އިންސައްތައެއް ނިންމާފައިވާ ކަމަށެވެ. އެގޮތުން އޭރު ހަވާލު ކުރި ބިން ހިއްކުމާއި، ރިވެޓްމަންޓު ޖެހުމުގެ މަސައްކަތް ނިންމާފައިވާ ކަމަށާއި، ވެރިކަން ބަދަލުވި އިރުވެސް 50 އިންސައްތަ މަސައްކަތް އޮތީ ނިމިފައި ކަމަށެވެ.
ބިންހިއްކާ ޖިއޯބޭގް އިންނާނެ 200 ވަރަކަށް މީޓަރުގައި ޖިއޯ ބޭގް ޖަހަން. ދެން އިންނާނީ ހިލަ ރިވެޓްމަންޓް. ރައީސް މުއިއްޒު ވިދާޅުވަނީ އެއަރޕޯޓުގެ ރަންވޭ ބަދަލުކޮށް 1800 މީޓަރަށް ބަދަލުކޮށްދެއްވާނެ ކަމަށް. އޭގެ އެއްވެސް މަސައްކަތެއް ހަވާލެއް ނުކުރޭ.މަކުނުދޫ ކައުންސިލްގެ ރައީސް އައުޒަމް އާދަމް
ކޮންޓްރެކްޓަރާއި ދިމާވެފައިވާ މައްސަލަ ހައްލުކުރުމަށް މިހާރު ވާހަކަ ދެކެވެމުންދާ ކަމަށާއި، ކޮންޓްރެކްޓަށް ގެންނަންޖެހޭ ބަދަލު ގެނައުމަށްފަހު 2 ހަފްތާއެއްހާ ދުވަހުގެ ތެރޭގައި މަސައްކަތް ފެށޭނެ ކަމުގެ މައުލޫމާތު ލިބިފައިވާ ކަމަށް އައުޒަމް ވިދާޅުވިއެވެ. ނަމަވެސް ރަސްމީ ސިފައެއްގައި މަސައްކަތް ފެށޭނެ ތާރީހެއްވެސް އަދި ހައްލެއް ލިބޭނެކަމުގެ މައުލޫމާތެއްވެސް ލިބިފައި ނުވާ ކަމަށް ވެސް އައުޒަމް ވިދާޅުވިއެވެ.
އައުޒަމް ވިދާޅުވީ 2024 ވަނަ އަހަރުގެ ކުރީ ކޮޅު ރައީސް މުޢިއްޒު މަކުނުދޫ އަށް ވަޑައިގެންނެވި ކަމަށާއި، އެ ދަތުރުފުޅުގައި އެ އަހަރުގެ ޑިސެމްބަރު މަހުގެ ނިޔަލަށް އެ ރަށުގައި އެއަރޕޯޓުގެ ޚިދުމަތް ލިބޭނެ ކަމަށް ވިދާޅުވެފައިވާ ކަމަށެވެ.
