އެމްއެސްޕީއޭ ފިލްމް އެވޯޑްސް 2024: އެންމެ މޮޅު ފިލްމަކަށް "ގޮށްރާޅު"
23 އޯގަސްޓު 2025 | ހޮނިހިރު 14:21މޯލްޑިވްސް ސޮސައިޓީ ފޯ ޕާފޯމިން އާޓްސްގެ ފިލްމު އެވޯޑްސް 2024 ގައި އެންމެ މޮޅު ފިލްމުގެ މަޤާމު ގޮށްރާޅަށް ލިބުނު
އެންމެ މޮޅު ފިލްމުގެ އެވޯޑް ހާސިލްކުރި، ގޮށްރާޅުގެ ޓީމުން އެވޯޑާ ހަވާލުވުން
މޯލްޑިވްސް ސޮސައިޓީ ފޯ ޕާފޯމިން އާޓްސް (އެމްއެސްޕީއޭ) އިން އިންތިޒާމްކޮށްގެން ބޭއްވި ފިލްމު އެވޯޑްސް 2024 ގައި އެންމެ މޮޅު ފިލްމުގެ މަގާމު "ގޮށްރާޅު" ހޯދައިފި އެވެ. ހުކުރު ދުވަހުގެ ރޭ ޣިޔާސުއްދީން ސްކޫލުގައި ބޭއްވުނު މި ރަސްމިއްޔާތުގައި 2019 އިން 2023 އަށް ނެރެފައިވާ ފިލްމުތަކުގެ ތެރެއިން އެކި ދާއިރާތަކުން ފާހަގަކުރެވުނު ފަރާތްތަކަށް އެވޯޑު ދެވުނެވެ.
އެންމެ މޮޅު ފިލްމުގެ މަޤާމަށް "ގޮށްރާޅު" އާ ވާދަކުރި ފިލްމުތަކުގެ ތެރޭގައި "ދެވަންސޫރަ"، "މާމުއި" އަދި "ނީނާ" ހިމެނުނެވެ. މި ރަސްމިއްޔާތުގައި އެންމެ މޮޅު ލީޑިންގ އެކްޓަރުގެ އެވޯޑު ޖުމައްޔިލް ނިމާލަށް ލިބުނު އިރު، އެންމެ މޮޅު ލީޑިންގ އެކްޓްރެސްގެ އެވޯޑު ހާސިލުކުރީ ނިއުމާ މުހައްމަދެވެ.
ސަޕޯޓިންގ ރޯލްތަކުގެ ތެރެއިން އެންމެ މޮޅު އަންހެން ތަރި އަކަށް ވާޝިއާ މުހައްމަދު ހޮވުނު އިރު، އެންމެ މޮޅު ފިރިހެން ސަޕޯޓިންގ އެކްޓަރުގެ އެވޯޑު ޔޫސުފް ޝަފީޢު ހާސިލުކުރިއެވެ. "ގޮށްރާޅު" ގެ ޑައިރެކްޓަރު އަޙްމަދު ސިނާން އެންމެ މޮޅު ޑައިރެކްޓަރުގެ އެވޯޑު ހާސިލުކުރި އެވެ.
އެންމެ މޮޅު ސަޕޯޓިން އެކްޓަރަކަށް ހޮވުނު ޔޫސުފް ޝަފީޢު(ޔޫއްޕެ) އެވޯޑާ ހަވާލުވަނީ
މި ރަސްމިއްޔާތުގައި މުނިފޫހިފިލުވުމުގެ ގިނަ ހަރަކާތްތަކެއް ހިމެނުނެވެ. އަދި ޅެން، ސްޓޯރީ، ސައުންޑު އިންޖިނިއަރިންގ، ވިޝުއަލް އެފެކްޓްސް، މޭކަޕް، ކޮރިއޮގްރަފީ، ކޮސްޓިއުމް ޑިޒައިން އަދި ގްލެމަރ މޭކަޕް ފަދަ ދާއިރާތަކުން ވެސް އެވޯޑުތައް ދެވުނެވެ.
އެމްއެސްޕީއޭގެ ޗެއާމަން މުހައްމަދު ރަޝީދު (ދަރާ) ވިދާޅުވި ގޮތުގައި މި އެވޯޑު ހަފުލާ އަކީ މިދިޔަ އަހަރުގެ މޭ މަހު ބޭއްވުމަށް ރޭވިފައިވާ ހަފުލާއެކެވެ. ނަމަވެސް ދިމާވި ދަތިތަކާ ހުރެ ލަސްވެފައިވާކަމަށް އޭނާ ފާހަގަކުރެއްވިއެވެ. އަދި ކަމާ ގުޅުންހުރި އިދާރާތަކާއި ދާއިރާގެ ބައެއް ފަރާތްތަކުގެ އެއްބާރުލުން ނުލިބޭކަން ފާހަގަކުރެއްވިއެވެ. ނަމަވެސް ކުރިމަގުގައި ވެސް ދާއިރާގެ ފަންނާނުންގެ އަގު ވަޒަންކޮށް، އެވޯޑު ހަފުލާތައް ބޭއްވުމަށް މަސައްކަތްކުރައްވާނެ ކަމުގެ ޔަގީންކަން އެމްއެސްޕީއޭގެ ޗެއާމަން ދެއްވި އެވެ.
