ކާޑެއްދޫ އެއަރޕޯޓް ތަރައްޤީކޮށް ހިންގުމަށް ވިލާ އެއަރއާއެކު ވެފައިވާ އެއްބަސްވުމާ ގުޅިގެން، އެ ކުންފުންޏަށް އެއްވެސް ބަދަލެއް ދިނުމަކީ ޤާނޫނީ ގޮތުން ކުރަންޖެހޭނެ ކަމެއް ނޫން ކަމަށް އެމްޑީޕީގެ ޤާނޫނީ ކޮމިޓީގެ މެންބަރު އަލްއުސްތާޒު އަހްމަދު މައުރޫފް ވިދާޅުވެއްޖެ އެވެ.

މައުރޫފް މިހެން ވިދާޅުވަފައިވަނީ ވިޔަފާރިވެރިޔާ ގާސިމް އިބްރާހިމްގެ ވިލާ އެއަރ ޕްރައިވެޓް ލިމިޓެޑަށް ދޫކޮށްފައިވާ ގދ. ކާޑެއްދޫ އެއާޕޯޓު އަނބުރާ ސަރުކާރަށް ހޯދުމަށްޓަކައި، ވިލާއިން ހުށަހެޅި އަގު ދަށްކޮށް، 18 މިލިއަން ޑޮލަރު (277.5 މިލިއަން ރުފިޔާ)ގެ ބަދަލެއް ދޭން ސަރުކާރުން ހުށަހެޅުމުން، އެކަމުގެ ކަންބޮޑުވުން ފާޅުކުރައްވަމުން ނެވެ.

ސޯޝަލް މީޑިޔާގައި ކުރެއްވި ޕޯސްޓެއްގައި މައުރޫފް ފާހަގަކުރެއްވި ގޮތުގައި، 2013 ވަނަ އަހަރު ވެފައިވާ އެއްބަސްވުމުގެ ދަށުން ވިލާ އެއަރއިން އެއްބަސްވުމުގައިވާ އެއްވެސް މުހިންމު ޒިންމާއެއް އަދާކޮށްފައެއް ނުވެއެވެ. އަދި އެއަރޕޯޓް ތަރައްޤީ ކުރުމަށް އެއްވެސް ފާހަގަކުރެވޭ އިންވެސްޓްމަންޓެއް ކޮށްފައި ނުވާކަމަށް ވެސް އޭނާ ވިދާޅުވި އެވެ.

2017 ވަނަ އަހަރު ސަރުކާރުން އެއްބަސްވުން ބާތިލުކުރުމާ ގުޅިގެން، 2018 ވަނަ އަހަރު ސިވިލް ކޯޓުން ނިންމީ އެއްބަސްވުން ބާތިލުކުރި ކުރުން ޤާނޫނީ ގޮތުން ރަނގަޅު ނޫން ކަމަށެވެ. މި މައްސަލަ ހައިކޯޓާއި ސުޕްރީމް ކޯޓުން ވެސް ބެލުމަށްފަހު، 2022 ވަނަ އަހަރު އެއްބަސްވުން އަލުން ތަންފީޒުކުރަން ފެށުނެވެ.

"އަލުން ތަންފީޒުކުރެވުނު އެއްބަސްވުމުގެ ދަށުން، ފުރަތަމަ އަހަރު ތެރޭގައި ޑޮމެސްޓިކް ފެސިލިޓީތައް ސީއޭއޭގެ މިންގަނޑުތަކަށް ތަރައްޤީކުރަންޖެހޭ. އަދި 7 އަހަރު ތެރޭގައި ބައިނަލްއަޤްވާމީ ފެންވަރުގެ އެއަރޕޯޓަކަށް ހަދަންޖެހޭ. ނަމަވެސް މިހާރު 4 އަހަރު ވެގެން ދިޔައިރުވެސް އެއްވެސް ކަމެއް ކުރިއަށް ގޮސްފައެއް ނުވޭ،" މައުރޫފް ވިދާޅުވި އެވެ.

މައުރޫފް އިތުރަށް ފާހަގަކުރެއްވި ގޮތުގައި، މި ހާލަތުގައި ސަރުކާރަށް އެއްބަސްވުން އެއްފަރާތުން ބާތިލުކުރުމުގެ ފުރިހަމަ ޙައްޤު ލިބިގެންވެއެވެ. އަދި މިކަމުގައި ވިލާ އެއަރގެ ރުހުން ހޯދާކަށް ނުޖެހޭނެ ކަމަށާއި، އެއްވެސް ބަދަލެއް ދޭންޖެހޭނެ ޤާނޫނީ ހަމައެއް ނެތް ކަމަށް ވެސް އޭނާ ވިދާޅުވި އެވެ.

"ސަރުކާރަށް އެއަރޕޯޓް ބޭނުންވާނަމަ، ހަމައެކަނި ކުރަންޖެހޭނީ އެއްބަސްވުން ބާތިލުކުރުން. އެއްވެސް ބަދަލެއް ދިނުމަކީ އެކަށީގެންވާ، ޖަވާބުދާރީވެވޭނެ އަދި ޤާނޫނީ ގޮތުން ހަމަޖެހޭ ކަމެއް ނޫން،" މައުރޫފް ނިންމާލަމުން ވިދާޅުވި އެވެ.

ކާޑެއްދޫ އެއަރޕޯޓު ވިލާއަށް ހަވާލުކުރީ ދެ ފަޅެއް ވެސް ޖާމިނުކޮށްފަ އެވެ. ނަމަވެސް އެތަނެއް ވިލާއިން ތަރައްގީ އެއް ނުކުރެ އެވެ. ކާޑެއްދޫ އެއަރޕޯޓުގެ އެއްބަސްވުން ބާތިލުކުރުމާއެކު އެ ދެ ފަޅު ވެސް ސަރުކާރަށް ލިބޭނެ އެވެ.

ބަދަލު ހޯދުމުގެ ގޮތުން ވިލާ އެއަރ އިން ރައީސް އޮފީހަށް ހުށަހެޅި ހުށަހެޅުމުގައި އެއަރޕޯޓް ތަރައްގީ އަށް 100 މިލިއަން ޑޮލަރު އަރާނެ ކަމަށް "އާރނެސްޓް އެންޑް ޔަންގް" އިން ލަފާ ކޮށްފައިވާ ކަމާއި، އެހެން ނަމަވެސް ބަދަލުގެ ގޮތުގައި، ދައުލަތުން 21 މިލިއަން ޑޮލަރު ދިނުން އެދޭ ކަމަށް ވިލާ އެއަރ އިން ވަނީ ބުނެފަ އެވެ.

ރައީސް އޮފީހުން ފޮނުވި ސިޓީގައި ބުނެފައި ވަނީ އެ އޮފީހުން ބެލި ބެލުމުން، ކާޑެއްދޫ އެއަރޕޯޓުގެ އަގަކީ 18.5 މިލިއަން ޑޮލަރު ކަމަށާއި، އެއަރޕޯޓް ތަރައްގީ ކުރުމަށް ޖާމިނު ކޮށް ދައުލަތުގެ ފަރާތުން އދ އަތޮޅުން ދޫކޮށްފައިވާ 2 ފަޅުގެ އަގު ކަމުގައިވާ 15 މިލިއަން އެމެރިކާ ޑޮލަރު ހިމަނައިގެން ޖުމްލަ އަގަކީ 33.5 މިލިއަން އެމެރިކާ ޑޮލަރު ކަމަށް 14 އޮގަސްޓް 2025 ގައި ބޭއްވި އިކޮނޮމިކް ކައުންސިލްގެ ބައްދަލުވުމުގައި މަޝްވަރާކޮށް ނިންމާފައިވާ ކަމަށެވެ. އަދި އެ ގޮތުން އެއަރޕޯޓަށް ކޮށްފައިވާ ޚަރަދުގެ ބަދަލެއްގެ ގޮތުގައި 18 މިލިއަން ޑޮލަރު ދޭން ނިންމީ ކަމުަގައި ރައީސް އޮފީހުން ބުނެފައިވެ އެވެ.

އަދި ވިލާ ގްރޫޕުން ދައުލަތައް ދައްކަން ޖެހޭ ޓެކްސް 18 މަސް ދުވަހަށް ބަހާލައިގެން އެޖެސްޓްމަންޓް ހަދާ ގޮތަށް ވެސް އިކޮނޮމިކް ކައުންސިލުން ވަނީ ނިންމާފަ އެވެ.

ސަރުކާރުގެ އޮފަރ ގައި ވާ ގޮތުން ވިލާ އެއަރ އަށް 18 މިލިއަން ޑޮލަރު ލިބުމުގެ އިތުރުން، އދ އަތޮޅުން އެއަރޕޯޓް ތަރައްގީ ކުރާތީ ދިން 2 ފަޅު ވެސް ގާސިމް ގެ ކުންފުންޏަށް ލިބޭނެ އެވެ.

ސަރުކާރުން މިހާރު ވަނީ ގދ. ކާޑެއްދޫ އެއަރޕޯޓުގެ ލީސް އެގްރީމެންޓް ބާތިލު ކުރުމާ ގުޅޭ ގޮތުން ސަރުކާރުގެ އޮފަރ ގާސިމް ގެ ވިލާ އެއަރ އިން ގަބޫލު ކުރާ ނަމަ އެކަން ސަރުކާރަށް އެންގުމަށް އެދޭ ކަމަށް ބުނެފަ އެވެ.