ޣައްޒާ އަށް ސުލްހަ ބަލަހައްޓާ އދ ގެ ފައުޖެއް ފޮނުވުމަށް އިންސާނީ ހައްގުތަކަށް މަސައްކަތް ކުރާ ބައިނަލް އަގްވާމީ ޖަމްއިއްޔާ ޔޫރޯ-މެޑިޓެރޭނިއަން ހިއުމަންރައިޓްސް މޮނިޓަރ އިން އދ އަށް ގޮވާލައިފިއެވެ.

ޖެނީވާގައި މަރުކަޒު ކޮށްފައިވާ ޔޫރޯ-މެޑިޓެރޭނިއަން ހިއުމަން ރައިޓްސް މޮނިޓަރުން މި ކަމަށް ގޮވާލީ ހުކުރު ދުވަހު، ޣައްޒާ ސްޓްރިޕްގެ އުތުރު ސަރަޙައްދުގައިވާ ޣައްޒާ ގަވަރނޭޓް ގައި ބަނޑުހައިހޫނުކަން އޮތްކަމަށް ރަސްމީ ކޮށް އދ އިން އިޢުލާނު ކޮށްފައި ވަނިކޮށްނެވެ.

އަދި މި ހައިހޫނުކަން ހަފްތާތަކެއްގެ ތެރޭގައި އެހެން ސަރަހައްދު ތަކަށް ފެތުރިގެން ހިނގައިދާނެ ކަމަށް ބުނެފައިވެއެވެ.

މި ޙާލަތު މިހެން މެދުވެރިވެފައި ވަނީ އިސްރާއީލު ސަރުކާރުން ޣައްޒާ ސްޓްރިޕް ބަނޑުހައިހޫނުކަމުގެ ތެރެއަށް ގަސްތުގައި ވައްޓާލުމަށް ގެންގުޅޭ ސިޔާސަތުގެ ސަބަބުން ކަމަށް އެ ޖަމްއިއްޔާ އިން ބުނެފައިވެއެވެ. އިސްރާއީލުގެ އިސް ފަރާތްތަކުން އަމިއްލައަށް އިޢުތިރާފު ވެފައިވާ ގޮތުގައި، އެއްވެސް ކާއެއްޗެއް ނުވަތަ ފެނެއް އެ ސަރަޙައްދަށް ވެއްދިއަކު ނުދޭނެއެވެ.

މި ޖަމްޢިއްޔާ އިން ބުނެފައި ވަނީ އިސްރާއީލުގެ މި އަމަލަކީ ހަނގުރާމައިގެ ކުށެއް ކަމަށާއި، އިންސާނިއްޔަތާ ދެކޮޅު ކުށެއް ކަމަށާއި، އަދި ނަސްލު ނައްތާލުމުގެ ޢަމަލެއް ކަމުގައެވެ.

އެހެންކަމުން، އެ ޖަމްޢިއްޔާ އިން ޖެނެރަލް އެސެމްބްލީ އަށް ގޮވާލާފައި ވަނީ "1950 ގެ ރެޒޮލިއުޝަން 377 އޭ(ވީ) ("ސުލްޙަ އަށް އެއްބައިވުން")" ތަންފީޒު ކުރުމަށެވެ.

ޔޫރޯ-މެޑް ގެ ހުށަހެޅުމުގައި ބުނެފައި ވަނީ "ކުއްލި ޚާއްޞަ ޖަލްސާ އެއް ބޭއްވުމަށާއި، ސެކިއުރިޓީ ކައުންސިލުން ވީޓޯގެ ސަބަބުން ނުވަތަ އެއްބަސްވުމެއް ނެތުމުގެ ސަބަބުން ޢަމަލު ކުރަން ނުކުޅެދޭ ހިނދު، ސުލްޙަ ބެލެހެއްޓުމުގެ ބާރެއް ޤާއިމުކުރުން ހިމެނޭ ގޮތަށް، ޖަމާޢީ ފިޔަވަޅުތައް އެޅުމަށް މި ރެޒޮލިއުޝަނުން އެސެމްބްލީ އަށް ބާރު ލިބިދޭ،" ކަމަށެވެ.

ޔޫރޯ-މެޑް އިން މި އިޝާރާތް ކުރަނީ އަނިޔާވެރި ޖަރީމާތައް ހިންގާ އިސްރާއީލު ސަރުކާރުގެ އެންމެ ބޮޑު އެކުވެރިޔާ - އެމެރިކާ އިން، ސެކިއުރިޓީ ކައުންސިލުގައި ތެލް އަވީވް އާ ދެކޮޅަށް ފާސް ކުރަން އުޅޭ ކޮންމެ ކަމަކަށް އެއްވެސް އިސްތިސްނާ އެއް ނެތި ވީޓޯގެ ބާރު ބޭނުން ކުރުމުގެ އާދައަށެވެ.

ވޮޝިންގްޓަނުން މިފަދަ ފިޔަވަޅުތައް ހިމެނޭ ހުށަހެޅުންތައް އަބަދުވެސް ބާޠިލު ކުރަމުން ދިއުމުގެ އިތުރުން، އިސްރާއީލު ސަރުކާރަށް ހުއްޓުމެއްނެތި އަދި ކުރިން ދުވަހަކު ވެސް ނުދެކޭފަދަ މިންވަރަކަށް ހަތިޔާރުގެ އެހީތެރިކަން ފޯރުކޮށްދެމުން ގޮސްފައިވެއެވެ. މީގެ ތެރޭގައި 2023 ގެ އޮކްޓޯބަރުން ފެށިގެން މިހާތަނަށް ކުރިއަށްދާ ނަސްލު ނައްތާލުމުގެ ހަނގުރާމަ ވެސް ހިމެނެއެވެ.

އެއާއެކު، ޔޫރޯ-މެޑް އިން ފާހަގަ ކޮށްފައި ވަނީ، އިސްރާއީލު ސަރުކާރުން ގަސްތުގައި ޣައްޒާގައި ބަނޑުހައިހޫނުކަން އުފެއްދިކަމަށް ލަހުން ނަމަވެސް އދ އިން ކުރި އިއުލާން އަކީ އެކަމުގެ "ސާފު" ހެއްކެއް ކަމަށެވެ. މިކަން ކޮށްފައި ވަނީ ނިޒާމީ ގޮތެއްގައި ބަނޑުހައިހޫނުކަމުގެ ސިޔާސަތުތައް ގެންގުޅެ، އިންސާނީ އެހީ އަށް ހުރަސްއަޅައި، އަދި ރަށުތެރޭގެ ކާބޯތަކެތީގެ ވަސީލަތްތައް ނައްތާލައިގެން ކަމަށެވެ.

މިއީ ފަލަސްޠީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ ނަސްލު ނައްތާލުމުގެ ޢަމަލުތައް ފެށުނީއްސުރެ، ބަނޑުހައިހޫނުކަން އޭގެ އެންމެ އަނިޔާވެރި ވަސީލަތެއްގެ ގޮތުގައި ބޭނުން ކޮށްފައިވާކަން ރަސްމީ ސިފައެއްގައި ދެނެގަތް ފުރަތަމަ ފަހަރު ކަން އެ ޖަމްއިއްޔާ އިން ބުނެފައިވެއެވެ.

އެއާއެކު، އިސްރާއީލު ސަރުކާރާއި އެމެރިކާ އިން 27 މެއި ގައި އުފައްދާފައިވާ "ޣައްޒާ ހިއުމެނިޓޭރިއަން ފައުންޑޭޝަން" ގެ އަމަލު ތައް މި ޖަމްޢިއްޔާ އިން ހަރުކަށި އިބާރާތުން ކުށްވެރި ކޮށްފައި ވެއެވެ. މި ފައުންޑޭޝަނުގެ މަޤްޞަދު ކަމަށް ބުނެފައި ވަނީ ޣައްޒާގެ ރައްޔިތުންނަށް ކާބޯތަކެތި ފޯރުކޮށްދިނުން ނަމަވެސް، ޙަޤީޤަތުގައި މި ފައުންޑޭޝަނުން ކަން ކުރަމުން ގެންދާ ގޮތުން "ކާރިސާ އިތުރަށް ގޯޯސްވެފައިވެއެވެ."

މި ޖަމްޢިއްޔާއިން ފާހަގަކޮށްފައިވާ ގޮތުގައި ޖީއެޗްއެފްގެ ތަކެތި ބެހުމުގެ ސަރަަހައްދުތައް ވެފައިވަނީ "މަރުގެ ދަންތުރަ" ތަކަކަށެވެ. އެތަންތަނުގައި އިސްރާއީލުގެ ބާރުތަކުން، ބައެއް ފަހަރު އެމެރިކާގެ މާސެނަރީން ބައިވެރިވެގެން، 2,036 މީހުން މަރާލައި އަދި 15,064 މީހުން ޒަޚަމްކޮށްލާފައި ވެއެވެ. އަދި އިސްރާއީލުގެ ބާރުގެ ދަށުގައިވާ ސަރަޙައްދުތަކުގައި އެހީގެ ޓްރަކުތަކާ ހަމައަށް ވާސިލުވުމަށް މަސައްކަތްކުރަމުން އިތުރު އެތައް ހާސް މީހުން މަރުވެފައިވެއެވެ.

އަދި އެ ޖަމްޢިއްޔާއިން ފާހަގަ ކޮށްފައިވާ ގޮތުގައި "ފައުންޑޭޝަނުގެ ތަކެތި ބެހުމުގެ ނިޒާމުން ގަސްތުގައި ޣައްޒާގެ އާބާދީގެ ވަރަށް ބޮޑު ބައެއް އިސްތިސްނާ ކޮށްފައިވެއެވެ."