ރަސްދޫ ރައްޔިތުން ބޭނުންވާ ގޮތަށް މަޑިވަރު ފިނޮޅު ހަދައިދޭނަން: ރައީސް މުއިއްޒު

ރަސްދޫ ރައްޔިތުން ބޭނުންވާ ގޮތަށް ފަތުރުވެރިކަމުގެ ދާއިރާއަށް ނަފާ ވާގޮތަށް، ރަސްދޫ ކައިރީގައި އޮންނަ މަޑިވަރު ފިނޮޅު ތަރައްގީ ކޮށްދޭނެ ކަމަށް ރައިީސުލްޖުމްހޫރިއްޔާ ޑރ. މުހައްމަދު މުއިއްޒު ވިދާޅިވެއްޖެ އެވެ.

ރައީސް މުއިއްޒު މިފަދައިން ވިދާޅުވީ އެމަނިކުފާނު އަރި އަތޮޅުގެ މީހުން ދިރިއުޅޭ ބައެއް ރަށްތަކަށް ކުރައްވާ ދަތުރުފުޅުގެ ތެރެއިން އއ. ރަސްދޫ ރައްޔިތުންނާ ބައްދަލު ކުރައްވާ ދެއްކެވި ވާހަކަފުޅުގެ ތެރެއިންނެވެ.

ރައީސްގެ މި ދަތުރުފުޅުގައި ވަނީ ރަސްދޫ މަގު ހެދުމާއި، ސްކޫލަށް ޖާގަ އިތުރުކޮށް ބޭނުންވާ ވަސީލަތްތައް ޤާއިމްކުރުމާއި، ސްޕޯޓްސް ކޮމްޕްލެސް އިމާރާތްކުރުން އެކި ކުންފުނިތަކާއި ހަވާލުކޮށްފައެވެ. ރައީސް މުޢިއްޒު ވިދާޅުވީ މި މަޝްރޫޢުތަކަކީ ރަސްދޫގެ ރައްޔިތުންގެ ދިރިއުޅުމުގެ ފެންވަރު މަތިކޮށް، ރަށުގެ ތަރައްޤީއަށް އިތުރު ހަލުވިކަމެއް ގެނެސްދޭނެ މަޝްރޫޢުތަކެއް ކަމަށެވެ. އަދި މި މަޝްރޫޢުތައް ނިމުމުން ރަށުގެ އިޖްތިމާޢީ އަދި އިޤްތިޞާދީ ހާލަތަށް ފާހަގަކުރެވޭ ކުރިއެރުންތަކެއް ލިބިގެންދާނެ ކަމަށްވެސް ވިދާޅުވިއެވެ.

ރަށުގެ ޓޫރިޒަމް އަދި ރައްޔިތުންގެ ބޭނުމަށް އޮތް މަޑިވަރު ފިނޮޅު ތިބޭފުޅުން ބޭނުންވާގޮތަށް ހަދައިދިނުމަކީ އަޅުގަނގެ ވަޢުދެއް. އެތަނުގައި ޖިއޯބޭގް ޖަހައި ތަރައްޤިކޮށްދީ، ތިބޭފުޅުން ޓޫރިޒަމް ބޭނުމަށް ބޭނުންކުރެވޭނެގޮތަށް ހައި ޕްރިއޯރިޓީގައި މަސައްކަތްކޮށްދޭނަން

ރައީސުލްޖުމްހޫރިއްޔާ ޑރ. މުހައްމަދު މުއިއްޒު

މީގެ އިތުރުން ރައީސް ވާހަކަފުޅުގައި މިހާރު ހިނގަމުންދާ ބަނދަރު މަޝްރޫޢުއަކީ ރަށަށް މުހިންމު މަޝްރޫޢުއެއްކަމަށް ވިދާޅުވެ އެ މަސައްކަތް މިހާރު ފެށިފައިވާކަން ފާހަގަ ކުރައްވާފައި ވެއެވެ. ނަމަވެސް ރަސްދޫ ބަނދަރުގެ މައްސަލަ އަކީ، އެކި ފަހަރު މަތިން މަރާާތުކޮށްގެން ވެސް ހައްލު ނުވެފައިވާ ގިނަ ޒަމާންތަކެއް ވެފައިވާ މައްސަލަ އެކެވެ. 2012 ވަނަ އަހަރު ހަދާފައިވާ މި ބަނދަރު މަރާމާތުކުރުމުގެ މަސައްކަތް، ރައީސް އިބްރާހިމް މުހައްމަދު ސޯލިހުގެ ސަރުކާރުން ވަނީ ފަށާފައެވެ. ނަމަވެސް ވެރިކަން ބަދަލުވިފަހުން މި މަޝްރޫއު ހުއްޓި، މަޝްރޫއު ކުރިޔަށް ގެންދިޔުމަށް އެރަށަށް ގެންގޮސްފައިވާ ތަކެތިވެސް ވަނީ އެހެން ރަށްރަށަށް ގެންގޮސްފަ އެވެ.

ނަމަވެސް ރައީސްގެ ދަތުރުފުޅާ ދިމާކޮށް ބޮޑު ބާޖެއްގައި ކުޑަ ހިލަކޮޅަކާއި، އއ. މަތިވެރިއަށް މަސައްކަތެއް އިފްތިހާހު ކުރަން ގެންދިޔަ ހައިމާކެއް ރަސްދޫއަށް ގެންގޮސް ބަނދަރުގެ މަސައްކަތް ކޮންމެވެސް ގޮތަކަށް ވަނީ ފަށާފައެވެ.

ރައީސް ސޯލިހުގެ ވެރިކަމުގައި ރަސްދޫގެ ތަރައްގީގެ ގިނަ މަޝްރޫއުތަކެއް ފަށާފައިވެއެވެ. ނަމަވެސް ވެރިކަން ބަދަލުވިފަހުން މި މަސައްކަތްތައް ހުއްޓިފައިވުމަކީ ރަސްދޫގެ ރައްޔިތުންގެ ވަރަށްބޮޑު ކަންބޮޑުވުމެކެވެ.