މިހާތަނަށް ހައުސިންގ ގެ އެއްވެސް މަޝްރޫއެއް ކުރިއަށް ނުގެންދެވޭ މި ސަރުކާރުން އަންނަ އަހަރު ވެސް އެންމެ އިސްކަން ދޭނީ މި ދާއިރާއަށް ކަމަށް ރައީސް މުއިއްޒު ވިދާޅުވެއްޖެ
ބޮޑުފޮޅުދޫގައި 50 ހައުސިންގ ޔުނިޓްގެ މަޝްރޫއެއްގެ އަމަލީ މަސައްކަތް އަންނަ އަހަރުގެ ކުރީކޮޅު ފައްޓަވާނެ
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ބޮޑުފޮޅުދޫއަށް ވަޑައިގަތުން- 20.08.2025
ކުރިއަށް އޮތް އަހަރު ވެސް އިސްކަމެއް ދޭނީ ހައުސިންގ މަޝްރޫއުތައް ކުރިއަށް ގެންދަން ކަމަށާއި، އަންނަ އަހަރު ކުރީކޮޅު އއ.ބޮޑުފޮޅުދޫގައި 50 ހައުސިންގ ޔުނިޓްގެ މަޝްރޫއުގެ އަމަލީ މަސައްކަތް ފައްޓަވާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ބުދަ ދުވަހު ބޮޑުފޮޅުދޫއަށް ވަޑައިގަންނަވައި، އެރަށުގެ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައި، ރައީސް މުއިއްޒު ވިދާޅުވީ މިއަންނަ އަހަރު ވެސް ބަޖެޓުގެ އެންމެ އިސްކަމެއް ދޭ ދާއިރާއަކީ ހައުސިންގ މަޝްރޫއުގެ ދާއިރާ ކަމަށާއި، ގެދޮރުގެ މައްސަލަ ހައްލު ކުރުމަށް ޚާއްސަ އިސްކަމެއް ދެއްވާނެ ކަމަށެވެ.
އެގޮތުން އަންނަ އަހަރުގެ ބަޖެޓުގައި ހިމަނައިގެން ބޮޑުފޮޅުދޫގައި 50 ހައުސިންގ ޔުނިޓްގެ މަޝްރޫއެއްގެ އަމަލީ މަސައްކަތް އަންނަ އަހަރުގެ ކުރީކޮޅު ފައްޓަވާނެ ކަމަށް އެމަނިކުފާނު ވިދާޅުވިއެވެ. އަދި ރަށުގެ ގެދޮރުގެ މައްސަލަ ބޮޑުކަން ފާހަގަކުރައްވައި އެމަނިކުފާނު ވިދާޅުވީ އެ މަޝްރޫއު ނިމުމުން ގެދޮރުގެ މައްސަލަ ހައްލުވާނެ ކަމަށެވެ.
މިރަށުގައި ހައުސިންގ މަޝްރޫއެއް މިއަހަރު ބަޖެޓުގައި ހިމެނިފައި ނުވެ އޮންނާނެ. އެހެންނަމަވެސް އިރާދަކުރެއްވިއްޔާ މިއަންނަ އަހަރު ވެސް އަޅުގަނޑުމެންގެ ބަޖެޓުގެ އެންމެ އިސްކަމެއް ދޭ ދާއިރާއަކީ އެއީ. ގެދޮރުގެ މައްސަލަ ހައްލު ކުރުން. އަޅުގަނޑު ކަނޑައަޅާފައި އޮތް ގޮތް. ކުރިން ވެސް ވަރަށް ސާފުކޮށް ބަޔާންކޮށްފައި އޮތް ސިޔާސަތު އެއީ. ކޮންމެ އަހަރެއްގެ ބަޖެޓުގައި ވެސް މަޝްރޫއުތަކުގެ ތެރެއިން އެއް ދާއިރާއަކަށް އެންމެ އިސްކަން ދެނީ ހައުސިންގ މަޝްރޫއުތައް ހިންގަން. އެހެންވީމަ މިއަހަރު ކުރިއަށް ގެންދަން ނިންމާފައި ހުރި މަޝްރޫއުތައް އިތުރަށް ފަށާ އައު މަޝްރޫއުތަކުގެ ތެރޭގައި ވެސް އެންމެ އިސްކަމެއް ދެނީ ގެދޮރުގެ މައްސަލަ މިއަންނަ އަހަރު ބަޖެޓުން ވެސް. މިއަންނަ އަހަރުގެ ބަޖެޓުގައި މިރަށުގެ ހައުސިންގ މައްސަލަ ގެދޮރު މައްސަލަ ހައްލު ކުރުމަށް 50 ހައުސިންގ ޔުނިޓް އެޅުމަށް ކަނޑައަޅާ އެމަޝްރޫއު ބަޖެޓުގައި ހިމަނާނަން. އަދި އިރާދަކުރެއްވިއްޔާ އަހަރުގެ ކުރީ ކޮޅު އަމަލީ ގޮތުން މަސައްކަތް ފަށާދޭނަން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
މީގެ އިތުރުން މި ރަސްމިއްޔާތުގައި ވަނީ، ބޮޑުފޮޅުދޫ ސްކޫލްގެ ކްލާސްރޫމާއި މަލްޓިޕާރޕަސް ހޯލް އިމާރާތްކުރުމުގެ މަޝްރޫއުގެ އެއްބަސްވުމުގައި ސޮއިކުރައްވާފައެވެ.
އެ މަޝްރޫއަށް އިޝާރާތްކުރައްވަމުން ރައީސް މުއިއްޒު ވިދާޅުވީ، ސްކޫލަށް ބޭނުންވާ ވަސީލަތްތައް ގާއިމުކޮށްދެއްވުމަށް، ވަރަށްބޮޑު އިސްކަމެއް ދެއްވައިގެން، އެ ކަންކަން ހައްލުކޮށްދެއްވާނެ ކަމަށެވެ. އެގޮތުން މަޝްރޫއުގެ އަމަލީ މަސައްކަތް، ގިނަވެގެން ތިން މަސް ދުވަހުގެ ތެރޭގައި ފެށޭނޭކަމުގެ ޔަގީންކަން އެ މަނިކުފާނު ދެއްވިއެވެ.
ބޮޑުފޮޅުދޫގައި ގާއިމުކުރާ ހޭންޑްބޯލް ދަނޑުގެ އަމަލީ މަސައްކަތް ފެށޭކަން ފާހަގަކުރައްވައި، ރަށުގެ ފުޓުބޯޅަ ދަނޑުގައި ލައިޓްޖެހުމުގެ މަސައްކަތާއި ފިޓްނަސް އެންޑް ރިކްރިއޭޝަން ސެންޓަރުގެ ބޭނުންކުރެވޭނެ ގޮތަކަށް މަސައްކަތް ނިންމުމަށް މަގުފަހިކޮށްދެއްވާނެ ކަމަށް ރައީސް މުއިއްޒު ދާޅުވިއެވެ.
ރަށުގައި މިހާރު ހިއްކާފައިވާ ހަތަރު ހެކްޓަރުގެ ބިން ރަށާއި ހަވާލުކުރުމުގެ ކަންކަން ނިންމަވައި، ރަށުގެ ގޮނޑުދޮށް ހިމާޔަތްކުރުމުގެ މަސައްކަތާއި، އެއާއިގުޅިގެން ކުރަންޖެހޭ ކަންކަން އަންނަ އަހަރު ކުރައްވާނެކަމުގައިވެސް އެމަނިކުފާނު ވިދާޅުވިއެވެ. އަދި ސިއްހީ މަރުކަޒުގެ ޖާގަ އިތުރުކޮށް، މި ނިޒާމު ވެސް އިތުރަށް ހަރުދަނާ ކޮށްދެއްވާނެ ކަމުގެ ޔަގީންކަން ދެއްވިއެވެ.
ރައީސްގެ ވާހަކަފުޅު ނިންމަވާލައްވާފައިވަނީ، ބޮޑުފޮޅުދޫގެ ތަރައްގީއާ ގުޅިފައިވާ މަޝްރޫއުތައް ބާރު ދުވެލީގައި ކުރިއަށް ގެންގޮސްދެއްވައި، އެކަމުގެ ނަފާ، ރައްޔިތުންނަށް ލިބިގެންދާނެކަމުގެ ޔަގީންކަން ދެއްވަމުންނެވެ.
ރައީސް މުއިއްޒު މިމޭރުމުން ވާހަކަފުޅު ދެއްކެވި ނަމަވެސް މިސަރުކާރުގައި މިހާތަނަށް ތަރައްގީގެ އެއްވެސް މަޝްރޫއެއް ހިންގާފައިނުވެއެވެ. އަދި ހައުސިންގ މަޝްރޫއެއް ވެސް ކުރިއަށް ގެންގޮސްފައިނުވާއިރު، ކުރީ ސަރުކާރުގައި ނިންމާފައިވާ ގެދޮރުވެރިޔާގެ ފްލެޓުތައް ވެސް ދޫކުރެވިފައި ނުވެއެވެ.
