ވޭޕް ސްމަގްލް ކުރި މިނިސްޓަރ ޝަހީމް ގެ ދަރިކަލުން މާހިލް އަށް ފާޑުކިޔުން ބޮޑުވެ، މަޤާމުން އިސްތިއުފާ ދީފި
17 އޯގަސްޓު 2025 | އާދީއްތަ 13:58އިސްލާމިކް މިނިސްޓަރުގެ ދަރިކަލުން މާހިލް ޝަހީމް ވޭޕް ސްމަގްލް ކުރަން އުޅުމުން އާއްމުން ދަނީ ފާޑުކިޔަމުން
އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ ދަރިކަލުން، އަބްދުالله މާހިލް ޝަހީމް
އިސްލާމިކް މިނިސްޓަރ ޑރ.މުހައްމަދު ޝަހީމް އަލީ ސައީދުގެ ދަރިކަލުން، އަބްދުالله މާހިލް ޝަހީމް ރާއްޖެ އަށް ވޭޕް ސްމަގްލް ކުރަން އުޅުމާއި ގުޅިގެން އާއްމުންގެ ފާޑުކިޔުން އިންތިހާ އަށް ބޮޑުވެފައި ވަނިކޮށް، ޔޫތު އެޑްވައިޒަރީ ބޯޑުން އިސްތިއުފާ ދިނުމަށް އޭނާ ނިންމަވައިފިއެވެ.
ޔޫތު އެޑްވައިޒަރީ ބޯޑަކީ ރައީސުލްޖުމްހޫރިއްޔާއަށް ލަފާ އަރުވަން އެކުލަވާލާފައިވާ ޒުވާނުންގެ ކޮމިޓީ އެކެވެ. ރައީސް ޑރ.މުހައްމަދު މުއިއްޒު އުފައްދަވާފައިވާ އެ ކޮމިޓީ އެކުލަވާލާ ފުރަތަމަ އައްޔަން ކުރެއްވި މެމްބަރުންގެ ތެރޭގައި މާހިލް ހިމެނެއެވެ.
މާހިލް ރާއްޖެ އަށް ވޭޕް ސާމާނު ސްމަގުލް ކުރަން އުޅުނީ ބުރާސްފަތި ދުވަހުގެ ރޭ ކަމަށް ވާއިރު އެކަން މީޑީއާތަކަށް ތިލަވެފައި ވަނީ ހުކުރު ދުވަހުއެވެ.
މާހިލްގެ އަތުން ވޭޕް ފެނުމާ ގުޅޭގޮތުން ކަމާއި ބެހޭ ފަރާތްތަކުން ހާމަކޮށްފައި ވަނީ މާހިލް ހިފަހައްޓައި ޗެކު ކުރިއިރު، އޭނާގެ ލަގެޖުން ވޭޕް ސާމާނު ފެނިފަިއވާ ކަމަށެވެ. އެ ތަކެތި ހިފެހެއްޓުމަށް ފަހު އެއް މިލިއަން ރުފިޔާ އިން މާހިލް ޖޫރިމަނާ ކޮށްފައިވާ ކަމަށް ވެސް ވަނީ ހާމަކޮށްފަ އެވެ.
މާހިލް ވޭޕް އެތެރެ ކުރުމުން އަމަލުކުރީ އޭނާ އަށް ޚާއްސަ އުސޫލަކުން ކަމަށް ބުނެ އާއްމުން އައީ ފާޑުކިޔަމުންނެވެ. ޚާއްސަކޮށް އޭނާ އަކީ އިސްލާމިކް މިނިސްޓަރގެ ދަރިކަލުންނަށް ވެފައި އޭނާ އަކީ ޔޫތް އެޑްވައިޒަރީ ބޯޑުގެ މެމްބަރަކަށް ވުމުން އާއްމުންގެ ފާޑުކިޔުންތައް އިތުރުވެގެން ދިޔަކަން ވަނީ ފާހަގަކުރެވިފައެވެ.
މާހިލް ރާއްޖޭން ބޭރުން އައިއިރު 100 އަށް ވުރެ ގިނަ އަދަދަކަށް ވޭޕް ކުރާ ސާމާނު ވަގަށް އެތެރެ ކުރަން އުޅުނު ކަމަށް މި ނޫހަށް މައުލޫމާތު ދިން އިތުބާރު ހުރި މަސްދަރަކުން ވަނީ ބުނެފައެވެ. ނަމަވެސް އެ ތަކެތި ކަސްޓަމްސްއިން ހިފަހައްޓައި އޭނާ 1 މިލިއަން ރުފިޔާއިން ޖޫރިމަނާ ކުރި އެވެ.
އޭނާގެ ހަށިގަނޑުގައި ބަނދެގެން ވެސް ވޭޕް އެތެރެކުރަން އުޅުނު ކަމަށް ބައެއް މީޑިއާތަކުން ރިޕޯޓްކޮށްފައިވާ އިރު އެކަން ދޮގުކުރައްވާ އެގޮތަށް މައުލޫމާތު ނުފެތުރުމަށް މާހިލް ގެ ބައްޕާފުޅު މިނިސްޓަރ ޝަހީމް ވަނީ އެދިވަޑައިގަންނަވާފައެވެ.
ރާއްޖޭ އަށް ވޭޕްކުރަން ބޭނުން ކުރާ ސާމާނު އެތެރެކުރުން މާނާ ކުރި ފަހުން ވެސް ފުޅާ ދާއިރާއެއްގައި މިވިޔަފާރި ކުރާކަމީ އެންމެ ދަންނަ ބޮޑު ސިއްރެކެވެ. އަދި މިހާ ފުޅާކޮށް މި ވިޔަފާރި ކުރެވެނީ ސަރުކާރުގެ އިސް ފަރާތްތަކުގެ ބައިވެރިވުން އޮވެގެން ކަމަށްވެސް ގިނަ ބަޔަކު ތުހުމަތު ކުރެއެވެ.
