328 ކުޅުންތެރިންނާ އެކު ދިރާގު ޖޫނިއާ އޯޕަން 2025 ފެށުމަށް ތައްޔާރު ވަނީ
ހަތް ޤައުމެއްގެ ކުޅުންތެރިން މުބާރާތުގައި ވާދަ ކުރާނެ އެވެ. އޭގެ ތެރޭގައި މިވަގުތު ރާއްޖޭގައި އުޅެމުން އަންނަ ބައެއް ޤައުމު ތަކުގެ ކުޅުންތެރިން ހިމެނެ އެވެ. މީގެ އިތުރުން ބޭރު ޤައުމު ތަކުން ގާތް ގަނޑަކަށް 30 ކުޅުންތެރިން، މުބާރާތުގައި ވާދަ ކުރުމަށް ރާއްޖެ އަންނާނެ އެވެ.
ދަ ބެޑްމިންޓަން ކުލަބު އިން ބާއްވާ މޯލްޑިވްސް އޯޕަންގެ ލޯގޯ
ދިރާގު މޯލްޑިވްސް އޯޕަން 2025 ގައި ރަޖިސްޓްރީ ވުމަށް ހުޅުވާލި ފުރުސަތުގައި، 328 ކުޅުންތެރިން ރަޖިސްޓްރީ ވެފައިވާ ކަމަށް މުބާރާތް އިންތިޒާމު ކުރާ ފަރާތުން ބުނެފި އެވެ.
ކުރީގެ ކުޅިވަރު ވަޒީރު އަޙުމަދު މަޚްލޫފް އިސް ނެގުމުގެ މަތިން ކުރިއަށް ގެންދާ މި މުބާރާތް އޮތީ އަންނަ ސެޕްޓެމްބަރު މަހުގެ އެއް ވަނަ ދުވަހުން ފެށިގެން، ހަ ވަނަ ދުވަހުގެ ނިޔަލަށެވެ. އެކުވެނި އިންޑޯ ބެޑްމިންޓަން ކޯޓުގައި ކުރިއަށް ގެންދާ މި މުބާރާތަކީ، މިހާތަނަށް ލިބިފައިވާ ތަޖުރިބާ އާއި، ބެޑްމިންޓަން އަށް އޮތް ޚާއްސަ ޝައުޤުވެރި ކަމެއްގެ ސަބަބުން މަޚްލޫފް އިސް ނަގައިގެން ކުރިއަށް ގެންދާ މުބާރާތެކެވެ.
މި މުބާރާތުގައި ރަޖިސްޓްރީ ވުމަށް ހުޅުވާލި ފުރުސަތުގައި ގިނަ އަދަދެއްގެ ކުޅުންތެރިން ވަނީ ރަޖިސްޓްރީވެފަ އެވެ. އެގޮތުން ހަތް ޤައުމެއްގެ ކުޅުންތެރިން މުބާރާތުގައި ވާދަ ކުރާނެ އެވެ. އޭގެ ތެރޭގައި މިވަގުތު ރާއްޖޭގައި އުޅެމުން އަންނަ ބައެއް ޤައުމު ތަކުގެ ކުޅުންތެރިން ހިމެނެ އެވެ. މީގެ އިތުރުން ބޭރު ޤައުމު ތަކުން ގާތް ގަނޑަކަށް 30 ކުޅުންތެރިން، މުބާރާތުގައި ވާދަ ކުރުމަށް ރާއްޖެ އަންނާނެ އެވެ.
މުބާރާތުގައި ބައިވެރިވެފައިވާ ރާއްޖޭގެ ކުޅުންތެރިންނަށް ބަލާއިރު، ރިވައިވަލް އޭދަފުއްޓަށް ނިސްބަތްވާ 59 ކުޅުންތެރިން މުބާރާތުގައި ވާދަ ކުރާނެ އެވެެ. މީގެ އިތުރުން ނައިފަރުން 25 އަށް ވުރެ ގިނަ ކުޅުންތެރިންނާއި، އައްޑޫ އިން 20 އަށް ވުރެ ގިނަ ކުޅުންތެރިންނާއި، އަޖިފާން އިންޓަނޭޝަނަލް އެކަޑަމީ އިން 30 އަށް ވުރެ ގިނަ ކުޅުންތެރިން އަދި އަފާން އެމް ސްޕޯޓްސް އެންޑް އެކަޑަމީ އަދި އެހެނިހެން އެކަޑަމީ ތަކުން 15 އަށް ވުރެ ގިނަ ކުޅުންތެރިން މުބާރާތުގައި ވާދަ ކުރާނެ އެވެ.
މީގެ އިތުރުން މި މުބާރާތުގައި އަމްޕަޔަރުންގެ ގޮތުގައި މަސައްކަތް ކުރުމަށް ވެސް ބައިނަލްއަޤުވާމީ އަމްޕަރުން ބައިވެރިވާނެ ކަމަށް ވަނީ ހާމަކޮށްފަ އެވެ. މި މުބާރާތުގެ ގުރު ނެގުން ކުރިއަށް ގެންދިޔުމަށް ހަމަޖެހިފައި ވަނީ މި ހިނގާ އޮގަސްޓު މަހުގެ 25 ވަނަ ދުވަހު އެވެ.
ކުރީގެ މިނިސްޓަރު މަޚްލޫފްގެ އިސް ނެގުމުގެ މަތިން އުފައްދާފައިވާ ދަ ބެޑްމިންޓަން ކުލަބުން ކުރިއަށް ގެންދާ މި މުބާރާތް ރާވާފައި ވަނީ އޯޕަން ކެޓަގަރީގެ އިތުރުން، ޕެރަ އެންޑް ސްޕެޝަލް އޮލިމްޕިކްސް ކެޓަގަރީ އަށެވެ.
މީގެ އިތުރުން ޖޫނިއާ އޯޕަންގައި ނުވަ އަހަރުން ދަށް، 11 އަހަރުން ދަށް، 13 އަހަރުން ދަށް، 15 އަހަރުން ދަށް، 17 އަހަރުން ދަށް އަދި 19 އަހަރުން ދަށުގެ އުމުރުފުރާ އަށް ވެސް މުބާރާތް އޮންނާނެ އެވެ.
މުބާރާތުގެ އޯޕަން ކެޓަގަރީގެ ޕެރަ އެންޑް ސްޕެޝަލް އޮލިމްޕިކްސް ކުރިއަށް ދާނީ ސެޕްޓެމްބަރު މަހުގެ އެއް ވަނަ ދުވަހުން ދެ ވަަނަ ދުވަހަށެވެ. އޯޕަން ޖޫނިއާގެ ކުޅުން ކުރިއަށް ދާނީ ސެޕްޓެމްބަރު ތިން ވަނަ ދުވަހުން، ހަ ވަނަ ދުވަހުގެ ނިޔަލަށެވެ.
