ސަރަހައްދުގެ އެންމެ ބޮޑެތި މަހުޖަނުން: މުކޭޝް އަމްބާނީ އެންމެ ކުރީގައި

ދެކުނު އޭޝިއާގެ އެންމެ މުއްސަނދި މީހާގެ ގޮތުގައި ހުރީ އިންޑިއާ ގެ ރިލަޔަންސް އިންޑަސްޓްރީސްގެ ޗެއަރމަން އަދި މެނޭޖިންގ ޑިރެކްޓަރ މުކޭޝް އަމްބާނީ އެވެ.

އަމްބާނީ 118 ބިލިއަން ޑޮލަރުގެ މުއްސަނދި ކަމާއެކު 2025 ވަނަ އަހަރު ގެ ތެރޭގައި ވެސް މި މަގާމުގައި ދެމިހުންނާނެ ކަމަށް ލަފާކުރެވެއެވެ. އޭނާގެ ވިޔަފާރީގެ ޚާންދާނު ގައި ޓެލެކޮމިއުނިކޭޝަން، އެނަރޖީ، ޕެޓްރޯކެމިކަލްސް އަދި ރީޓެއިލް ވިޔަފާރީގެ ދާއިރާތައް ހިމެނެއެވެ.

އަމްބާނީގެ މުއްސަނދިކަން މި ސަރަޙައްދުގެ އެހެން ބިލިއަނަރުންނާ އަޅާބަލާއިރު ފާހަގަކޮށްލެވޭ މިންވަރަށް މަތީގައި ހުރި ނަމަވެސް، އެހެން ޤައުމުތަކުގެ ވިޔަފާރިވެރިން ވެސް ވަނީ ތަނަވަސް ކަމުގެ ގޮތުން ކުރިއެރުންތަކެއް ހޯދާފައެވެ.

މިގޮތުން ސަރަޙައްދުގެ އެހެން މަހުޖަނުންގެ ތެރޭގައި ޕާކިސްތާނުގެ ޝާހިދް ޚާން ފާހަގަ ކުރެވެއެވެ. އޭނާގެ ތަނަވަސް ކަމުގައި 13.5 ބިލިއަން ޑޮލަރު ހުރި ކަމަށް ރެކޯޑް ކުރެވިފައި ވެއެވެ. އޭނާގެ މުއްސަނދިކަން ބިނާވެފައި ވަނީ އެމެރިކާގައި ހިންގާ އޮޓޯ ޕާޓްސް އުފެއްދުމުގެ ވިޔަފާރި އާއި ކުޅިވަރުގެ ދާއިރާގެ އިންވެސްޓްމަންޓް ތަކުންނެވެ.

ބަންގްލަދޭޝްގެ މޫސާ ބިން ޝަމްޝަރ އަކީ 12 ބިލިއަން ޑޮލަރުގެ މުއްސަނދިކަން ހުރި ކަމަށް ބެލެވޭ ވިޔަފާރިވެރި އެކެވެ. ނަމަވެސް މި އަދަދު ވަނީ ރަސްމީކޮށް ކަށަވަރު ނުކުރެވިއެވެ.

ސްރީލަންކާގެ އިޝާރާ ނަނަޔަކާރާ ވަނީ 1.6 ބިލިއަން ޑޮލަރުގެ މުއްސަނދިކަމާއެކު އެ ޤައުމުގެ އެންމެ މުއްސަނދި މީހާގެ މަޤާމު ހޯދާފައެވެ.

ނަނަޔަކާރާ އަކީ 10 ގައުމަށް ވުރެ ގިނަ ޤައުމުތަކުގައި ހިންގާ އެލްއޯއެލްސީ ހޯލްޑިންގްސްގެ އިސްވެރިޔާއެވެ. އޭނާ ވަނީ ސްރީލަންކާގެ މައިކްރޯފައިނޭންސް އަދި އިންޝުއަރެންސް ދާއިރާގައި ފާހަގަކޮށްލެވޭ ކާމިޔާބީތަކެއް ހޯދައި، ކުރިން އެ މަޤާމުގައި ހުރި ދައްމިކަ ޕެރޭރާ ފަހަތައް ޖައްސާފައެވެ.

ނޭޕާލްގެ ބިނޯދް ޗައުދަރީ އަކީ 1.6 ބިލިއަން ޑޮލަރުގެ މުއްސަނދިކަމާއެކު، ވައިވައި ނޫޑުލްސް ބްރޭންޑާއި އެހެނިހެން ވިޔަފާރިތަކުން މަޝްހޫރުވެފައިވާ ވިޔަފާރިވެރިއެކެވެ.