މި ސީޒަނުގައި ރެއާލް މެޑްރިޑަށް ހަ ތަށިވެސް ކާމިޔާބު ކުރެވިދާނެ ކަމަށް އެ ކްލަބަށް ކުރިން ކުޅުނު ޒަބީ އެލޮންސޯ ބުނެފި އެވެ.
ގޯލްޑޮޓްކޮމް އަށް ދިން އިންޓަވިއުއެއްގައި އެލޮންސޯ ބުނީ ރެއާލް އަންނަނީ ކުރިއެރުންތަކެއް ހޯދަމުން ކަމަށާއި، މި ސީޒަނުގައި އެޓީމަށް ހަ ތަށިވެސް ކާމިޔާބު ކުރެވިދާނެ ކަމަށެވެ.
އޭނާ ބުނީ ފާއިތުވެދިޔަ ހަތަރު އަހަރު ތެރޭގައި ރެއާލް ކުޅޭ ކުޅުމާ މިހާރު ކުޅެމުން އަންނަ ކުޅުން ވަރަށް ތަފާތު ކަމަށާއި، މުޅި ޔޫރަޕްގައި އަދި މުޅި ދުނިޔޭގައި ވެސް ރެއާލް އަންނަނީ އެންމެ މަތީ ފަންތީގައި ޖާގަ ހޯދަމުން ކަމަށެވެ.
އެގޮތުން އެލޮންސޯ ބުނީ ފާއިތުވެދިޔަ ހަތަރު ޗެމްޕިއަންސް ލީގުގެ ތެރެއިން ތިން ޗެމްޕިއަންސް ލީގު ރެއާލް ހޯދާފައިވާ ކަމަށާއި، އެއީ ވަރަށް ބޮޑު އެއްޗެއް ކަމަށެވެ. މީގެއިތުރުން އެޓީމު އެއްވަރެއްގައި ހިފަހައްޓަމުން އަންނަ ކަމަށާއި، ޒުވާން ކުޅުންތެރިންވެސް ޓީމުން އުފެދިގެން އަންނަ ކަމަށެވެ.
އެޓީމު ވަނީ ސީޒަނަށް ވަރުގަދަޔަށް ތައްޔާރުވި މެންޗެސްޓާ ޔުނައިޓެޑާ ވާދަކޮށް ޔުއެފާ ސުޕާ ކަޕް ކާމިޔާބު ކުރުމުގެ އިތުރުން ބާސެލޯނާއާ ވާދަކޮށް ސްޕެނިޝް ސުޕާ ކަޕް ވެސް ކާމިޔާބު ކޮށްފައެވެ.
ސްޕެނިޝް ލީގުގައި މިހާތަނަށް ރެއާލް ވަނީ ދެ މެޗު ކުޅެފައެވެ. އޭގެ ތެރެއިން އެއް މެޗު އެޓީމު ކާމިޔާބުކޮށްފައިވާއިރު، ދެވަނަ މެޗުން އެޓީމު ވަނީ އެއްވަރުވެފައެވެ. އެޓީމަށް މިހާރު ދިމާވެފައިވާ އެންމެ ބޮޑު ގޮންޖެހުމަކީ ސަސްޕެންޑު ކޮށްފައިވާ އެޓީމުގެ ފޯވާޑް ކްރިސްޓިއާނޯ ރޮނާލްޑޯ ނުލާ ސްޕެނިޝް ލީގުގައި ތިން މެޗު ކުޅެން ޖެހުމެވެ.
