މުއިއްޒު ނާންގަވާހާ ހިނދަކު ހެކިބަސްދޭން ދާނެކަމަށް ނަރީޝް ބުނި، ޝުއާއު ބުނީ ނުދާން އެންގިޔަސް ދާނެ ކަމަށް - ޔާމީން
13 އޯގަސްޓު 2025 | ބުދަ 17:38ކުރީގެ ރައީސް ޔާމީނަށް ހެކިބަސް ދޭން ހަމަޖެހިފައިވާ ދެ ހެކިވެރިން ސަރުކާރުގެ ޕްރެޝަރާއެކު ހެކިބަސް ދިނުމަށް އުޒުރުވެރިވި
ރައީސް ޔާމީންގެ ހެކިންގެ ގޮތުގައި ހިމެނޭ ޝުއާއު އަދި ނަރީޝް - އެދެމީހުން ކުއްލިގޮތަކަށް ހެކިބަސްދޭން އުޒުރުވެރިވި
ދައުވާތަކާއި ގުޅިގެން، ރައީސް ޑރ. މުހައްމަދު މުއިއްޒު ނާންގަވާހާ ހިނދަކު ހެކިބަސްދޭން ވަޑައިގަންނަވާނެ ކަމަށް އެޑްވައިޒަރ ޓު ޔޫތް މިނިސްޓަރ އަހުމަދު ނަރީޝް ވިދާޅުވި ކަމަށާއި، ރައީސް މުއިއްޒު ނުދާށޭ ވިދާޅުވިނަމަވެސް ހެކިބަސްދޭން ވަޑައިގަންނަވާނެކަމަށް ފިއުލް ސަޕްލައި މޯލްޑިވްސް (އެފްއެސްއެމް) ގެ ޑެޕިޔުޓީ މެނޭޖިންގ ޑިރެކްޓަރ ޝުއާއުﷲ ސައީދު ވިދާޅުވިކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނާއި އިތުރު ފަރާތްތަކެއްގެ މައްޗަށް އުފުލާފައިވާ ދައުވާގެ ޝަރީއަތުގެ ހެކިބަސް ނެގުން ތާވަލުކޮށްފައި އޮއްވާ ހެކިބަސް ދޭން ތިބި އެޑްވައިޒަރ ޓު ޔޫތް މިނިސްޓަރ އަހުމަދު ނަރީޝްއާއި ފިއުލް ސަޕްލައި މޯލްޑިވްސް (އެފްއެސްއެމް) ގެ ޑެޕިޔުޓީ މެނޭޖިންގ ޑިރެކްޓަރ ޝުއާއުﷲ ސައީދު ހެކިބަސް ނުދޭން ވަނީ ނިންމާފައެވެ.
މިއީ ރައީސް ޔާމީންގެ ފަރާތްޕުޅުން ހުށަހެޅުއްވި އެންމެ މުހިންމު ދިފާއީ ދެހެކިވެރިންނެވެ. ނަމަވެސް ސަރުކާރުގެ ޕްރެޝަރާއެކު ހެކިބަސް ދިނުމަށް އުޒުރުވެރިވިއެވެ.
އަދަދު ނޫހުން ގެނެސްދިން ޕްރޮގްރާމެއްގައި ވާހަކަ ދައްކަވަމުން ރައީސް ޔާމީން ވިދާޅުވީ އެ ދެމީހުންގެ ހެކިބަސް ނެގުމަށް ތާވަލުކުރި ޝަރިއަތުގެ ކުރިންވެސް އެދެމީހުން ހެކިބަސްދޭން ތިބީ ތައްޔާރަށް ކަމަށެވެ. އަދި އެ ދެމީހުންނާއި ވާހަކަވެސް ދެއްކެވި ކަމަށް ޔާމީން ވިދާޅުވިއެވެ.
ޔާމީން ވިދާޅުވީ ނަރީޝް ބުނެފައިވަނީ ކަނޑައެޅިގެން ރައީސް މުއިއްޒު އޭނާއަށް ގުޅާފައި ގޮސްގެން ނުވާނެޔޭ ވިދާޅުނުވާހާ ހިނދަކު ހެކިބަސްދޭން ދާނެކަމަށް ވިދާޅުވިކަމަށެވެ. އަދި ޝުއާއު ބުނެފައިވަނީ ރައީސް މުއިއްޒު އޭނާ ކައިރީގައި ނުދާށޭ ވިދާޅުވިނަމަވެސް ދާނެ ކަމަށް ބުނި ކަމަށް ޔާމީން ވިދާޅުވި ކަމަށެވެ. އަދި މިއީ މީހުންގެ ވާހަކަ ހުންނަ ގޮތާއި މީހުންގެ އަމަލުތައް ހުންނަގޮތް ކަމަށެވެ.
ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުން ކުރައްވައިގެން ރިޝްވަތު ނެންގެވި ކަމަށް ކުރީގެ ރައީސް ޔާމިންގެ މައްޗަށް ވަނީ ތުހުމަތުކުރެވިފައެވެ. މި މައްސަލައިގައި ކްރިމިނަލް ކޯޓުން ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް 2022 ވަނަ އަހަރު އިއްވާފައިވެ އެވެ.
އެހެންނަމަވެސް ހައި ކޯޓުން އެ މައްސަލަ ބެލުމަށްފަހު ނިންމާފައި ވަނީ ކްރިމިނަލް ކޯޓުން އެ މައްސަލަ އަލުން ބަލަން ޖެހޭ ކަމަށެވެ. ހައި ކޯޓުން އެ މައްސަލައިގައި ކުރި ހުކުމުގެ ބައެއް ސުޕްރީމް ކޯޓުގައި ވަނީ އިސްތިއުނާފްކޮށްފައެވެ. އިސްތިއުނާފްކޮށްފައި ވަނީ ރައީސް ޔާމީންގެ މައްޗަށް އުފުލާފައިވާ ހިޔާނާތުގެ ދައުވާތައް ސާބިތު ކުރުމަށް ކްރިމިނަލް ކޯޓުގައި ދައުލަތުން ހުށަހާޅައިވާ ހެކިތައް އެއްފަރާތް ކޮށްފައިވާތީ އެ ބައެވެ.
ރައީސް ޔާމީން 11 އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފައި ވަނީ ޑިސެމްބަރު 25 2022 ގައެވެ. އެ ހުކުމް އިސްތިއުނާފް ކޮށްފަިއ ވަނީ މާޗު، 2023 ގައެވެ.
