ދުނިޔޭގެ ގާތުން ކިރުދިނުމުގެ ހަފްތާ ފާހަގަކުރުމަށް ސްޓާ މެޑިކަލްގެ ޚާއްސަ ހަރަކާތެއް
8 އޯގަސްޓު 2025 | ހުކުރު 08:13ގާތުން ކިރު ދިނުމުގެ ހަފްތާ ފާހަގަކުރަނީ އޮގަސްޓް 1-7 އަށް
ސްޓާ މެޑިކަލްގެ ފަރާތުން "ގާތުން ކިރު ދިނުމުގެ ހަފްތާ" ފާހަގަކުރުމަށް ބޭއްވި ހަރަކާތުގެ ތެރެއިން - 08.08.2025
ސްޓާ މެޑިކަލްގެ ފަރާތުން ދުނިޔޭގެ ގާތުން ދިނުމުގެ ހަފްތާ ފާހަގަކޮށްފިއެވެ.
ދުނިޔޭގެ ގާތުން ކިރުދިނުމުގެ ހަފްތާ ފާހަގަކުރުމަށް ސްޓާ މެޑިކަލްގެ ޚާއްސަ ހަރަކާތެއް ބާއްވާފައި ވަނީ ބުރާސްފަތި ދުވަހުގެ ރޭ، ގޯލްޑެން ޓަވަރގައެވެ. މި ހަރަކާތުގެ ތެރެއިން ޒުވާން މަންމައިންނަށް ގާތުން ކިރު ދިނުމާއި ގުޅޭ މައުލޫމާތު ވަނީ ފޯރުކޮށްދީފައެވެ. އެގޮތުން ގާތުން ކިރު ދިނުމުގެ ފައިދާތަކާއި، އެކަމާއި މެދު ހީކުރެވޭ ނުރަނގަޅު ހީކުރުންތަކުގެ މައުލޫމާތު ވެސް ވަނީ ފޯރުކޮށްދީފައެވެ.
ސްޓާ މެޑިކަލްގެ ފަރާތުން ރާއްޖެ އެމްވީ އަށް މައުލޫމާތު ދެމުން ފާތިމަތު ފަރީމާ ވިދާޅުވީ ގާތުން ކިރުދިނުމާއި ގުޅޭ މައުލޫމާތު ފޯރުކޮށްދިނުމަށް ސްޓާ މެޑިކަލް އިން ނިންމީ އެކަމުގެ ސައްހަ މައުލޫމާތު އާއްމުންނަށް އެނގުން މުހިންމު ކަމަށް ޤަބޫލުކުރާތީ ކަމަށެވެ. އަދި މަންމައިންނަށް ބޭނުންވާ މިފަދަ މައުލޫމާތުތަކާއި މެދު ހޭލުންތެރިކުރުވުމަކީ މުހިންމު ކަމެއް ކަަމަށް ދެކޭތީ ކަމަށް ވެސް އޭނާ ވިދާޅުވިއެވެ.
"އަބަދުވެސް އަޑު އިވޭ ދަރިފުޅަށް ލިބޭ ފައިދާގެ ވާހަކަ އެކަމަކު އާއްމުންނަށް ފޯރުކޮށްދޭން ބޭނުން މަންމަ އަށް ލިބޭ ފައިދާ ވެސް. އަދި ގާތުން ދިނުމުގައި ރަނގަޅު ގޮތާއި ނުރަނގަޅު ގޮތް. ބައެއް ކަހަލަ ގަބޫލުކުރުންތައް އެބަ ހުރޭ އެންމެ ރަނގަޅު ނޫން. އެކަންކަމަށް ވެސް ވާނީ އަލި އަޅުވާލާފައި" އޭނާ ވިދާޅުވިއެވެ.
ސްޓާ މެޑިކަލް އިން ކުރިއަށް އޮތްތަނުގައި އަންހެނުންނާއި ކުޑަކުދިންނަށް ބޭނުންވާ ސިއްހީ ޚިދުމަތްތައް ދޭން ފަށާނެ ކަަމަށް އޭނާ ވިދާޅުވިއެވެ.
" ޚާއްސަކޮށް އަންހެނުންގެ ޑޮކްޓަރުންނާއި، ކުޑަކުދިންނަށް ދިމާވާ ސިއްހީ ކަންކަމަށް އަޅުގަނޑުމެން އިސްކަން ދޭނަން. ވަރަށް އަވަހަށް މި ޚިދުމަތްތައް ފެށިގެންދާނެ އިރާދަކުރެއްވިއްޔާ." އޭނާ ވިދާޅުވިއެވެ.
ގާތުން ކިރު ދިނުމުގެ ހަފްތާ ފާހަގަކުރަނީ އޮގަސްޓް 1-7 އަށެވެ.
