މި ސަރުކާރުން އޮރެންޖު ހިޔާގައި ބޮޑެތި ބަލިތަކަށް ފަރުވާދޭ ގޮތަށް ބަދަލުކުރީ ކުރީ ޒަމާނުގައި ބޮޑެތި ބަލިތައް ޖެހޭ މީހުން އެކަހެރިކުރި ގޮތަށް - ބެލެނެވެރިއެއް

ރައީސް ޑރ. މުހައްމަދު މުއިއްޒުގެ ސަރުކާރުން އޮރެންޖު ހިޔާގައި ބޮޑެތި ބަލިތަކަށް ފަރުވާދޭ ގޮތަށް ބަދަލުކުރީ ކުރީ ޒަމާނުގައި ބޮޑެތި ބަލިތައް ޖެހޭ މީހުން އެކަހެރިކޮށް މީހުން ނޫޅޭ ސަރަހައްދަށް ފޮނުވާލި ބީދައިން ކަމަށް ޑަޔަލަސިސް ހަދާ މީހެއްގެ ބެލެނެވެރިއަކު ބުނެފިއެވެ.

މީހަކު ބަލަހައްޓާ ބަލި މީހަކު އޭނާ ގޮވައިގެން އޮރެންޖް ހިޔާގައި ހަދާފައިވާ ޑަޔަލަސިސް ސެންޓަރަށް ގެނައިވަގުތު ހާލުކިހިނެއް ޕްރޮގްރާމުން ވާހަކަ ދައްކާލުމުން ބުނީ އެ ފެސިލިޓީއަށް ހިދުމަތް ބަދަލުކޮށް ބަލި މީހުންނަށް ނިކަމެތި ހާލަތެއް ޖައްސާފައިވާ ކަމަށެވެ. އޭނާ ބުނީ ފޭސް 2ން ބަލިމީހާ ފޭސް1 ގެ ސިނާއީ ސަރަހައްދުގައި ހަދާފައިވާ އޮރެންޖް ހިޔާއަށް ގެންނަ އިރުގައި ބަލިމީހާ ހުންނަނީ އެޑްމިޓްކުރާ ވަރުވެފައި ކަމަށެވެ.

އޭނާ ބުނީ އޮރެންޖު ހިޔާއަށް ޑަޔަލަސިސް ސެންޓަަރު ބަދަލުކުރި އިރުގައި އެތަނުގައި އެންމެ ކުޑަމިނުން އައިސީޔޫއެއްވެސް ނެތް ކަމަށެވެ.

ޑަޔަލަސިސް ހަދާ ޕޭޝަންޓުން ބައެއްފަހަރު ފިޓްޖެހޭ. މިފަދަ ހާލަތެއްގައި އެމީހުން އެތިބެނީ. އެކަހެރި އަދި ހިދުމަތް ނުދެވޭ ފެސިލިޓީއެއްގައި ޑަޔަލަސިސް ހަދަން މިލީ. މިތަނުގައި 5 ގަޑި އިރު ނުވަތަ 4 ގަޑި އިރު ބައި އެބަ ހޭދަކުރަންޖެހޭ.

ތެލަސީމިއާ ބަލިމީހެއްގެ ބެލެނިވެރިޔާ

ސިނާއީ ސަރަހައްދުގައި ޑަޔަލަސިސް ސެންޓަރު ހުންނާތީ ދިމާވާ އުނދަގޫތަކުގެ ވާހަކަ ހިއްސާ ކުރަމުން ރާއްޖެޓީވީއާއި ވާހަކަ ދެއްކި މީހާ ބުނީ އެ ސަރަހައްދަށް ވަދެ ނުކުންނަން ވަރަށް އުނދަގޫ ކަމަށެވެ. އޭނާ ބުނީ ބަލިމީހާ އެތަނަށް ގެންނަ އިރު ހުންނަނީ ބަލިވެފައި ކަމަށާއި، މިއީ ދައްކާފައިވާ ނުބައި ތަސައްވުރެއް ކަމަށެވެ.

މިތާ ކައިރިން ނެތް ފެންފޮދެއް އެއްޗެއް ލިބޭކަށް ވެސް. ކާއެއްޗެއްވެސް މި ގެނެވެނީ ހޮސްޕިޓަލާއި ހިސާބަށް ގޮސްގެން. ވަރަށް ދަތި ހާލެއްގައި މިތަނަށް ބަލި މީހުން މި ގެންނަނީ. ދެން އަނެއްކަމަކީ މިތަނަށް ސެންޓަރު ބަދަލުކުރި އިރު އެއްވެސް ކަހަލަ މަޝްވަރާއެއްވެސް ނެތް.

ޑަޔަލިސިސް ހަދާ ބަލިމީހެއްގެ ބެލެނިވެރިޔާ

ވާހަކަ ދެއްކި މީހާ ބުނީ ޑަޔަލަސިސް ހަދާ ބަލިމީހުންނަކީ ފުރާނައަށް ނުރައްކާވެފައިވާ މީހުން ކަމަށާއި، ނަމަވެސް ކަމެއް ދިމާވެގެން ފަރުވާދޭން އައިސީޔޫއެއް ވެސް އޮރެންޖު ހިޔާގައި ނެތް ކަމަށެވެ. އަދި އެތަނަށް އަންނަނީ މަޖުބޫރުވެގެން ކަމަށާއި، ބަލިމީހާގެ ފުރާނަ ސަލާމަތްކުރުމަށްޓަކައި ކުރަންޖެހޭ ކަމެއް ކަމުން އެތަނަށް އަންނަން މަޖުބޫރު ކަމަށެވެ.

އޭނާ ބުނީ ބަލިމީހާ ގެންނަ މީހާއަށް މަޑުކުރެވޭނެ ތަނެއް ނެތް ކަމަށެވެ. އިށީންނާނެ ތަނެއް ކައިރީގައި ފިހާރައެއް އެހެން ހިދުމަތެއް ލިބެނެ އެއްވެސް ގޮތެއް ނެތް ކަމަށެވެ. އަދި އޮރެންޖު ހިޔާއަށް ޑަޔަލަސިސް ބަދަލުކުރި އިރު އެތަނަށް ބަލިމީހުން ގޮވައިގެން އަންނަ ހަވާލުވެރިން ތިބޭނެ ތަނަކާއި ކުޑަމިނުން ކެއިން ބުއިން ލިބޭނެ އިންތިޒާމެއް ހަމަޖެއްސޭނެ ގޮތެއްވެސް ނޯންނަ ކަމަށެވެ. އަދި މިއީ ސަރުކާރުން ކުރި ނުބައި ކަމެއްގެ ގޮތުގައި އޭނާ ސިފަކުރިއެވެ.