އަބްދުއްރަހުމާންގެ މަރު: ހަށިގަނޑު މާލެ ގެނެސްފި، މީހަކު ހައްޔަރު ނުކުރޭ
13 ޖުލައި 2025 | އާދީއްތަ 17:08އަބްދުއްރަހްމާންގެ އާއިލާއިން ޕޯސްޓްމޯޓަމް ހެދުމަށް ބޭނުން ނުވޭ
އއ. މާޅޮހުގައި މާރާލާފައި އޮއްވާ ފެނުނު އަބްދުއްރަހުމާނުގެ ހަށިގަނޑު ބޮޑީބޭގަކަށް ލައިގެން ގެންދަނީ
މާޅޮހުގައި ރަހުމްކުޑަކޮށް މަރާލާފައި އޮއްވާ ފެނުނު އަބްްދުއްރަހުމާންގެ ހަށިގަނޑު ޕޯސްޓް މޯޓަމް ހެދުމަށް މާލެ ގެނެސްފިއެވެ.
ފުލުހުން ބުނީ އއ. މާޅޮހުގައި ހޮނިހިރު ދުވަހުގެރޭ ހިނގި މަރުގެ ހާދިސާއާ ގުޅިގެން، އއ. މާޅޮސް، އޯކިޑްމާގެ، މަރުހޫމް ޢަބްދުއްރަޙްމާން އާދަމް (65 އ) ގެ ހަށިގަނޑުގެ ޕޯސްޓް މޯޓަމް ހެދުމަށް ތަހުގީގު ޓީމުން ނިންމާފައިވާ ކަމަށެވެ. އަދި މި ނިންމުމަކީ، މަރުގެ ސީދާ ސަބަބުން ދެނެގަތުމަށާއި ތަހުގީގަށް ބޭނުންވާ ހެކި ހޯދުމަށް ނިންމާފައިވާ ނިންމުމެއް ކަމަށް ފުލުހުން ބުނެއެވެ.
2025 ޖުލައި 13 ވަނަ ދުވަހުގެ ދަންވަރު ހިނގި މި ހާދިސާގައި، ގޭގައި ނިދާފައި އޮއްވާ ޢަބްދުއްރަޙްމާން އާދަމް އަށް ބޮޑެތި ޒަހަމްތަކެއް ދިނުމުގެ ސަބަބުން، ސިއްހީ މަރުކަޒުގައި ފަރުވާ ދެމުންދަނިކޮށް ރޭ ފަތިހު ވަނީ ނިޔާވެފައެވެ. މައުލޫމާތު ލިބޭ ގޮތުގައި އޭނާގެ ބޮލުގައި އެއްޗަކުން ޖަހާ ބޯ އޮތީ ޗަސްކޮށްލާފައެވެ.
މައްސަލައިގެ ތަހުގީގު ކުރިއަށްދާއިރު، އިތުރު ތަހުލީލުތައް ހެދުމަށާއި ޕޯސްޓް މޯޓަމް ހެދުމުގެ އިންތިޒާމްތައް ކުރިއަށް ގެންދިއުމަށް މަރުހޫމްގެ ހަށިގަނޑު މިހާރު ވަނީ މާލެ ގެނެސްފައެވެ.
މައުލޫމާތު ލިބޭ ގޮތުގައި، އަބްދުއްރަހްމާންގެ އާއިލާއިން ޕޯސްޓްމޯޓަމް ހެދުމަށް ބޭނުން ނުވެއެވެ. އާއިލާއިން ބުނިގޮތުގައި ޕޯސްޓްމޯޓަމް ހަދަން ބޭނުން ނުވަނީ، ހަށިގަނޑަށް އިތުރު އަނިޔާއެއް ދޭން ބޭނުން ނުވާތީއެވެ.
މި މައްސަލަ އާއި ގުޅިގެން އަދި މިހާތަނަށް އައި އިރު މީހަކު ހައްޔަރުކޮށްފަ އެއް ނުވެއެވެ. ނަމަވެސް މި މައްސަލަގައި ފުލުހުން ދަނީ އެ ރަށުގައި ހަރަކާތްތެރިވަމުންނެވެ. ފުލުހުންގެ ހުއްދަ ނެތި އެ ރަށުން މީހުން ފުރުން މަނާކޮށްފައިވާ އިރު ރަށަށް އަރާ ފައިބާ މީހުން ފުލުހުން ދަނީ މޮނިޓަރކުރަމުންނެވެ.
