ޤައުމީ ވޮލީ ބޯޅަ މުބާރާތުގެ ސެމީ ފައިނަލްގައި ދަޑިމަގު ސްޕޯޓްސް އެންޑް ރެކްރިއޭޝަނާ ދެކޮޅަށް ކުޅުނު މެޗުން ދިވެހި ސިފައިންގެ ކުލަބު މޮޅުވެ، މުބާރާތުގެ ފައިނަލްގެ ޖާގަ ހޯދައިފި އެވެ.

ހުކުރު ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ކުޅުނު ސެމީ ފައިނަލް މެޗު ސިފައިންގެ ކުލަބުން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް ސިފައިންގެ ކުލަބުން ކާމިޔާބު ކުރީ 25-19، 25-15 އަދި 25-16 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ސިފައިންގެ ކުލަބުގެ ބިދޭސީ ކުޅުންތެރިޔާ ޗިރާގް އެވެ.

މެޗުން މޮޅުވެ ސިފައިންގެ ކުލަބުން ފައިނަލްގެ ޖާގަ ހޯދިއިރު، މެޗުން ބަލިވި ދަޑިމަގުން ޖެހޭނީ ތިން ވަނަ ސެމީ ފައިނަލްގައި ކުލަބު އެޗްޑީސީއާ ދެކޮޅަށް ކުޅޭށެވެ.

ތިން ވަނަ ސެމީ ފައިނަލް އިން އެޗްޑީސީ ޖާގަ ހޯދީ ހުކުރު ދުވަހުގެ ހަވީރު ކުޅުނު ސެމީ ފައިނަލްގައި ހުރާ ކޮމިއުނިޓީ ކުލަބުގެ މައްޗަށް ކުރި ހޯދައިގެންނެވެ. އެ މެޗު އެޗްޑީސީ އިން ކާމިޔާބު ކުރީ ސީދާ ތިން ސެޓުންނެވެ. މެޗުގެ ސެޓުތައް އެޗްޑީސީ އިން ކާމިޔާބު ކުރީ 26-24، 28-26 އަދި 25-17 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެޗްޑީސީގެ ޝަމާއީލް ޙުސެއިންނެވެ.

ސިފައިންގެ ކުލަބުން ވަނީ މިއަހަރުގެ ވީއޭއެމް ކަޕްގެ އިތުރުން، ޤައުމީ ވޮލީ ބޯޅަ ލީގު ވެސް ކާމިޔާބު ކޮށްފަ އެވެ. އަދި އެ ޓީމަކީ ޤައުމީ މުބާރާތުގެ އެންމެ ފަހުގެ ޗެމްޕިއަނުންނެވެ. އެހެންކަމުން، ޤައުމީ މުބާރާތް ކާމިޔާބުކޮށް، މިއަހަރުގެ ތިން ތަށި ހޯދުމުގެ ފުރުސަތު ސިފައިންގެ ކުލަބަށް އޮންނާނެ އެވެ.