އެމްއައިޓީޑީސީ އުވާލާ އެމްއެމްޕީއާރުސީ އަމިއްލައަށް ފުދިގެން އުޅުމަށް ލަފާދީފި
ކެމްޕޭންތައް ހިންގުމާއި ލޯނު އަނބުރާ ދެއްކުމަށް އެމްއެމްޕީއާރުސީން ވަރަށް ބޮޑަށް ބަރޯސާވެފައިވަނީ ދައުލަތުގެ ފައިސާގެ މައްޗަށް
އެމްއެމްޕީއާރުސީގެ ހަރަދު ކުޑަކޮށް އަމިއްލައަށް ފުދިގެން އުޅޭ ކުންފުންޏަކަށް ވުމަށް މަޖިލީހުން ވަނީ ލަފާދީފައި
މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ ހަރަދުތައް ކުޑަކޮށް، ކުންފުނިން އަމިއްލަ ފުދުންތެރިކަން ހޯދުމަށް ރައްޔިތުންގެ މަޖިލީހުން ލަފާދީފިއެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިސަސް (އެސްއޯއީ) ކޮމިޓީން ވަނީ އެމްއެމްޕީއާރުސީ އާއި މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްއައިޓީޑީސީ) ގެ ވެސް ހާލަތު މުރާޖައާކޮށް ރިޕޯޓެއް އެކުލަވާލާފަ އެވެ.
އެ ކޮމިޓީން ނިންމާފައި ވަނީ މައިގަނޑު ކެމްޕޭންތައް ހިންގުމާއި ލޯނު އަނބުރާ ދެއްކުމަށް އެމްއެމްޕީއާރުސީން ވަރަށް ބޮޑަށް ބަރޯސާވެފައިވަނީ ދައުލަތުގެ ފައިސާގެ މައްޗަށެވެ. އެގޮތުން އަމިއްލަ ފުދުންތެރިކަން ހުރި ކުންފުންޏަކަށް ހެދުމަށް ހަރަދުތައް ކުޑަކޮށް އާމްދަނީ އިތުރުކުރެވޭނެ ގޮތްތައް ހޯދުމަށް ލަފާދީފައިވެ އެވެ.
ކޮމިޓީގެ ރިޕޯޓުގައިވާ ކަންކަން ފާސްކުރުމަށް ބުދަ ދުވަހުގެ މަޖިލީހުގެ ޖަލްސާގައި ތަޅުމުގައި ވޯޓަށް އެހުމުން 62 މެންބަރުންގެ އިއްތިފާގުން ވަނީ އެ ރިޕޯޓް ފާސްކޮށްފައެވެ.
އެސްއޯއީ ކޮމިޓީން އެކުލަވާލި ރިޕޯޓުގައިވާ ގޮތުން 2020 ވަނަ އަހަރުން ފެށިގެން އެމްއެމްޕީއާރުސީއަށް ފައިދާއެއް ލިބިފައި ނުވާއިރު، ކެމްޕޭންތައް ހިންގަން ބޭނުންވާ ވަރަށް ފައިސާ ވެސް ނެތެވެ. ކޮމިޓީން ބުނި ގޮތުގައި އެމްއެމްޕީއާރުސީ ބަނގުރޫޓުވުމުގެ ނުރައްކާ އެބައޮތެވެ.
އެމްއެމްޕީއާރުސީން މިވަގުތު ތަފާތު 25 ކެމްޕޭނެއް ހިންގަމުންދާއިރު، އޭގެ ތެރެއިން އެންމެ އަގުބޮޑު ކެމްޕޭނަކީ އިނގިރޭސި ޕްރިމިއާ ލީގުގެ އެންމެ މަތީ ފަންތީގެ ކްލަބް ލިވަޕޫލް އެފްސީއާ ގުޅިގެން ކުރަމުންދާ ކެމްޕޭނެވެ. 2024 ވަނަ އަހަރުގެ މާޗް މަހުގެ 13 ވަނަ ދުވަހުން ފެށިގެން 2028 ވަނަ އަހަރުގެ މެއި މަހުގެ 31 ވަނަ ދުވަހުގެ ނިޔަލަށް ކުރިއަށް ގެންދާ މި ކެމްޕޭނަށް އެ ކޯޕަރޭޝަނުން ވަނީ 20.6 މިލިއަން ރުފިޔާ ބަޖެޓެއް ކަނޑައަޅާފަ އެވެ.
އަދި އޭޕްރީލް 28 އިން މެއި މަހުގެ އެއްވަނަ ދުވަހުގެ ނިޔަލަށް ދުބާއީގައި ކުރިއަށް ގެންދިޔަ އަރަބިއަން ޓްރެވަލް މާކެޓަށް ވެސް އެ ކޯޕަރޭޝަނުން ވަނީ 17.6 މިލިއަން ރުފިޔާ ހަރަދުކޮށްފައެވެ. އެ ކޮމިޓީން ނިންމާފައި ވަނީ ބަނގުރޫޓުވުމުގެ ބިރު އޮތް މައިގަނޑު ސަބަބަކީ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ވެރިކަމުގައި ޖަމާވި 203 މިލިއަން ރުފިޔާގެ ގެއްލުމުގެ ސަބަބުންނެވެ.
މީގެ އިތުރުން 2016 ގައި ސައްތައިން ސައްތަ ސަރުކާރު ހިއްސާ އޮންނަ ގޮތަށް އުފެއްދި މޯލްޑިވްސް އިންޓެގްރޭޓެޑް ޓޫރިޒަމް ޑިވެލޮޕްމަންޓު ކޯޕަރޭޝަން (އެމްއައިޓީޑީސީ) އުވާލައި ފަތުރުވެރިކަން ޕްރޮމޯޓްކުރުމުގެ ޒިންމާ އެމްއެމްޕީއާރުސީއަށް ދިނުމަށް ވެސް ވަނީ ފާސްކޮށްފައެވެ. ސަރުކާރުން ވެސް އޮތީ ސެޕްޓެމްބަރު 2024 ގައި އެމްއައިޓީޑީސީ އުވާލަން ނިންމާފަ އެވެ. އެ ނިންމުމާ އެއްގޮތަށް ކުންފުނި އުވާލުމުގެ މަރުހަލާ ކުރިއަށްގެންދިޔުމަށް މަޖިލީހުން ވަނީ ފާސްކޮށްފަ އެވެ.
މީގެ އިތުރުން ތަޅުމުން ފާސްކުރި ރިޕޯޓުގައި ވަނީ އެމްއައިޓީޑީސީ އުވާލުމުގެ މަސައްކަތް ނިމުމުން އެކަމުހެ ހާއްސަ ރިޕޯޓެއް އެސްއޯއީ ކޮމިޓީއަށް ފޮނުވަމަށެވެ.
