މެކްސިކޯ އިން ގޯލްޑް ކަޕް ކާާމިޔާބު ކޮށްފި

ކޮންކާކަފް ގޯލްޑް ކަޕްގެ ފައިނަލްގައި އެމެރިކާގެ މައްޗަށް ކުރި ހޯދައި، މެކްސިކޯ އިން މުބާރާތުގެ ޗެމްޕިއަންކަން ހޯދައިފި އެވެ.

އެމެރިކާގެ އެންއާރްޖީ ސްޓޭޑިއަމްގައި އާދީއްތަ ދުވަހުގެ ރޭ ކުޅުނު ފައިނަލް މެޗު މެކްސިކޯ އިން ކާމިޔާބު ކުރީ 2-1 އިންނެވެ. މެޗުގައި ފުރަތަމަ ލަނޑު ޖަހައި ކުރި ހޯދީ ވެސް އެމެރިކާ އިންނެވެ. ނަމަވެސް، މެކްސިކޯ އިން ވަނީ ފަހަތުން އަރައި ދެ ލަނޑު ޖަހައިގެން މެޗުން މޮޅުވެފަ އެވެ.

މެޗުގެ ފުރަތަމަ ހާފު ނިމުނީ ދެ ޓީމު ވެސް އެއްވަރުވެގެންނެވެ. ނަމަވެސް މެކްސިކޯ އިން ވަނީ ދެ ވަނަ ހާފުގައި ދެ ވަނަ ލަނޑެއް ޖަހައިގެން އެމެރިކާގެ މައްޗަށް ކުރި ހޯދައިފަ އެވެ.

މެޗު ފަށައިގެން ހަތަރު ވަނަ މިނެޓުގައި އެމެރިކާ އިން ވަނީ ލަނޑު ޖަހައި ލީޑު ނަގައިފަ އެވެ. އެ ލަނޑު އެ ޓީމަށް ޖަހައިދިނީ ޑިފެންޑަރު ކްރިސް ރިޗާޑް އެވެ. އޭނާ އެ ލަނޑު ޖެހީ ސެބެސްޓިއާން ބާހޯލްޓާ ތަނަވަސްކޮށްދިން ފުރުސަތެއްގަ އެވެ.

އޭގެ ފަހުން މެޗުގެ ނަތީޖާ ހަމަހަމަ ކުރުމަށް މެކްސިކޯ އިން ކުރި މަސައްކަތް އެ ޓީމުން ވަނީ ފުރަތަމަ ހާފުގެ 27 ވަނަ މިނެޓުގައި ކާމިޔާބު ކޮށްފަ އެވެ. މެކްސިކޯގެ ފުރަތަމަ ލަނޑު ޖަހައި ނަތީޖާ ހަމަހަމަ ކޮށްދިނީ ރައުލް ހިމިނޭޒް އެވެ. އެއީ މާސެލް ރުއިޒް ތަނަވަސްކޮށްދިންް ފުރުސަތެއްގައި އޭނާ ޖެހި ލަނޑެކެވެ.

މެޗުގެ ދެ ވަނަ ހާފުގައި އެމެރިކާ އަށް ވެސް ވަނީ ދެ ވަނަ ފަހަރަށް ލީޑު ނަގާނެ ފުރުސަތު ލިބިފަ އެވެ. ނަމަވެސް އެ ފުރުސަތުގެ ބޭނުން ނުކުރެވި އުޅެނިކޮށް، މެކްސިކޯ އިން ވަނީ ދެ ވަނަ ލަނޑެއް ޖަހައިފަ އެވެ. މެޗުގެ 77 ވަނަ މިނެޓުގައި އެ ލަނޑު މެކްސިކޯ އަށް ޖަހައިދިނީ އެޑްސަން އަލްވަރޭޒް އެވެ. އެއީ ޔޯހާން ވަޒްކުއޭޒް ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ.

މިއީ މެކްސިކޯ އިން ގޯލްޑް ކަޕް ކާމިޔާބު ކުރި 10 ވަނަ ފަހަރެވެ. އަދި އެ ޓީމަކީ ގޯލްޑް ކަޕްގެ ތާރީޚުގައި ވެސް އެންމެ ގިނަ ފަހަރު އެ މުބާރާތް ކާމިޔާބު ކޮށްފައިވާ ޓީމެވެ. މީގެ އިތުރުން މިއަހަރުގެ މުބާރާތް މެކްސިކޯ އިން މި ކާމިޔާބު ކުރީ އެއްވެސް މެޗަކުން ބަލި ނުވެ އެވެ.